(Táⁿ-má-jī Bo̍k-su siá ê.)
Chiàu tāi-seng tiāⁿ-tio̍h ê ì-sù, kin-nî 6·ge̍h, 9 hō, chiū-sī Tiong-le̍k 4·ge̍h 30 ji̍t, Soan-tō chóng gī-hōe chū-chi̍p tī Tāi-eng Lûn-tun kiaⁿ-siâⁿ. Au-lô-pa kúi-nā kok kap Tāi-bí kok chōe-chōe Soan-tō ê kong-hōe chhe lâng khì hù chit ê tōa gī-hōe. Ia̍h ū choân-tō ê lâng kap i-seng tùi À-se-à À-hui-lī-ka kap kúi-nā ê hái-sū khì hù-hōe. Siū chhe khì hù-hōe ê lâng ū 1400 gōa lâng. Tiong-kan ū Ē-mn̂g Bo̍k-su saⁿ lâng I-seng chi̍t lâng, chiū sī Má Iok-hān, Gê Ûi-lîm, Khip Lé-lân, Gân Tāi-pi̍t; Soan sian-siⁿ iah tī-teh. Iáu-ū Tâi-oân, kap Tiong-kok pa̍t ê káng-kháu, í-ki̍p lāi-tōe ê Bo̍k-su kúi-nā lâng tī-teh.
Tāi-ke liân-liân cha̍p-gōa ji̍t chū-chi̍p kî-tó, gī-lūn pò-iông tō-lí kàu thiⁿ-ē bān-kok ê só͘-chāi, sòa saⁿ-khǹg saⁿ bián-lē. M̄-nā chiah-ê chheng-sì tāi-gī ê lâng chū-chi̍p, ia̍h ū Kàu-hōe lāi bo̍k-su tng-chit hiaⁿ-tī chí-bē chīn chōe lâng hù-hōe, ài thiaⁿ chit hō ê tāi-chì, só͘-í ū-sî tâng chi̍t-sî ū chū-chi̍p kúi-nā só͘-chāi, móa-móa kúi-nā keng tn̂g.
Lán tio̍h khún-kiû Siōng-tè chún i ta̍k só͘-chāi ê peh-sìⁿ kî-tó ê ōe, hō͘ chit-ê Soan-tō chóng-gī-hōe só͘ gī-lūn liāu-lí ê tāi-chì kap só͘ kóng saⁿ khǹg saⁿ bián-lē ê ōe, ōe tōa hāu-giām, hō͘ Siōng-tè ta̍k só͘-chāi ê Kàu-hōe khah oa̍h-tāng , chèng-lâng tit-tio̍h jia̍t-sim ài kiù-lâng, it-hoat pek-chhiat kî-tó, it-hoat tōa-liōng ê sim tôe gûn, chōe-chōe lâng ka-kī hiàn hō͘ Siōng-tè, ài chòe Kàu-hōe ê chhe-ēng lâi pò-iông éng-oa̍h ê siau-sit kàu thong thiⁿ-ē.
Ǹg-bāng āu koàn thang kóng chit ê Soan-tō chóng-gī-hōe ê tāi-chì khah siông-sè.
--------:---------
An Ko͘-niû ài thong-ti Lú-o̍h ê ha̍k-seng, 8·ge̍h 20·ji̍t beh khui-o̍h.
（打馬字牧師寫的）
照事先定著的意思，今年6月9號，就是中暦4月30日，宣道總議會聚集佇大英倫敦京城。歐羅巴幾若國佮大美國濟濟宣道的公會差儂去赴即个大議會。亦有傳道的儂佮醫生對亞細亞、亞非利加佮幾若个海嶼去赴會。受差去赴會的儂有1400外儂。中間有廈門牧師三儂，醫生一儂，就是馬約翰[1]、倪為霖[2]、汲禮瀾[3]、顏大闢[4]；宣先生[5]也佇咧。猶有台灣佮中國別的港口，以及內地的牧師幾若儂佇咧。
大家連連十外日聚集祈禱，議論播揚道理到天下萬國的所在，紲相勸相勉勵。毋但遮个千四代議的儂聚集，亦有教會內牧師、當職兄弟姊妹盡濟儂赴會，愛聽即號的事誌，所以有時同一時有聚集幾若所在，滿滿幾若間堂。
咱著懇求上帝准伊逐所在的百姓祈禱的話，予即个宣道總議會所議論、料理的事誌，佮所講相勸相勉勵的話，會大效驗[6]，予上帝逐所在的教會較活動，眾儂得著熱心愛救儂，一發迫切祈禱，一發大量的心題銀，濟濟儂家己獻予上帝，愛做教會的差用，來播揚永活的消息到通天下。
眏望後卷通講即个宣道總議會的事誌較詳細。
――
安姑娘[7]愛通知女學的學生，8月20日卜開學。
[1] 馬約翰牧師，本名Rev. John Macgowan，英國儂，詳見《聖會報儂名檔》。 ↩
[2] 倪為霖牧師，本名Rev. William Macgregor，英國儂，詳見《聖會報儂名檔》。 ↩
[3] 汲澧瀾牧師，本名Rev. Leonard William Kip，美國儂，詳見《聖會報儂名檔》。 ↩
[4] 顏大闢醫生，本名Dr. David Grant，英國儂，詳見《聖會報儂名檔》。 ↩
[5] 宣為霖牧師，本名Rev. William Sutherland Swanson，英國儂，詳見《聖會報儂名檔》。 ↩
[6] hāu-giām：效驗，著是效果、功效。 ↩
[7] 安玉瑜姑娘（Miss Georgina Maclagan），英國儂，詳見《聖會報儂名檔》。 ↩