Tâng-oaⁿ ê siau-sit.

(Lîm Chì-sêng siá ê.)

Tâng-oaⁿ ê sèng-hōe 17 nî chêng tùi Ē-mn̂g Tek-chhiū-kha ê Tông-hōe hun-ki, khí-thâu chīn heng-ōng; nā-sī chōe-chōe lâng m̄-sī chai chōe, ài hō͘ Kiù-chú kiù in thoat-lī chōe-ok ê tiong-ng, lâi tit-tio̍h éng-oa̍h ê hok-khì. Bô jōa kú, chōe-chōe lâng lī-khui tō-lí, cha̍p-gōa nî lâi chhin-chhiūⁿ tit-beh ta ê ki. Nā-sī Siōng-tè bô pàng-sak i ê kàu-hōe, kî-tiong ia̍h ū sêng-si̍t ê lâng.

Tùi Tāi-hōe tiāⁿ-tio̍h, ta̍k-ge̍h tê-jī lé-pài chòe kî-tó-hōe, thòe léng-sim ê kàu-hōe kî-tó, tùi hit-sî í-lâi Tâng-oaⁿ ê kàu-hōe ū tit-tio̍h Siōng-tè ê kà-sī, tāi-ke ū lio̍h-lio̍h-á khah chìn-pō͘.

Kàu kin-nî tit-tio̍h Thiⁿ-pē koh-khah tōa ê un. Poeh-ge̍h 14·ji̍t Tāi-hōe lâi chū-chi̍p tī chia, lia̍t-ūi ê bo̍k-su, sian-siⁿ, siū Sèng-sîn thok-tiōng, ēng sèng-keng ê tō-lí lâi bián-lē goán, chèng hiaⁿ-tī chí-bē chhin-chhiūⁿ thiaⁿ só͘ m̄-bat thiaⁿ-kìⁿ ê, khòaⁿ só͘ m̄-bat khòaⁿ-kìⁿ ê, sim-lāi siū kám-kek, lio̍h-lio̍h-á chai, hō͘ thoân-tō ê lâng chia̍h Bí-kok ê bê, chòe Tâng-oaⁿ ê kang, sī goán ê bô chīn pún-hūn.

Ū chi̍t lâng pún-jiân chi̍t nî ū tôe 2 kho͘ pòaⁿ gûn, siū Tāi-hōe ê bián-lē, taⁿ beh tôe 10 kho͘. Sui-jiân bô put-chí chōe, nā-sī i sī chòe sió-khóa seng-lí ê lāu-lâng. Siat-sú chèng-lâng chhin-chhiūⁿ i ê chìn-pō͘, chiū phèng-chhiáⁿ Bo̍k-su ê sū káⁿ ōe chiâⁿ.

Góan ài chhiáⁿ ta̍k Tông-hōe ê Bo̍k-su Tiúⁿ-ló Chip-sū, Sian-siⁿ, í-ki̍p hiaⁿ-tī chí-bē, tī 9 ge̍h chhoe 10, Lé-pài-ji̍t ê kî-tó-hōe, tâng-sim thòe goán kî-tó, ǹg-bāng Thiⁿ-pē si-un, hō͘ goán ū la̍t, thang phèng-chhiáⁿ Bo̍k-su lâi kà-sī goán, ín-chhōa goán, kiâⁿ thiⁿ ê lō͘; koh thang kóng-khoah Kiù-chú ê sin-thé, sī sim só͘ goān.

同安的消息

（林至誠^[1]寫的）

同安的聖會17年前對廈門竹樹骹的堂會分支，起頭盡興旺，但是濟濟儂毋是知罪，愛予救主救𢙠脫離罪惡的中央，來得著永活的福氣。無偌久，濟濟儂離開道理，十外年來親像得卜焦的枝。但是上帝無放摔伊的教會，其中亦有誠實的儂。

對大會定著，逐月第二禮拜做祈禱會，替冷心的教會祈禱，對彼時以來，同安的教會有得著上帝的教示，大家有略略仔較進步。

到今年得著天父故較大的恩。八月十四日，大會來聚集佇遮，列位的牧師、先生，受聖神託仗，用聖經的道理來勉勵阮，眾兄弟姊妹親像聽所毋捌聽見的，看所毋捌看見的，心內受感激，略略仔知，予傳道的儂食美國的糜，做同安的工，是阮的無盡本份。

有一儂本然一年有題2箍半銀，受大會的勉勵，當卜題10箍。雖然無不止濟，但是伊是做小可生理的老儂。設使眾儂親像伊的進步，就聘請牧師的事敢會成。

阮愛請逐堂會的牧師、長老、執事、先生，以及兄弟姊妹，佇9月初10，禮拜日的祈禱會，同心替阮祈禱，眏望天父施恩，予阮有力，通聘請牧師來教示阮，引抴阮，行天的路，故通廣闊救主的身體，是心所願。

尾註