(Tīⁿ Hoat-le̍k chhit ba̍k-sái kì.)
Tīⁿ Kong-chhái sī góa ê sió-tī, nî-hè 17, pêng-sò͘ soe-lám, ji̍p Tiong-o̍h liáu-āu koh-khah sán, sì-ge̍h kan góa ê hū-jîn-lâng tùi góa kóng, "Tio̍h hō͘ i tò-khì lâi chiàu-kò͘ seng-khu." Góa hoaⁿ-hí i ê khûn, ǹg-bāng i ū lō͘-ēng, só͘-í kóng, "Tha̍k-chheh-lâng siông-siông án-ni, phah-sǹg ia̍h bô iàu-kín." Bò phah-sǹg kàu 30 ji̍t, jiám-tio̍h bōe hó ê pīⁿ, kàu gō͘-ge̍h 15 soah chiū kè-óng.
......Góa la̍k-ê sió-tī, hām chit-ê sí-khì gō͘ ê lah, koh chit-ê ia̍h-sī tióng-sêng hiáu-lí--ê, tùi chá-ji̍t siūⁿ hiān-kim kiám m̄ pi-siong mah? Chóng-sī ia̍h ū thang hoaⁿ-hí--ê, góa ài-beh kóng-khí, chiū-sī i lîm-chiong ê ōe.
Tng i siong-tiōng ê sî, chiah ê saⁿ-thiàⁿ--ê chōe-chōe lâi bāi i, lâng nā mn̄g i, i lóng ìn kóng i an-sim, Chú ōe kiù i, chhin-chhiūⁿ án-ni kúi-nā ji̍t, in-ūi i ê seng-khu sui-bóng tī kan-khó͘ ê só͘-chāi, nā-sī i ê sim í-keng kàu khoài-lo̍k ê kok.
Chhoe-poeh àm chiong-kūn poeh-tiám, put-chí gûi-hiám chhin-chhiūⁿ hong tiong-ng ê chek, ba̍k-chiu kim-kim chhiú ti̍t-ti̍t ia̍t, liân kiò cha̍p-gōa siaⁿ kóng,"Chú kàu lah! Chú kàu lah! Chú ah Chú ah! Chhiáⁿ lí kín-kín kàu." Góa mn̄g i kóng Chú tī tah-lo̍h? I chiū bong bîn-chhn̂g kóng, "Chú tī góa ê sin-piⁿ." Koh ēng chiàⁿ-chhiú kí kóng, "Thiⁿ-sài tī hia beh chhōa góa khì." Góa kóng lí sìn Chú tek-khak chiap-la̍p lí á bô? Ìn-kóng ū. Tâng tèng ê chha̍t chi̍t sî jīn Chú, Chú ín i kóng, "Lí kin-á-ji̍t tek-khak kap góa tī Lo̍k-hn̂g." Hô-hòng góa? Góa ia̍h tek-khak kap Chú tī Lo̍k-hn̂g. Góa ín Sèng-keng kóng, "Chhim-chhim sìn Chú, sim-koaⁿ bô î-e̍k." I ìn-kóng, "Tio̍h. Ū." Āu-lâi chiū kóng, "Sū bêng-pe̍k lah!" Koh kóng, "Pē ah! Góa ê sîn thok-tiōng lí." Kóng soah chiū hūn-khì, thêng tia̍p-á-kú koh cheng-sîn chiū kóng, "Sio̍k sè-kan ê sū góa tio̍h lio̍h-á kā lín kóng, góa ū tām-po̍h chîⁿ, jōa-chōe tī bó͘-lâng tau, koh jōa-chōe tī bó͘-lâng tau; góa kiàn-siàu tī sè-kan bōe-tit chòe Chú ê kang, góa ê siuⁿ-lāi ū saⁿ-ê gûn-chîⁿ, tio̍h kau Ē-mn̂g-káng tông-hōe, chòe Soan-tō-hōe ê lō͘-ēng, che sī sim só͘ goān·ê."
Hit-sî Tek-chhiū-kha ê Bo̍k-su kap i Sian-siⁿ chìn-chêng, I chiū kia̍h-thâu khòaⁿ i kóng, Sian-siⁿ ah! Góa sī bô lō͘-ēng ê lô͘-po̍k, tī o̍h lāi bô siáⁿ hó-khoán, ia̍h kap kúi-nā lâng sió-khóa khǹg-oàn, chhiat-chhiat thok-tiōng Sian-siⁿ thòe góa kiû in sià-bián. Sian-siⁿ kóng, Hó, lí thang an-sim. Bo̍k-su ín Hui-li̍p-pí 1:22-24 mn̄g i cháiⁿ-iūⁿ, I ìn-kóng, Góa í-keng kéng chi̍t hāng lah, chiū-sī goān lī-khui sè-kan kap Chú saⁿ-kap tiàm sī khah hó; chóng-sī góa sī loán-jio̍k ê lâng, chhiáⁿ thòe góa kî-tó. Hit-sî Bo̍k-su kap kúi-nā lâng saⁿ-sòa kî-tó, kî-tó soah i ia̍h kî-tó, tāi-khài sī thòe Kàu-hōe kap ke-lāi ê lâng kî-tó, jiân-āu chiū kiò ke-lāi ê lâng kàu i ê bīn-chêng, oán-jiân chhin-chhiūⁿ lāu-lâng teh hoan-hù, tùi tōa kàu sòe put-chí ū chhù-sū; tùi góa ê ḿ kóng, Ḿ ah! Góa goān lí tit-tio̍h hok-khì, goán lāu-pē, goán lāu-bú lí tio̍h an-ùi i, chiàu-kò͘ i, sī sim só͘ goān.
Āu koàn beh koh ìn.
（鄭法力[1]拭目屎記）
鄭光彩[2]是我的小弟，年歲17，平素衰荏，入中學了後故較㾪。四月間我的婦人儂對我講，「著予伊倒去，來照顧身軀。」我歡喜伊的勤，眏望伊有路用，所以講，「讀冊儂常常按呢，拍算亦無要緊。」無拍算過30日，染著𣍐好的病，到五月15煞，就過往。
......我六个小弟，含即个死去五个啦，故即个亦是長成曉理的，對早日想現今敢毋悲傷嘛？總是亦有通歡喜的，我愛卜講起，就是伊臨終的話。
當伊嵩重的時，遮个相疼的，濟濟來䀛伊，儂若問伊，伊攏應講伊安心，主會救伊，親像按呢幾若日，因為伊的身軀雖罔佇艱苦的所在，但是伊的心已經到快樂的國。
初八暗將近八點，不止危險親像風中央的燭，目睭金金，手直直拽，連叫十外聲講，「主到啦！主到啦！主啊主啊！請汝緊緊到。」我問伊講主佇佗落？伊就摸眠床講，「主佇我的身邊。」故用正手指講，「天使佇遐卜抴我去。」我講汝信主的確接納汝抑無？應講，「有。同釘的賊[3]一時認主，主允伊講，『汝今仔日的確佮我佇樂園』，何況我？我亦的確佮主佇樂園。」我引聖經講，「深深信主，心肝無移易[4]。」伊應講，「著，有。」後來就講，「事明白啦！」故講，「父啊，我的神託仗汝。」講煞，就暈去，停疊仔久故精神就講，「屬世間的事我著略仔共恁講，我有淡薄錢，偌濟佇某儂兜，故偌濟佇某儂兜，我見笑，佇世間𣍐得做主的工，我的箱內有三个銀錢，著交廈門港[5]堂會，做宣道會的路用，這是心所願的。」
彼時，竹樹骹[6]的牧師佮伊的先生進前，伊就揭頭看伊講，先生啊，我是無路用的奴僕，佇學內無啥好款，亦佮幾若儂小可囥怨，切切託仗先生替我求𢙠赦免。先生講，好，汝通安心。牧師引《腓立比》1:22-24問伊怎樣，伊應講，我已經揀一項啦，就是願離開世間佮主相合坫是較好，總是我是軟弱的儂，請替我祈禱。彼時牧師佮幾若儂相紲祈禱。祈禱紲，伊亦祈禱，大概是替教會佮家內的儂祈禱，然後就叫家內的儂到伊面前，宛然親像老儂咧吩咐，對大到細不止有次序，對我的姆講，「姆啊！我願汝得著福氣，阮老父，阮老母汝著安慰伊，照顧伊，是心所願。」
（後卷卜故印）