(Tīⁿ Hoat-le̍k Bo̍k-su siá ê.)
Phoe kià hō͘ Chiang-choân Tāi-hōe sio̍k lia̍t-ūi hiaⁿ-tī chí-bē chai.
Chí poeh-ge̍h cha̍p-sì ji̍t Tāi-hōe chū-chi̍p tī Tâng-oaⁿ lé-pài-tn̂g, ū phài Oa̍t Iok-hān, N̂g Hô-sêng, Ngô͘ Pòe, Lô͘ Liông, kap góa tio̍h khì kok tông-hōe cha-chhat kàu-hōe ê heng-ōng soe-bî, lâi hê-hok mê-nî chhun-hōe. Goán í-keng chū-chi̍p gī-lūn, phòe-tiāⁿ só͘-chāi, phah-sǹg tī cha̍p-it cha̍p-jī ge̍h, lóng oē kàu-ūi, só͘ beh chhâ ê,--
1. Kok-lâng ê kiâⁿ-chòe. Chiū-sī kap sè-sio̍k-lâng kau-pôe, kap sìn Chú ê lâng lâi-óng, í-ki̍p kap ke-lāi lâng ê saⁿ khoán-thāi.
2. Lé-pài ê tāi-chì. Chiū-sī ū chiàu hoat-tō͘ siú lé-pài·bô? Tī ke-lāi chá-àm ū lé-pài·bô? Pún-sin ū siông-siông kî-tó·bô?
3. Ū ji̍t-ji̍t tha̍k Sèng-keng·bô?
4. Ū siat-hoat kàu-tok niá sóe-lé ê sòe-kiáⁿ·bô?
5. Ū thong-ke sìn Chú·bô?
6. Sìn·ê ū siat-hoat lī-ek lâng kiù-lâng·bô?
7. Tng-chit·ê ū chhut-la̍t tī-lí kàu-hōe·bô?
Chiah-ê tāi-chì si̍t-chāi sī kàu-hōe só͘ m̄-thang khiàm·ê. Nā-ū chiah-ê tāi-chì, lâng-gia̍h sui-bóng chió, thang sǹg sī heng-ōng; nā bô án-ni lâng-gia̍h sui-bóng chōe ia̍h sǹg sī soe-bî.
Ǹg-bāng lia̍t-ūi tì-ì pī-pān kàu mê-nî chhun-thiⁿ hō͘ goán thang ēng lín heng-ōng ê hó siau-sit hê-hok Tāi-hōe. Goán bōe kàu ta̍k-keng ê lé-pài-tn̂g, ia̍h bōe siông-sè chhâ-khó, tāk-hāng sī beh thok-tiōng kok-tông jīm-chit·ê, í-ki̍p thoân-tō sian-siⁿ thòe goán cha-chhat, thang hō͘ goán cha-mn̄g. Koh ia̍h tek-khak ū goán só͘ gī-lūn, bô kàu sî-kàu tio̍h chhâ·ê, ia̍h beh sòa lô-hoân Lia̍t-ūi tâng-sim hia̍p-le̍k, goán kàu ê sî thang piān-piān hō͘ goán chai, che sī goán só͘ tōa-tōa ǹg-bāng.
（鄭法力牧師寫的）
批寄予漳泉大會屬列位兄弟姊妹知。
此八月十四日大會聚集佇同安禮拜堂，有派越約翰、黃和成、吳垻、盧良佮我著去各堂會查察教會的興旺衰微，來回覆明年春會。阮已經聚集議論，配定所在，拍算佇十一十二月，攏會到位，所卜查的：
1.各儂的行做。就是佮世俗儂交陪，佮信主的儂來往，以及佮家內儂的相款待。
2.禮拜的事誌。就是有照法度守禮拜無？佇家內早暗有禮拜無？本身有常常祈禱無？
3.有日日讀聖經無？
4.有設法教督領洗禮的細囝無？
5.有通家信主無？
6.信的有設法利益儂，救儂無？
7.當職的有出力治理教會無？
遮个事誌實在是教會所毋通欠的。若有遮个事誌，儂額雖罔少，通算是興旺；若無按呢儂額雖罔濟亦算是衰微。
眏望列位致意備辦到明年春天予阮通用恁興旺的好消息回覆大會。阮𣍐到逐間的禮拜堂，亦𣍐詳細查考，逐項是卜託仗各堂任職的，以及傳道先生替阮查察，通予阮查問。故亦的確有阮所議論，無夠時到著查的，亦卜紲勞煩列位同心協力，阮到的時通便便予阮知，這是阮所大大眏望。