(Iûⁿ Hô-súi siá·ê.)
Hông-san tông-hōe ū nn̄g keng ê lé-pài-tn̂g, chi̍t keng tī Âng-tn̂g-thâu, chi̍t keng tī Tê-soaⁿ.
Cha̍p-poeh nî chêng kap Tek-chhiū-kha hun-ki tùi hit-sî í-lâi kàu-hōe ū tit-tio̍h Siōng-tè koàn-kò͘, chóng-sī kúi nî kàu-hōe bô sím-mi̍h chìn-pō͘. Lâng-gia̍h bô lōa-chōe, kî-tiong siū-kìm ê chhit poeh lâng bô sím-mi̍h hián-bêng hoán-hóe ê pîn-kù, ia̍h sìn Chú ê chió-chió thong-ke kui Chú. Koh kàu-hōe tú-tio̍h īⁿ-toan ê kiáu-jiáu, kàu-hōe-lāi·ê ê kiáⁿ-jî, ū-ê pōe-biū khì ji̍p Thian-chú-kàu, si̍t-chāi hō͘ goán iu-būn; m̄-ta̍t-nā án-ni goán la̍k nî chêng ū pī-pān phèng-chhiáⁿ Bo̍k-su ê sū, í-keng pín Tāi-hōe, Tāi-hōe ū ún-chún ia̍h ū phài lâng lâi chhâ kàu thò-tòng thang chhiáⁿ, āu-lâi hoán-tńg bô chiâⁿ. Só͘-í goán tōa kiàn-siàu. Taⁿ kai-chài ū koh tit-tio̍h Siōng-tè tōa si-un, in-ūi chit-pang Chhiu-hōe chū-chi̍p tī Tâng-oaⁿ ū tōa lī-ek Tâng-oaⁿ ê tông-hōe hō͘ in him-bō͘ tio̍h chhiáⁿ Bo̍k-su ê pún-hūn, tì-kàu kek-tio̍h goán Hông-san ê tông-hōe.
Hiān-sî goán teh kè-bô͘ ài phèng-chhiáⁿ Bo̍k-su, thang lâi kà-sī goán, ǹg-bāng hō͘ Ki-tok ê sin-thé khah khui-khoah. Goán chit-tia̍p ū tôe 160 gōa kho͘ iáu-kú che m̄-sī chōe. Góa kóng chiah-ê sī ài chhiáⁿ kok tông-hōe ê Sian-siⁿ kap hiaⁿ-tī chí-bē thòe goán kî-tó hō͘ goán chhiáⁿ Bo̍k-su ê sū ōe-tit kín chiâⁿ, bián-tit koh-chài kiàn-siàu, sī sim só͘ goān.
Thong-ti sio̍k Tāi-hōe ê Bo̍k-su, Thoân-tō, kap Sian-siⁿ tāi-ke chai. Chí poeh-ge̍h Thoân-tō-khó ê sî, Bo̍k-su saⁿ-kap gī-lūn, siūⁿ hiān-sî bē sìn ê lâng chin-chōe, nā-sī chòe Chú ê kang ê lâng put-chí chió, m̄-chai tio̍h cháiⁿ-iūⁿ siat-hoat tit-tio̍h lâng chōe-chōe lâi chòe Chú ê kang, chiū chhiáⁿ Tek-chhiū-kha ê Bo̍k-su Tīⁿ Sian-siⁿ pī-pān kúi kù ōe kàu Thoân-tō-hōe ê sî lâi kóng.
Tīⁿ Sian-siⁿ ài chèng Bo̍k-su Thoân-tō Sian-siⁿ khòa-sim siūⁿ chit-ê tāi-chì, koh kî-tó Siōng-tè, ǹg-bāng chū-chi̍p ê sî chiū-sī 11·ge̍h, 23·ji̍t, Sèng-sîn tōa kàng-lîm, pang-chān tāi-ke kî-tó saⁿ-kap gī-lūn saⁿ chí-sī saⁿ bián-lē chit-ê ke̍k-tōa iàu-kín ê tāi-chì.
Tē-jī koàn ū kóng-khí Āu-po͘ ê kàu-hōe beh khí lé-pài-tn̂g ū tit-tio̍h 400 kho͘, iáu khiàm 100 gōa kho͘, Tek-chhiū-kha ū chi̍t-ê chí-bē khòaⁿ án-ni chiū ài pang-chān, í-keng ū tôe 1 kho͘. Iáu-ū sím-mi̍h lâng ài o̍h i bô͘-iūⁿ á-bô?
（楊和水[1]寫的）
洪山堂會有兩間的禮拜堂，一間佇洪塘頭[2]，一間佇地山[3]。
十八年前佮竹樹骹分支，對彼時以來教會有得著上帝眷顧，總是幾年教會無甚物進步。儂額無偌濟，其中受禁的七八儂無甚物顯明反悔的憑據，亦信主的少少通家歸主。故教會拄著異端的攪擾，教會內的囝兒，有的背謬[4]去入天主教，實在予阮憂悶，毋但但[5]按呢，阮六年前有備辦聘請牧師的事，已經稟大會[6]，大會有允准亦有派儂來查到妥當通請，後來反轉無成。所以阮大見笑。當佳哉有故得著上帝大施恩，因為即班[7]秋會[8]聚集佇同安有大利益同安的堂會，予𢙠欣慕著請牧師的本份，致到激著阮洪山的堂會。
現時阮咧計謀愛聘請牧師，通來教示阮，眏望予基督的身體較開闊。阮即疊有題160外箍，猶拘這毋是濟。我講遮个是愛請各堂會的先生佮兄弟姊妹替阮祈禱，予阮請牧師的事會得緊成，免得故再見笑，是心所願。
通知屬大會的牧師、傳道佮先生大家知。此八月傳道考的時，牧師相合議論，想現時未信的儂真濟，但是做主的工的儂不止少，毋知著怎樣設法得著儂濟濟來做主的工，就請竹樹骹的牧師鄭先生備辦幾句話到傳道會的時來講。
鄭先生愛眾牧師、傳道、先生掛心想即个事誌，故祈禱上帝，眏望聚集的時就是11月23日，聖神大降臨，幫贈大家祈禱相合議論、相指示、相勉勵即个極大要緊的事誌。
第二卷有講起後埔的教會卜起禮拜堂有得著400箍，猶欠100外箍。竹樹骹有一个姊妹看按呢就愛幫贈，已經有題1箍。猶有甚物儂愛學伊模樣抑無？
[1] Iûⁿ Hô-súi：楊和水牧師，詳見《聖會報儂名檔》。 ↩
[2] Âng-tn̂g-thâu：洪塘頭，地號名，著是當今廈門市同安區西柯鎮洪塘頭村。 ↩
[3] Tē-soaⁿ：地山，著是當今廈門市集美區兌山社區。原文寫做Tê-soaⁿ。 ↩
[4] pōe-biū：背謬。文中表示反叛。這是文言詞。 ↩
[5] m̄-ta̍t-nā：是m̄-tān-nā㱏著，「毋但但」，著是普通話所講的「不單單」、「不僅」。 ↩
[6] 大會：是指基督教的漳泉大會。同治元年（公元1862年），平平屬長老宗的英國長老公會、美國歸正教會佇漳州石碼白水營（當今漳州市龍海區白水鎮白水村）設立「漳泉大會」，著是共當時閩南漳州、廈門、泉州三所在的所屬堂會相合做「漳泉長老大會」，簡稱「漳泉大會」。光緒十九年（1893年），漳泉大會分做泉屬、漳屬兩大會，設總會佇廈門（稱「長老總會」）。 ↩
[7] chit pang：即班，著是即過、即擺。 ↩
[8] 秋會：也號做秋大會。教會有分春、秋兩季集會，也著是春會佮秋會。 ↩