(San Bo̍k-su siá ê.)
Se-kok ū kàu-hòa ê kok khòaⁿ Sin-bûn-chóa pí bí-niû khah iàu-kín. Iáu-bē chia̍h-pn̄g ê sî, tāi-seng khòaⁿ Sin-bûn, ài chai ta̍k lâng, ta̍k só͘-chāi ê siau-sit, ài ke-thiⁿ chai-bat ta̍k hāng ê tāi-chì; ài khòaⁿ sím-mi̍h lâng kiâⁿ tāi-chì ke-thiⁿ miâ-siaⁿ, sím-mi̍h lâng kiâⁿ tāi-chì ke-thiⁿ kiàn-siàu; in-ūi chiah ê lóng ū kì tī Sin-bûn-chóa. Taⁿ kiám-chhái ū lâng kóng, Sèng-hōe Pò bô kì ta̍k hāng ê tāi-chì, án-ni bô chòe ta̍k hāng ê lī-ek. Chóng-sī, lán m̄-sái hiâm. Kò͘ tō-tek sī tē-it iàu-kín ê sū; tio̍h chai tō-tek kap sū lông kong siong ū kan-sia̍p. Sèng-hōe-pò khí-thâu siat kiám-chhái chhin-chhiūⁿ e-áⁿ, ti-sek bē ū lóng khui, nā-sī eⁿ-á kàu tōa-lâng ê sî ta̍k-hāng tāi-chì ōe chai-iáⁿ. Siat-sú chit hō ê pò bô kàu-gia̍h, ia̍h ōe ke-thiⁿ pa̍t hō. Nā-sī hiān-chāi só͘ tú-tio̍h--ê tio̍h pó-sioh. Iúⁿ-chhī sòe-kiáⁿ, chiah ê ōe chōe-chōe lâng ài kóng. Nā bô kò͘ sòe-kiáⁿ i chiū bōe chiâⁿ tōa-lâng. Ū lâng í-keng piáu-bêng i ōe hiáu-tit tùi-tiōng chit hō Sin-bûn-chóa, lī-ek sī in ê. In ê sim khah ōe khoài khui. Koh, in án-ni siat hó͘ iūⁿ iā ōe lī-ek pa̍t-lâng. Ū lâng iáu-bē chai-iáⁿ, in tio̍h kì-tit Jîn put ha̍k, put ti gī. Lâng nā bô tha̍k, bōe ōe bat gī-lí, che sī tōa khó-sioh. Lán ê tōa Chú siông-siông kiò-chhíⁿ lâng ê sim, kah lâng tio̍h kín-sīn siūⁿ, lâi bêng-pe̍k tō-lí, iā ū tōa kéng-kài ha̍k-seng ê bû-ti. Kiû Sèng-sîn khui lán ê lêng-khiàu.
（山牧師寫的）
西國有教化的國，看新聞紙比米糧較要緊。猶未食飯的時，事先看新聞，愛知逐儂，逐所在的消息；愛加添知捌逐項的事誌，愛看甚物儂行事誌加添名聲；甚物儂行事誌加添見笑。因為遮个攏有記佇新聞紙。當敢彩有儂講，《聖會報》無記逐項的事誌，按呢無做逐項的利益。總是，咱毋使[1]嫌。顧道德是第一要緊的事，著知道德佮士、農、工、商有干涉。《聖會報》起頭設[2]敢彩親像嬰仔，知識未有攏開，但是嬰仔到大儂的時逐項事誌會知影。設使即號的報無夠額，也會加添捌號。但是現在所得著的著寶惜、養飼細囝，遮个話濟濟愛講。若無顧細囝，伊就𣍐成大儂。有儂已經表明伊會曉得對重即號新聞紙，利益是𢙠的。𢙠的心較會快開。故，𢙠按呢設好樣，也會利益別儂。有儂猶未知影，𢙠著記得「人不學，不知義」，儂若無讀，𣍐會捌義理，這是大可惜。咱的大主常常叫醒儂的心，教儂著謹慎想，來明白道理，也有大警戒學生的無知。求聖神開咱的靈竅。