Lūn-hoe.

(An Ko͘-niû siá--ê)

Lán lâng só͘ chia̍h lâi iúⁿ-chhī seng-khu, kap só͘ tio̍h iúⁿ-chhī hoe-ba̍k·ê bô saⁿ-tâng. Lâng só͘ chia̍h ê, sī gō͘-kak chháu-chhài hî bah hit-hō, chiàu-kò͘ hoe-ba̍k·ê, sī thô͘-soa, pùn-sò, pûi, chúi. Siat-sú khau chi̍t-châng khí-lâi, i ê kun ū liâm thô͘, che sī teh suh thô͘-khì hō͘ i tōa-châng. Hoe-ba̍k khah chōe lóng sī án-ni, iáu-kú ū chi̍t-hō put-chí chhut-kî·ê sī oē chia̍h bah. Tī Hoe-kî-kok ū chi̍t-hō ê chháu miâ kiò Hô͘-sîn-tauh, sī in-ūi i oē tauh hô͘-sîn, só͘-í chiah hō-chòe chit-ê miâ. I ê hio̍h ū mng chhì-chhì, nā ū hô͘-sîn pe lâi hioh tī i ê hio̍h, kha̍p-tio̍h i ê chhì, chiū liâm-piⁿ kńg-lian ha̍p-oá lâi tauh i, lio̍h-á chhin-chhiūⁿ ùi-ngiau-chháu chóng-sī bô siâng-lūi. Thêng kúi-ji̍t hio̍h koh khui, hô͘-sîn chiū bô·khì. Taⁿ hô͘-sîn cháiⁿ-iūⁿ bô·khì? Tio̍h tāi-seng lâi siūⁿ lâng só͘ chia̍h lo̍h pak-tó͘ āu-lâi chiū cháiⁿ-iūⁿ? Kìⁿ só͘ chia̍h ê put-lūn sím-mi̍h mi̍h nā bô iûⁿ bōe-oē iúⁿ-chhī seng-khu, ta̍k lâng ê pak-tó͘-lāi ū chi̍t-hō ê chiap oē iûⁿ i só͘ chia̍h ê mi̍h, án-ni kiò siau-hòa. Chit-hō hoe ia̍h sī án-ni, i ê hio̍h kńg-lian lâi chiū chhut-chiap, hō͘ hô͘-sîn siau-hòa chiah lâi pôe-ióng i tōa-châng.

Tī Tiong-kok gōa-kok chōe-chōe só͘-chāi ū chi̍t-hō hoe miâ kiò Ji̍t-lō͘-chu, hō͘ i án-ni sī in-ūi i ê hio̍h ū siⁿ liâm-liâm ka-ka ê chiap, ji̍t chhut pha̍k-tio̍h chiū hio̍h-téng chiah chhut chi̍t-lia̍p chi̍t-lia̍p kim-kim îⁿ-îⁿ chhin-chhiūⁿ chu. Hô͘-sîn pe lâi hioh, chiū hō͘ i liâm-tio̍h, chiah chiong lō͘-chu kek i sí. Koh ū chi̍t-hō hoe miâ kiò Chúi-pân-hoe, in-ūi khui hoe-lúi kap chúi-pân saⁿ chhin-chhiūⁿ. Hit-ê pân-kháu kng ku̍t-ku̍t, hô͘-sîn pe lâi hioh hia khiā bōe tiâu chiū chhū lo̍h hoe-pân-lāi hō͘ chiap kek sí.

Taⁿ cháiⁿ-iūⁿ hô͘-sîn m̄ pe-cháu? Sī ū nn̄g-hāng, chi̍t-hāng chai hit-hō hoe ê chiap kek liâm, koh chi̍t-hāng hit-hō chiap ê khì-bī bô ha̍p tī hô͘-sîn phīⁿ, phīⁿ-tio̍h chiū liâm-piⁿ hîn-gōng poa̍h-lo̍h-khì. Chit-hō Chúi-pân-hoe ū tōa-pún, sió-pún ê hun-piat, sió-pún ê chiū-sī chiàu téng-bīn lio̍k-sio̍k só͘ kóng ê khoán-sit, nā-sī tōa-pún·ê sī tōa koh-iūⁿ, in-ūi m̄-nā oē chia̍h hô͘-sîn báng-á liân sòe chiáu-á thâng-thōa ia̍h oē chia̍h·khì.

Ū lâng ài chhì-khoàⁿ chit-hō hoe chia̍h bah á m̄-sái, chiū kéng chi̍t-tè hô͘-sîn báng-á bōe kàu ê só͘-chāi chiong kúi-châng kan-ta ak chúi, kúi-châng ak-chúi iā chhī bah. Hiah-ê chhī bah ê phauh-lauh koh bō͘-sēng, kan-ta ak chhúi ê koa-sò sí-sí·khì.

Tùi án-ni chiah chai hit-hō hoe tio̍h chia̍h bah chiah oē oa̍h.

論花

（安姑娘寫的）

咱儂所食來養飼身軀，佮所著養飼花木的無相同。咱所食的，是五穀、草菜、魚、肉彼號，照顧花木的，是塗沙、糞埽、肥、水。設使摳一欉起來，伊的根有粘塗，這是咧嗍塗氣予伊大欉。花木較濟攏是按呢，猶拘有一號不止出奇的是會食肉。佇花旗國有一號的草名叫胡蠅錔^[1]，是因為伊會錔胡蠅，所以㱏號做即个名。伊的箬有毛^[2]刺刺，若有胡蠅飛來歇佇伊的箬，磕著伊的刺，就連鞭捲蔫^[3]合倚來錔伊，略仔親像畏蟯草^[4]總是無𫝛類。停幾日箬故開，胡蠅就無去。當胡蠅怎樣無去？著事先來想儂所食落腹肚後來就怎樣？見所食的不論甚物物，若無烊𣍐會養飼身軀，逐儂的腹肚內有一號的汁會烊伊所食的物，按呢叫消化。即號花亦是按呢，伊的箬捲蔫來就出汁，予胡蠅消化來培養伊大欉。

佇中國外國濟濟所在有一號花名叫日露珠^[5]，號伊按呢是因為伊的箬有生粘粘膠膠的汁，日出曝著就箬頂㱏出一粒一粒金金、圓圓親像珠。胡蠅飛來歇，就予伊粘著，㱏將露珠激伊死。故有一號花名叫水瓶花^[6]，因為開花蕊佮水瓶相親像。彼个瓶口光滑滑,胡蠅飛來歇遐徛𣍐櫥就跙落花瓶內予汁激死。當怎樣胡蠅毋飛走？是有兩項，一項知彼號花的汁極粘，故一項彼號汁的氣味無合佇胡蠅鼻，鼻著就連鞭眩戇^[7]跋落去。即號水瓶花有大本、小本的分別，小本的就是照頂面略俗所講的款式，但是大本的是大各樣，因為毋但會食胡蠅、蠓仔，連細鳥仔蟲豸亦會食去。

有儂愛試看即號花食肉抑毋使，就揀一帶胡蠅、蠓仔𣍐到的所在將幾欉乾焦沃水，幾欉沃水也飼肉。遐个飼肉的博博^[8]故茂盛，乾焦沃水的柯燥死死去。

對按呢㱏知彼號花著食肉㱏會活。

尾註