基本信息

書刊

漳泉聖會報（Chiang-choân Sèng-hōe Pò）

卷期

1888-9,(1),4

年份

1888

標題

廈門聖會的來歷（Ē-mn̂g Sèng-hōe ê lâi-le̍k.）

羅馬字正文 漢字正文 ← 轉去頂頁

Ē-mn̂g Sèng-hōe ê lâi-le̍k.

(Chiap chêng koàn tē 17 bīn.)

Tī tē-it koàn tē-chhit bīn kóng Pí-lí Sian-siⁿ tiàm Ē-mn̂g thoân tō-lí kàu Ló-tì, Pó-lô-boán, Si Iok-hān, Iông Ûi-lîm chiah-ê bo̍k-su kàu. Taⁿ beh lio̍h-lio̍h-á kóng-khí Pó-lô-boán Sian-siⁿ ê tāi-chì.

Pó-lô-boán chhut-sì tī 1812·nî, In lāu-pē sī pài Siōng-tè ê lâng, tī sè-kan m̄-sī tōa hó-gia̍h, káⁿ ū hó ê gia̍p tī thiⁿ·ni̍h; tek-khah ū ín-chhōa kiáⁿ-jî pài Siōng-tè thàn tō-lí.

I kàu 13 hè khì kap lâng tòa, o̍h seng-lí. Tùi hit-tia̍p ûn-ûn-á sit kî-tó ê pún-hūn sim-koaⁿ khah hong, sui-jiân bô kiâⁿ sím-mi̍h phái-tāi iáu-kú sī put-chí gûi-hiám. Hit-sî i chi̍t ê tōa-chí phòa-pīⁿ chin siong-tiōng, phah-sǹg bô jōa-kú ōe sí, ia̍h lóng bô kiaⁿ, hoán-tńg tōa hoaⁿ-hí him-bō͘ thian-tông ê hok-khì, in-ūi sī chhim-chhim sìn Chú ê lâng. I chiū khó͘-khǹg i ê sió-tī m̄-thang sim-koaⁿ ǹg sè-kan, tek-khah tio̍h kín-mé hoán-hóe lâi hâng-ho̍k Chú Iâ-so͘, hō͘ i kiù. I khòaⁿ i ê tōa-chí kàu chiah jia̍t-sim ho̍k-sāi Chú, ia̍h tī seng-khu kan-lân lîm-chiong ê sî sim-koaⁿ hoaⁿ-hí kàu bōe-kò͘-tit, chiū lóng bô bōe-kì-tit i ê tōa-chí só͘ kà-sī só͘ khó͘-khǹg ê ōe. Sèng-sîn ēng chit hō ê tāi-chì tōa kám-hòa i ê sim, i chiū lóng-chóng hâng-ho̍k Kiù-chú; tùi án-ni sim-koaⁿ kek-tōa hoaⁿ-hí ho̍k-sāi Siōng-tè; kàu 17 hè kàu-hōe chiap-la̍p i siú boán-chhan kong-hêng jīn Chú ê miâ.

Pó-lô-boán siū Sèng-sîn kám-hòa, hō͘ i ti̍t-ti̍t óa-khò Iâ-so͘, siūⁿ Siōng-tè tek-khak ū sià-bián i, chiū sim-koaⁿ hoaⁿ-hí kàu tòng-bōe-tiâu.

Kè kúi-nā nî, ka-kī teh lūn chi̍t-ê tāi-chì chiū kóng, "Hit-tia̍p góa hut-jiân móa-sim móa-pak hoaⁿ-hí, siūⁿ Siōng-tè si̍t-chāi sī góa ê Siōng-tè, góa taⁿ thang tùi i kiû-kiò kóng, A-pà Pē·ah. Hit chá-khí ê hoaⁿ-hí kap pêng-siông ji̍t tōa koh-iūⁿ, hit-sî ê khoài-lo̍k kàu bōe-hiáu-tit kóng."

Lâng tio̍h tit-tio̍h thiⁿ-sài ê chhùi-chi̍h, tio̍h ēng Se-la̍h-peng ê kháu-châi, chiah ōe kóng-bêng góa hit-tia̍p hoaⁿ-hí ê sim-chêng. O-ló Siōng-tè, o-ló Siōng-tè, i sio̍k-chōe ê un-tián sī koh-iūⁿ kàu-ke̍k.

Pó-lô-boán tit-tio̍h un kàu chiah chhim, liâm-piⁿ ài kiù pa̍t-lâng, chiū siat-hoat pàng-sak seng-lí ê tāi-chì lâi tha̍k-chheh, ǹg-bāng āu-lâi thang pò-iông hok-im ê tō-lí. Tha̍k-chheh kúi-nā nî kàu 23 hè, chiū tit-tio̍h ji̍p Thoân-tō ê Tōa-o̍h. Hit-tia̍p í-keng tiāⁿ-tio̍h ê ì-sù, Siōng-tè nā chún, chiū beh chhut-gōa khì bô pài Siōng-tè ê só͘-chāi lâi pò-iông éng-oa̍h ê tō-lí.

Hit-sî Tāi-bí kok Kui-chèng ê kàu-hōe iáu-bē lēng-gōa siat-li̍p kong-hōe chhe lâng khì gōa-kok thoân-tō, sī iáu-kú ēng Bí-pō͘ soan-tō ê kong-hōe liāu-lí chit hō sū.

Pó-lô-boán chiū siá-phoe pín Bí-pō͘-hōe ê Táng-sū tio̍h chiap-la̍p i, thèng-hāu keng-kè Tōa-o̍h, tit-tio̍h siat-li̍p chòe Thoân-tō ê bo̍k-su, thang chhe i khì pò-iông hok-im. Hit tiuⁿ phoe só͘ kóng ê ōe put-chí ōe kam-kek lâng ê sim, góa chiū ín kúi kù lâi hoan-e̍k. Í-keng kóng i kú-kú ê ì-sù, siūⁿ tio̍h chhut-gōa khì m̄-chai tō-lí ê só͘-chāi, pò-iông éng-oa̍h ê kà-sī, chiū kóng, "Góa pún ū chit hō ê ì-sù, m̄-sī tùi sim-koaⁿ phû-phû phiò-phiò lâi siūⁿ chiah tiāⁿ-tio̍h, sī tùi sim-koaⁿ chin sòe-jī chim-chiok siūⁿ i chit-ê tāi-chì."......

.....

.....

Kóng-soah sûi-sî chiū khì Su-lī-má in tau kap i kiâⁿ-lé, saⁿ-kap chē lo̍h kóng-khí i só͘ bāng-kìⁿ ê tāi-chì hō͘ in peh thiaⁿ, kóng, "Góa bāng-kìⁿ góa í-keng kè-óng. Sin-si hō͘ lâng tâi, lêng-hûn bô sí iáu tī-teh. Koh bāng-kìⁿ chi̍t ki tōa thian-pêng sī kim ê, thian-pêng thiāu koâiⁿ kàu tú-thiⁿ. Góa khiā tī hia, ū sîn beh lâi phêng góa it-seng só͘-kiâⁿ ê hó-pháiⁿ. Hó-ê beh hē tī chiàⁿ-péng ê phêng-óaⁿ, pháiⁿ-ê hē tī tò-pêng ê phêng-óaⁿ. Nā-sī hó ê khah ū tāng chiū thiⁿ-sài beh hû góa khì thian-tông, nā-sī pháiⁿ ê khah tāng chiū Mô͘-kúi beh thoa góa kàu tē-ge̍k. Koh khòaⁿ-kìⁿ Mô͘-kúi ê bīn chīn hiông chīn pháiⁿ-khòaⁿ, ba̍k-chiu kim-nà-nà chhin-chhiūⁿ to̍h-hé ê thô͘-thòaⁿ."

In peh Su-lī-má ìn kóng, "Lí khòaⁿ-kìⁿ kàu án-ni káⁿ ōe hō͘ lí kiaⁿ kàu kheh-kheh-tiō hò͘ⁿ?"

À-lī-kán ìn kóng,"Khí-thâu bô kàu jōa tōa-kiaⁿ, ka-kī siūⁿ pêng-sî ê só͘-kiâⁿ bô sím-mi̍h tōa m̄-tio̍h, thong siâⁿ ê lâng bô lâng ōe ta̍t-tit góa hiah kèng-khiân, gâu siú kài-lu̍t. Ka-kī siūⁿ bô sím-mi̍h pháiⁿ-tāi thang hē tī tò-pêng ê phêng-óaⁿ, só͘-í hit-tia̍p góa chiah bô kiaⁿ, jiân-āu oa̍t-thâu khòaⁿ-kìⁿ chi̍t-tīn o͘-o͘ chīn béng ê kúi ta̍k-ê kim-kim siòng góa, chiah chai kiaⁿ."

Su-lī-má koh mn̄g kóng,"Í-gōa iáu ū bāng-kìⁿ bô?"

Ìn kóng, "Ū ah. Koh bāng-kìⁿ chi̍t-tīn o͘ ê kúi kiâⁿ óa kàu thian-pêng, ta̍k-ê teh taⁿ chi̍t-tàⁿ chin tāng ê o͘-mi̍h. Hiah ê o͘-mi̍h chiū-sī góa tiàm sè-kan ê sî só͘ kiâⁿ ê chē-kòa. Góa teh khòaⁿ ê sî ū saⁿ-hāng hō͘ góa chin kî-koài, chiū-sī kî-koài chiah ê o͘-mi̍h kàu chiah chōe, kàu chiah tōa, ia̍h kàu chiah tāng. Góa só͘ lia̍h-chòe bô iàu-kín ê sū taⁿ khòaⁿ ū chīn tāng ê chōe. Kúi ta̍k-ê kàu chiū piàⁿ i só͘ taⁿ ê tī tò-pêng ê thian-pêng-óaⁿ. Hit pêng-óaⁿ liâm-piⁿ tūi-lo̍h kàu chīn kē. Sat-tàn chiū oa̍t-thâu siòng góa siūⁿ tek-khak beh lia̍h góa. Sat-tàn chiū hoan-hù koh chi̍t-tīn pháiⁿ-kúi kóng, À-lī-kán só͘ bat kóng ê pháiⁿ-ōe tio̍h taⁿ lâi. Góa hit-sî si̍t-chāi tōa gông-ngia̍h, lóng bô phah-sǹg góa bat kóng kàu hiah chōe pháiⁿ-ōe. Ū-sî bat hoat siū-khì kóng-chhut pháiⁿ-ōe, chóng-sī bô lia̍h-chòe iàu-kín ê sū. Hit-hō ê pháiⁿ-ōe chhin-chhiūⁿ o͘ ê chéng-chí, ū ê tōa-lia̍p, ū ê sòe-lia̍p, ta̍k lia̍p chīn tāng. Chin-chōe kúi teh taⁿ lâi, ta̍k-ê ki-chhì góa, kiâⁿ chìn-chêng piàⁿ in só͘ taⁿ ê pháiⁿ-ōe tī tò-pêng ê thian-pêng-óaⁿ. Góa chiū kì-tit sio̍k-gú kóng, Kha poa̍h-tó ōe peh khí-lâi, chhùi kóng chhut bōe koh siu tò-tńg.

Su-lī-má chiū kóng, "Iâ-so͘ ê ōe pí sio̍k-gú koh khah hó. I bat kóng, 'Góa kā lín kóng, kóng-ōe lām-sám tek-khak tī siū sím-phòaⁿ ê ji̍t hō͘ Siōng-tè sím-phòaⁿ. In-ūi chiàu lí ê ōe chiū chheng-gī, ia̍h chiàu lí ê ōe chiū gí-chōe.'(Má-thài 12:36,37)"

À-lī-kán thó͘-khùi kóng, "Góa káⁿ ū bat kóng chi̍t-bān kù pháiⁿ-ōe lóng bōe sǹg tit. Tò-pêng ê thian-pêng-óaⁿ tāng kàu beh lo̍h tē-ge̍k. Ai-ah! Kàu án-ni iáu-bē liáu, iáu ū khah chhám ê sū, chiū-sī hit-sî Sat-tàn koh tōa-siaⁿ hoan-hù kóng,'À-lī-kán pháiⁿ ê liām-thâu tio̍h taⁿ lâi!' Thiaⁿ chit kù góa koh thó͘-khùi kóng, 'Ai-ah! Liām-thâu ia̍h tio̍h siū kàm-chhat mah?'"

Su-lī-má ìn kóng, "Sèng-chheh ū kì-chài, pháiⁿ ê liām-thâu sī tùi sim khí, che sī bak lâ-sâm ê lâng."(Má-thài 15:19,20.)

À-lī-kán kóng, "Kúi sûi-sî taⁿ lâi. Chiah-ê pháiⁿ ê liām-thâu chiàu ba̍k-chiu khòaⁿ sī chhin-chhiūⁿ o͘-ian, chóng-sī tōa-tōa bô tâng, in-ūi o͘-ian sī khin-khin, pháiⁿ ê liām-thâu chin-chiàⁿ tāng. Kúi piàⁿ tī tò-pêng ê thian-pêng-óaⁿ, hō͘ hit óaⁿ lo̍h koh khah kē kàu ji̍p chi̍t-ê chhim-ian. Chhim-ian thò͘ chhut hé-chi̍h kap o͘-hun. Hit-sî góa hiám-hiám sit-bāng, hut-jiân kì-tit góa só͘ kiâⁿ ê hó-sū iáu-bē hō͘ i phêng. Góa siūⁿ hó-sū ún-tàng chōe-chōe, chiū tōa-siaⁿ kiò thiⁿ-sài kóng, 'Hó-sū tio̍h kín-kín taⁿ lâi! Góa só͘ bat chín-chè lâng, só͘ bat kìm-chia̍h, chiah-ê hó-sū tio̍h kín-mé piàⁿ tī chiàⁿ-pêng ê thian-pêng-óaⁿ.' Góa siūⁿ chit-tia̍p chiàⁿ-pêng ê thian-pêng-óaⁿ tek-khak pí tò-pêng ê khah tāng, hō͘ tò-pêng koâiⁿ-koâiⁿ, chiàⁿ-pêng kē-kē."

Thiⁿ-sài kúi-nā ê bān-bān lâi ta̍k-ê teh taⁿ chi̍t tàⁿ pe̍h ê mi̍h. Thâu-chêng ê thiⁿ-sài khui-chhùi kóng, "Lâng kiâⁿ hó-sū in-ūi ài kui êng-kng Siōng-tè, hit hō sū sǹg sī tāng, nā kiâⁿ hó-sū ài-tit chòe kong-lô hit hō sū chiū sǹg sī khin chhin-chhiūⁿ chiáu-mn̂g. Lí it-seng só͘ kiâⁿ ê hó-sū goán teh taⁿ sī khin-khin."

Kóng soah thiⁿ-sài ta̍k-ê piàⁿ in só͘ taⁿ ê pe̍h-mi̍h tī chiàⁿ-pêng óaⁿ. Hiah-ê mi̍h si̍t-chāi khin, thian-pêng lóng bô chi̍t-tiám-á tín-tāng. Khó͘ ah! Góa só͘ kìm-chia̍h kap chín-chè lâng, chiah ê sū lóng kui tī bô.

Koh siūⁿ góa pêng-sî kî-tó hit chat sū iáu-bē taⁿ lâi phêng, chiū kiû-kiò thiⁿ-sài kóng, "Góa kî-tó ê sū! Góa kî-tó ê sū! Tio̍h kín-kín taⁿ lâi. Góa chit-ji̍t kî-tó ū gō͘-pái, í-keng kî-tó chiah chōe nî, án-ni chiah ê kî-tó sū tek-khak ū kè-thâu tāng." Góa tùi thiⁿ-sài kóng liáu, hit-sî hō͘ góa tōa kî-koài, bōe bêng-pe̍k, in-ūi khòaⁿ-kìⁿ hiah ê thiⁿ-sài chiong góa ê pe̍h-pe̍h kî-tó sū kau hō͘ o͘-kúi. Hiah ê o͘-kúi chi̍t-ê lâi chhut-chhiú beh taⁿ, bong liáu pe̍h-ê liâm-piⁿ pìⁿ-chòe o͘, chiū taⁿ khì piàⁿ lo̍h tò-pêng thian-pêng-óaⁿ.

Su-lī-má kóng, "Hit-ê chêng-hêng cháiⁿ-iūⁿ án-ni, góa beh kā lí kóng, tek-khak sī tùi kî-tó Siōng-tè bô sêng-si̍t bô kèng-khiân. Chhùi kî-tó, sim siat-to̍k, gōa-phê kèng-ùi, lāi-sim kiau-ngō͘, chiū-sī phah lâ-sâm Siōng-tè sèng-miâ, chhin-chhiūⁿ hoān tio̍h tē saⁿ tiâu sèng ê kài-bēng, só͘-í bōe sǹg tit sī hó, hoán-tńg sǹg sī pháiⁿ. Thiⁿ-sài chiah bô lâi kā lí taⁿ, to̍k-to̍k ū kiò hiah-ê o͘-kúi lâi kā lí taⁿ, hō͘ lí chai lí it-seng kî-tó Siōng-tè bōe sǹg tit sī hó. À-lī-kán ah! Lí ū koh bāng-kìⁿ sím-mi̍h?"

Ìn kóng, "Ū, bāng-kìⁿ pháiⁿ-kúi lâi lia̍h góa, hit-sî kiaⁿ kàu khùn-chhíⁿ. Peh ah! M̄-chai bat thiaⁿ-kìⁿ lâng bāng-kìⁿ pháiⁿ-bāng kàu án-ni mah?"

Su-lī-má ìn kóng, "Cheng-sîn ê sî, góa bat siūⁿ chit-hō ê tō-lí, bat khòaⁿ góa só͘ kiâⁿ só͘ kóng só͘ siūⁿ lóng-chóng hō͘ Siōng-tè sím-phòaⁿ. Ū chi̍t chat Sèng-chheh hō͘ góa kiaⁿ kàu ngia̍uh-ngia̍uh-chhoah, chiū-sī Siōng-tè phêng lí, chai lí ū khiàm-kheh. (Tān 5:27.) Góa lóng bô chi̍t chat hó-sū thang lok tī chiàⁿ-pêng ê thian-pêng-óaⁿ. À-lī-kán ah! Góa siūⁿ án-ni chiū kiû-kiò, 'Siōng-tè ah, tio̍h lîn-bín góa ū chōe ê lâng.'"

À-lī-kán mn̄g kóng, "Án-ni sè-kan lâng lóng bô thang ǹg-bāng mah? Kiám bô sím-mi̍h tāng ê mi̍h thang lok tī chiàⁿ-pêng ê óaⁿ, hō͘ tò-pêng ōe khah khin m̄-sái o̍͘h tē-ge̍k?"

Su-lī-má ìn kóng, "Kám-siā Siōng-tè! Kám-siā Siōng-tè! M̄-sái sit-bāng, góa bat khòaⁿ-kìⁿ Iâ-so͘ ê pó-huih chi̍t tiám tih tī chiàⁿ-pêng ê thian-pêng-óaⁿ. Chi̍t tiám pí tò-pêng óaⁿ só͘ tóe ê pháiⁿ khah tāng. Tò-pêng liâm-piⁿ khí chīn koâiⁿ. Góa ê chōe lóng bô·khì, éng-éng bô·khì, bōe koh-chài khòaⁿ. Sim tōa hoaⁿ-hí kiò kóng, 'Siōng-tè ê Kiáⁿ Iâ-so͘ Ki-tok ê huih sóe-tû lóng-chóng ê chōe'."

À-lī-kán chiū kóng, "Su-lī-má ah! Lí káⁿ-sī chòe Iâ-so͘ ê ha̍k-seng?"

Ìn kóng, "Sī ah, Sèng-chheh kap liông-sim chim-chiok kà-sī góa, hō͘ góa chai lâng ê chōe sī tāng-tāng, nā bô Iâ-so͘ ê kong-lô thang hē tī chiàⁿ-pêng ê thian-pêng-óaⁿ, lâng chiū bô thang ǹg-bāng."

廈門聖會的來歷

（接前卷第17面）

佇第一卷第七面講裨理先生坫廈門傳道理到羅啻、波羅滿、施約翰、揚為霖遮个牧師到。當卜略略仔講起保羅滿先生的事誌。

保羅滿出世佇1821年。𢙠父母是拜上帝的儂，佇細漢毋是大好額，敢^[1]有好的業佇天裡，的確有引抴囝兒拜上帝，趁道理。

伊到13歲去佮儂蹛，學生理。對彼疊勻勻仔失祈禱的本份，心肝較放^[2]，雖然無行甚物否事，猶故是不止危險。彼時伊一个大姊破病真嵩重，拍算無偌久會死，亦攏無驚，反轉大歡喜欣慕天堂的福氣，因為是深深信主的儂。伊就苦勸伊的小弟毋通心肝向世間，的確著緊猛^[3]反悔來降服主耶穌，予伊救。伊看伊的大姊到遮熱心服侍主，亦佇身軀艱難臨終的時心肝歡喜到𣍐顧得，就攏無𣍐記得伊的大姊所教示，所苦勸的話。聖神用即號的事誌大感化伊的心，伊就攏總降服救主，對按呢，心肝極大歡喜服侍上帝，到17歲教會接納伊守晚餐公行^[4]認主的名。

保羅滿受聖神感化，予伊得著倚靠耶穌，想上帝的確有赦免伊，就心肝歡喜到擋𣍐櫥。

過幾若年，家己咧論即个事誌，就講，「彼疊我忽然滿心滿腹歡喜，想上帝實在是我的上帝，我當通對伊求叫講，『阿爸，父啊！』彼早起的歡喜佮平常日大各樣^[5]，彼時的快樂到𣍐曉得講。」

儂著得著天使的喙舌，著用西臘冰^[6]的口才，㱏會講明我彼疊歡喜的心情。呵咾上帝，呵咾上帝，伊贖罪的恩典是各樣到極。

保羅滿得著恩到遮深，連鞭愛救別儂，就設法放摔生理的事誌來讀冊，眏望後來通播揚福音的道理。讀冊幾若年到23歲，就得著入傳道的大學。彼疊已經定著的意思，上帝若准，就卜出外去無拜上帝的所在播揚永活的道理。

彼時大美國歸正的教會猶未另外設立公會差儂去外國傳道，是猶故用「美部宣道的公會^[7]」料理即號事。

保羅滿就寫批稟美部會的董事著接納伊，聽候經過大學，得著設立做傳道的牧師，通差伊去播揚福音。彼張批所講的話不止會感激儂的心，我就引幾句來翻譯。已經講伊久久的意思，想著出外去毋知道理的所在，播揚永活的教示，就講，「我本有即號的意思，毋是對心肝浮浮漂漂^[8]來想㱏定著，是對心肝真細膩、斟酌想伊即个事誌......」

......

......

講煞，隨時就去「斯理瑪」𢙠兜佮伊行禮，相合坐落，講起伊所夢見的事誌予𢙠伯聽。講，「我夢見我已經過往。身屍予儂埋，靈魂無死猶佇咧。故夢見一支大天平，是金的。天平柱懸到抵天。我徛佇遐，有神卜來評我一生所行的好否。好的卜下佇正爿的平碗^[9]，否的下佇倒爿的平碗。若是好的較有重，就天使卜扶我去天堂，若是否的較重，就魔鬼卜拖我到地獄。故看見魔鬼的面真雄，真否看，目睭金爁爁，親像著火的塗碳。」

𢙠伯斯理瑪應講，「汝看見到按呢，敢會予汝驚到喀喀趒，乎？」

「亞利簡」應講，「起頭無到偌大驚，家己想平時所行無甚物大毋著，通城的儂無儂會值得我遐敬虔，𠢕守戒律。家己想無甚物否事通下佇倒爿的平碗。所以彼疊我㱏無驚，然後越頭看見一陣烏烏、盡猛的鬼，逐个金金相我，㱏知驚。」

斯理瑪故問講，「以外，猶有夢見無？」

應講，「有啊。故夢見一陣烏的鬼，行倚到天平，逐个咧擔一擔真重的烏物。遐个烏物就是我坫世間的時，所行的罪過。我咧看的時有三項予我真奇怪，就是奇怪遮个烏物到遮濟，到遮大，亦到遮重！我所掠做無要緊的事，當看有盡重的濟。鬼逐个到，就摒伊所擔的佇倒爿的天平碗。彼平碗連鞭墜落到盡下。撒旦^[10]就越頭相我，想的確卜掠我。撒旦就吩咐故一陣否鬼講，『亞利簡所捌講的否話，著擔來。』我彼時實在大昂愕^[11]，攏無拍算我捌講到遐濟否話。有時捌發受氣，講出否話，總是無掠做要緊的事。彼號的否話親像烏的種籽，有的大粒，有的細粒，逐粒盡重。真濟鬼咧擔來，逐个譏刺我，行進前，摒𢙠所擔的否話佇倒爿的天平碗。我就記得俗語講，『骹跋倒，會撆起來；喙講出，𣍐故收倒轉』。」

斯理瑪就講，「耶穌的話比俗語是故較好。伊捌講，『我共恁講，講話濫糝，的確佇受審判的日，予上帝審判。因為照汝的話就稱義；亦照汝的話就擬罪。』《馬太》（12:36,37）」

亞利簡吐氣講，「我敢有捌講一萬句否話攏𣍐算得。倒爿的天平碗重到卜落地獄。唉啊！到按呢猶未了，猶有較慘的事，就是彼時撒旦故大聲吩咐講，『亞利簡否的念頭，著擔來！』聽即句，我故吐氣講，『唉啊！念頭亦著受監察嘛？』」

斯理瑪應講，「聖冊有記載，否的念頭是對心起，這是毣^[12]垃儳的儂。」《馬太》（15:18,20）

亞利簡講，「鬼隨時擔來，遮个否的念頭照目睭看是親像烏煙，總是大大無同，因為烏煙是輕輕，否的念頭真正重。鬼摒佇倒爿的天平碗，予彼碗落故較下，到入一个深淵。深淵吐出火舌佮烏薰。彼時我險險失望，忽然記得我所行的好事猶未予伊評。我想好事......穩當濟濟就大聲叫天使講，『好事著緊緊擔來！我所捌賑濟儂，所捌禁食，遮个好事著緊猛摒佇正爿的天平碗。』我想即疊正爿的天平碗的確比倒爿的較重，予倒爿懸懸，正爿下下。」

天使幾若个慢慢來，逐个咧擔一擔白的物。頭前的天使開喙講，「儂行好事因為愛歸榮光上帝，彼號事算是重，若行好事愛得做功勞，彼號事就算是輕，親像鳥毛。汝一生所行的好事阮咧擔是輕輕。」

講煞，天使逐个摒𢙠所擔的白物佇正爿碗。遐个特實在輕，天爿攏無一點仔振動。苦啊！我所禁食佮賑濟儂，遮个事攏歸佇無。

故想，我平時祈禱彼節事猶未擔來評，就求叫天使講，「我祈禱的事！我祈禱的事！著緊緊擔來。我一日祈禱有五擺，已經祈禱遮濟年，按呢遮个祈禱事的確有過頭重。」我對天使講了彼時予我大奇怪，𣍐明白，因為看見遐个天使將我的白白祈禱事交予烏鬼。遐个烏鬼一个來出手卜擔，摸了白的連鞭變做烏，就擔去摒落倒爿天平碗。

斯理瑪講，「彼个情形怎樣按呢，我卜共汝講，的確是對祈禱上帝無誠實無敬虔。喙祈禱，心褻瀆，外皮敬畏，內心驕傲，就是拍垃儳上帝聖名，親像犯著第三條聖的戒命，所以𣍐算得是好，反轉算是否。天使㱏無來共汝擔，獨獨有叫遐个烏鬼來共汝擔，予汝知汝一生祈禱上帝𣍐算得是好。亞利簡啊！汝有故夢見甚物？」

應講，「有，夢見否鬼來掠我彼時驚到睏醒。父啊！毋知捌聽見儂夢見否夢到按呢嘛？」

斯理瑪應講，「精神的時，我捌想即號的道理，捌看我所行所講所想攏總予上帝審判。有一節聖冊予我驚到矍矍掣^[13]，就是上帝評理，知汝有欠缺。（《但》5:27）我攏無一節好事通落佇正爿的天平碗。亞利簡啊！我想按呢就求叫，『上帝啊，著憐憫我有罪的儂！』」

亞利簡問講，「按呢世間儂攏無通眏望嘛？敢無甚物重的特通落佇正爿的碗，予倒爿會較輕毋使落地獄？」

斯理瑪應講，「感謝上帝！感謝上帝！毋使失望，我捌看見耶穌的寶血一點滴佇正爿的天平碗。一點比倒爿碗所貯的否較重。倒爿連鞭起盡懸。我的罪攏無去，永永無去，𣍐故再看。心大歡喜叫講，『上帝的囝耶穌基督的血洗除攏總的罪。』」

亞利簡就講，「斯理瑪啊！汝敢是做耶穌的學生？」

應講，「是啊，聖冊佮良心斟酌教示我，予我知儂的罪是重重，若無耶穌的功勞通下佇正爿的天平碗，儂就無通眏望。」

尾註