(Tōa Ko͘-niû siá ê.)
Tī À-lat-pek, Pa-se, Ìn-tō͘, À-hui-lī-ka, Tiong-kok sio̍k, ū lo̍k-tô. Tī chiah-ê kok ū tōa soa-bô͘, lâng ēng lo̍k-tô lâi chài mi̍h chài-hè kè-khì. Pa̍t-hō ê cheng-siⁿ, chhiⁿ-chhiūⁿ bé gû lû chài bó-hoat-tit, in-ūi lō͘ hn̄g, chúi chió, bô kàu-gia̍h thang hō͘ in chia̍h, koh chháu-á chho͘-chho͘ bô sím-mi̍h chōe. Lo̍k-tô sī tùi ke̍k chá-chá ê sî lâng chiū ū ēng, Sèng-chheh ū kóng, À-pek-lia̍p-hán ū lo̍k-tô, koh Iok-sek hō͘ hiaⁿ bōe, chiū-sī bōe hō͘ Í-si̍t-má-lī ê seng-lí-lâng, in ū kui kûn lo̍k-tô pē hiuⁿ-liāu, jú-hiuⁿ, bu̍t-io̍h, beh khì Ai-ki̍p. Tùi án-ni thang chai lo̍k-tô iah-sī hō͘ lâng put-chí tōa lō͘-ēng. Lo̍k-tô ê ka-chiah bô chhin-chhiūⁿ bé gû lû pîⁿ-pîⁿ, sī lēng-gōa khah koâiⁿ, ū-ê koâiⁿ nn̄g só͘-chāi, tiong-ng khah nah, chia̍h-ê koâiⁿ ê só͘-chāi put-chí ū lō͘-ēng, in-ūi hit ūi ū chúi ū iû chōe-chōe; só͘-í kiâⁿ hiah-ê soa-bô͘ bô chúi ê só͘-chāi, m̄-bián lim-chia̍h iah ōe-chòe-tit. Lo̍k-tô kha-thâu-u ê phê tēng-tēng kāu-kāu, ná chhin-chhiūⁿ lan.
Lo̍k-tô sī put-chí tōa-chiah ê cheng-siⁿ, só͘-í lâng beh khiâ i, á-sī ēng mi̍h-kiāⁿ beh hō͘ i chài, tio̍h kah i kūi-teh, in-ūi ka-chiah téng chin koâiⁿ, lâng hē bōe tio̍h. Kha-thâu-u ê phê tēng-tēng kāu-kāu sī hō͘ i kūi ê sî khah bōe thiàⁿ, in-ūi soa-bô͘ ê soa ū sî chin sio, koh chin tiam, só͘-í phê chiah bōe pit. Lo̍k-tô tāi-seng tio̍h lâng kà, chiah ōe thàn lâng ê chhùi, siⁿ saⁿ-sì nî kú ê lo̍k-tô kiáⁿ, chiū ōe hō͘ lâng kà, ū-sî ēng soh lâi pa̍k i ê chêng-kha, tùi àu-bīn pu̍ih, hoah i kūi, kàu āu-lâi m̄-bián ēng soh, hoah chiū hó. Lo̍k-tô ê phīⁿ-khang ōe ka-kī ha̍p, hō͘ soa bōe eng ji̍p; lo̍k-tô ê kha-chioh-tóe nńg-nńg chhin-chhiūⁿ niau, só͘-í teh kiâⁿ ê sî, lâng bô thiaⁿ-kìⁿ siaⁿ. Lo̍k-tô ê bah iah ōe hō͘ lâng chia̍h-tit, i ê leng ia̍h ōe hō͘ lâng lim.
（大姑娘寫的）
佇亞拉伯、巴西、印度、亞非利加、中國屬，有駱駝。佇遮个國有大沙漠，儂用駱駝來載物、載貨過去。別號的精牲，親像馬、牛、驢，載無法得，因為路遠、水少，無夠額通予𢙠食，故草仔粗粗無甚物濟。駱駝是對極早早的時，儂就有用，聖冊有講，亞伯拉罕有駱駝，故約瑟予兄賣，就是賣予以實瑪利[1]的生理儂，𢙠有規群駱駝背香料、乳香、沒藥[2]，卜去埃及。對按呢通知駱駝亦是予儂不止大路用。駱駝的尻脊無親像馬、牛、驢平平，是另外[3]較懸，有的懸兩所在，中央較凹，遮个懸的所在不止有路用，因為彼位有水、有油濟濟，所以行遐个沙漠無水的所在，毋免啉食亦會做得。駱駝骹頭趺的皮𠕇𠕇、厚厚，若親像趼。
駱駝是不止大隻的精牲，所以儂卜騎伊，抑是用物件卜予伊載，著教伊跪咧，因為尻脊頂真懸，儂下𣍐著。骹頭趺的皮𠕇𠕇、厚厚是予伊跪的時較𣍐疼，因為沙漠的沙有時真燒，故真砧，所以皮㱏𣍐必。駱駝事先著儂教，㱏會趁儂的喙，生三四年久的駱駝囝，就會予儂教，有時用索來縛伊的前骹，對後面拔，喝伊跪；到後來毋免用索，喝就好。駱駝的鼻空會家己合，予砂𣍐坱入；駱駝的骹蹠底[4]軟軟親像貓，所以咧行的時，儂無聽見聲。駱駝的肉亦會予儂食得，伊的奶亦會予儂啉。