(Chiap chêng koàn tē 44 bīn.)
"Pài-saⁿ hit ji̍t tio̍h khì chhē pún-tông ê hiaⁿ-tī. Góa siūⁿ hit ji̍t khah khoài, in-ūi góa ê sim put-chí ài kap lâng hô, só͘-í góa khì thàm chōe-chōe lâng.
Kàu ji̍t-tàu tò-lâi, goán hū-jîn-lâng kā góa kóng, 'A-mô͘-sū hit chiah o͘-gû-káng chit-tia̍p chhoàn-ji̍p lán ê ké-chí the̍h, teh lòng-lâi lòng-khì, lî-pa hō͘ i lòng-tó nn̄g phìⁿ.' Góa chi̍t-ē thiaⁿ-kìⁿ sim-hé chiū to̍h. In-ūi hit chiah o͘-gû-káng siông-siông chǹg-ji̍p góa ê hn̂g-lāi. Chit-ê ké-chí the̍h sī sin chai ê, ta̍k châng sī chíⁿ-chíⁿ, lóng tit-beh siⁿ, nā hō͘ i lòng-tio̍h chiū ōe chi̍h liáu-liáu; só͘-í góa put-chí siū-khì, m̄ pàng i soah, bōe kò͘-tit hit ji̍t sī kap lâng hô ê ji̍t, chiū liâm-piⁿ khì in tau kap i jióng. I chiū kia̍h ba̍k siòng góa kóng, 'Chip-sū ah, kin-á-ji̍t kiám m̄-sī tio̍h saⁿ hô ê ji̍t mah?
Hit sî góa thiaⁿ i kóng, hit kù ōe, pí ēng chhiú phah góa khah siong-tiōng, ka-kī kiàn-siàu kàu bô thô͘-khang thang bih, siūⁿ ka-kī thàn tō-lí chiah-nih kú, iáu-bē ōe ka-kī iok-sok chhùi-chi̍h kap sèng-tē."
Hit ē-hng A-mô͘-sū ia̍h kap hōe-chiòng teh chē, thiaⁿ kàu chit kù, chiū chhoàn khí-lâi kóng, "Hiaⁿ-tī ah, góa sòa kóng hō͘ lín thiaⁿ. Hit-sî Ia̍p Chip-sū khì goán-tau thiaⁿ góa kóng hit kù ōe, chiū bô siū-khì, hoán-tńg jīn-chōe kiû sià-bián kóng, 'Chit-ê pháiⁿ sèng-tē sī góa ka-kī ê pháiⁿ hoat-khí·ê, m̄-sī tùi tī tō-lí.' Góa khòaⁿ i án-ni, chai i sī sêng-si̍t sìn Chú ê lâng, hō͘ góa it-hoat kèng i.
Hí Lé-pài-ji̍t chèng-lâng khí-lâi khiā góa m̄ khí-lâi in-ūi phah-sǹg chit-ê sī bô iàu-kín ê tāi-chì, taⁿ chai chi̍t lé-pài kú kiâⁿ hó, sī pí khì sì-cha̍p-káu pái ê kî-tó-hōe koh-khah oh. Kiaⁿ-liáu góa tāi-seng ê sìn Chú sī khang-khang. Taⁿ khòaⁿ chit-ê Chip-sū ê só͘-kiâⁿ, kám-kek góa ê sim, hō͘ góa ia̍h koat-toàn beh chiàu án-ni kiâⁿ." Kóng soah chiū koh chē, thâu-khak àⁿ-lo̍h ēng chhiú ng bīn, chhin-chhiūⁿ tōa hoân-ló ê khoán.
Chāi-chō tiong chi̍t-ê lāu-lâng chiū kóng, "Che sī tio̍h o-ló lán ê Chú." Hōe-chiòng chōe-chōe lâng tùi án-ni siū kám-kek.
Bo̍k-su kóng, "Ia̍p chip-sū chhiáⁿ lí koh kóng." I chiū kóng, "Kàu Pài-sì chá, hit ji̍t ê kî-tó sī in-ūi ta̍k lâng ka-kī ê ke, ia̍h tio̍h kiâⁿ chiàu Sèng-chheh ê kà-sī lâi khoán-thāi ke-lāi ê lâng.
Hit chá-khí beh khí hé khòaⁿ bô chhâ, sī in-ūi góa hāu-siⁿ Iok-sek àm-thâu bô hiahⁿ piān. Góa khui-chhùi siūⁿ beh mē i, tò-hoán siūⁿ tio̍h Bo̍k-su só͘ ín hit chat ê Sèng-chheh kóng, 'Pē m̄-thang kek hō͘ kiáⁿ-jî siū-khì oàn-hūn;' só͘-í góa lóng bô chòe-siaⁿ, ka-kī chēng-chēng chhut-khì hiahⁿ. Hé khí hó chiah khì kiò goán hū-jîn-lâng khí-lâi. I ìn kóng, 'Hāiⁿ! Góa chá-khí thâu-khak thiu-thiàⁿ, hó, góa chiah lâi!'
Góa thiaⁿ-kìⁿ i kóng thâu-khak thiàⁿ, phah-sǹg che sī hū-jîn-lâng ê pêng-siông sū, ta̍k-lâng ōe án-ni, siūⁿ beh án-ni hiâm i, liâm-piⁿ koh siūⁿ tio̍h Sèng-chheh kóng, 'Tiong-hú tio̍h thiàⁿ i ê hū-jîn-lâng m̄-thang khek-po̍k saⁿ khoán-thāi.' Só͘-í chiah tùi i kóng, 'Lí m̄-sái khí-lâi, góa kap cha-bó͘-kiáⁿ lâi-khì chú chiū hó.' Hū-jîn-lâng thiaⁿ-kìⁿ chit kù ōe ba̍k-chiu kim-kim siòng góa ná chhin-chhiūⁿ teh kî-koài, kàu hō͘ góa kiàn-siàu, góa ka-kī siūⁿ, hū-jîn-lâng kap góa tiàm jī-cha̍p gōa nî kú, siông-siông thoa-bôa, taⁿ in-ūi góa kóng chit kù ōe, i siūⁿ-liáu chin kî-koài. Góa chiū chhut-khì chhiūⁿ chúi, koh ji̍p-lâi khòaⁿ-kìⁿ hū-jîn-lâng í-keng khí-lâi teh chhèng han-chû.
Kàu ē-hng ū tú-tio̍h koh-khah kiàn-siàu ê tāi-chì. Chiū-sì ū thiaⁿ-kìⁿ góa ê kiáⁿ Iok-sek teh kā i ê tōa-chí kóng, 'Lāu-pē káⁿ-sī beh sí·lah.' Tōa-chí hiâm i kóng, 'Iok-sek lí siáⁿ-sū án-ni kóng.' I chiū kóng 'In-ūi lāu-pē piàn-khoán, khòaⁿ-kìⁿ kin-á-ji̍t kóng-ōe lóng bô him-hoah, chin un-sûn.' Hiaⁿ-tī ah! Góa thiaⁿ-kìⁿ góa ê kiáⁿ kóng chiah-ê ōe, chiū lâu ba̍k-sái, siūⁿ góa siông-sî ê pháiⁿ-khoán-sit, kin-á-ji̍t chi̍t ji̍t bô him-hoah chiū hō͘ góa ê kiáⁿ-jî phah-sǹg sī hoán-siông beh sí.
Kàu Pài-gō͘. Góa tio̍h khì tiàm-ni̍h khòaⁿ-khòaⁿ cheh, in-ūi chí kúi ji̍t lóng-sī pàng kù-chāi hé-kì khì liāu-lí. Kàu-tè khòaⁿ kúi-nā hāng bô tú-hó, ia̍h bô him-hoah, in-ūi kì-tit chá-ji̍t ê kiàn-siàu.
Koh bô jōa-kú ū chi̍t-ê chun-kùi ê hū-jîn-lâng ji̍p tiàm, ài bóe hoe-pò͘. Góa ū chi̍t phit put-chí súi, chóng-sī chit liâu bô siáⁿ chiâu, ū só͘-chāi pûi, ū só͘-chāi sán. Hū-jîn-lâng bô siông-sè khòaⁿ, kóng kúi phit lóng beh bóe. Góa the̍h chóa beh pau ê sî, hut-jiân siūⁿ-tio̍h Pài-gō͘ chi̍t tiâu sī kóng, 'Lán tio̍h hián-bêng lán sìn Chú ê khoán-sit sī cháiⁿ-iūⁿ.' Góa bīn chiū tńg-âng piàn-sin lâu chhìn-kōaⁿ kóng, 'Chit phit chit liáu bô siáⁿ chiâu, lí ū khòaⁿ siông-sè á bô?' Hū-jîn-lâng chiū m̄ bóe. Hit sî góa ê sim-koaⁿ bô iàu-kín i m̄ bóe, sī iu-būn góa chòe Kiù-chú ê ha̍k-seng m̄-chai ū lōa-chōe pái bat phiàn lâng. Kàu hit ē-hng, góa teh siūⁿ, chi̍t ji̍t kú chòe seng-lí bô phiàn lâng, sī pí chō saⁿ-lí-lō͘ ê chio̍h-chhiûⁿ khah oh. Che sī in-ūi góa chòe seng-lí, nā beh bô phiàn lâng m̄ koàiⁿ-sì.
Kàu Pài-la̍k chá-khí sim-koaⁿ khah pêng-an. Chit ji̍t sī tio̍h thoân tō-lí, hō͘ goán siā·ni̍h bô pài Siōng-tè ê lâng thiaⁿ. Góa siūⁿ kóng tō-lí sī khah khoài, chiū the̍h chi̍t pún Sin-iok, khì chi̍t ê lāu chím-pô in tau. Kàu chiū kā i kóng, 'Chiah-kú hó·mah?' Kóng liáu chiū soah in-ūi m̄-chai tio̍h cháiⁿ-iūⁿ kóng; kan-ta khâm-sàu, thun-nōa, chiah kóng, 'Lāu chím-pô ah, hán-tit khòaⁿ-kìⁿ lí khì lé-pài.'
I ìn góa kóng, 'Tio̍h, góa tī ke-lāi teh kò͘ góa ê tāi-chì.' Góa chiū koh kā i kóng, 'Góa ài chhiáⁿ lí lâi-khì......
（接前卷第44面）
「拜三彼日著去揣本堂的兄弟。我想，彼日較快，因為我的心不止愛佮儂和，所以我去探濟濟儂。
到日晝倒來，阮婦人儂共我講，『阿摩士彼隻烏牛犅即疊竄入咱的果子宅，咧挵來挵去，籬笆予伊挵倒兩片。』我一下聽見，心火就著。因為彼隻烏牛犅[1]常常鑽入我的園內。即个果子宅是新栽的，逐欉是翦翦，攏得卜生，若予伊挵著，就會折了了，所以我不止受氣，毋放伊煞，𣍐顧得彼日是佮儂和的日，就連鞭去𢙠兜佮伊嚷。伊盡揭目[2]相我講，『執事啊，今仔日敢毋是著相和的日嘛？』
彼時，我聽伊講彼句話，比用手拍我較嵩重，家己見笑到無塗空通覕，想家己趁道理遮呢久，猶未會家己約束喙舌佮性地。」
彼暝昏，阿摩士亦佮會眾咧坐，聽到即事，就竄起來講，「兄弟啊，我紲講予恁聽。彼時葉執事去阮兜聽我講彼句話，就無受氣，反轉認罪求赦免講『即个否性地是我家己的否發起的，毋是對佇道理。』我看伊按呢，知伊是誠實信主的儂，予我一發敬伊。
許禮拜日，眾儂起來徛，我毋起來，因為拍算即个是無要緊的事誌，當知一禮拜久行好，是比去四十九擺的祈禱會故較僫。驚了我事先的信主是空空。當看即个執事的所行，感激我的心。予我亦決斷卜照按呢行。」講煞，就故坐，頭殼揞落，用手韞面，親像大煩惱的款。
在座中一个老儂就講，「這是著呵咾咱的主。」會眾濟濟儂對按呢受感激。
牧師講，「葉執事請汝故講。」伊就講，「到拜四早，彼日的祈禱是因為逐儂家己的家，亦著行照聖冊的教示來款待家內的儂。」
「彼早起卜起火，看無柴，是因為我的後生約瑟暗頭無攉便。我開喙想卜罵伊，倒反想著牧師所引彼節的聖冊講『父毋通激予囝兒受氣怨恨』，所以我攏無做聲，家己靜靜出去攉。火起好，㱏去叫阮婦人儂起來。伊應講，『哎！我早起頭殼抽疼，好，我遮來。』」
「我聽見伊講頭殼疼，拍算這是婦人儂的平常事，逐儂會按呢，想卜按呢嫌伊，連鞭故想著聖冊講『丈夫著疼伊的婦人儂，毋通刻薄相款待』，所以㱏對伊講，『汝毋使起來，我佮諸姥囝來去煮就好。』婦人儂聽見即句話，目睭金金相我若親像咧奇怪，到予我見笑。我家己想，婦人儂佮我坫二十外年久，常常拖磨，當因為我講即句話，伊想了真奇怪。我就出去上水，故入來看見婦人儂已經起來咧蒸[3]番薯。」
「到暝昏，有拄著故較見笑的事誌。就是有聽見我的囝約瑟咧共伊的大姊講，『老父敢是卜死啦。』大姊嫌伊講，『約瑟汝啥事按呢講？』伊就講，『因為老父變款，看見今仔日講話攏無噷喝[4]，真溫馴。』兄弟啊！我聽見我的囝講遮个話，就流目屎，想我常時的否款待，今仔日一日無噷喝就予我的囝兒拍算是反常卜死。」
「到拜五。我著去店裡看看一下，因為此幾日攏是放據在夥計去料理。到帶，看幾若項無拄好，亦無噷喝，因為記得昨日的見笑。」
「故無偌久，有一个尊貴的婦人儂入店，愛買花布。我有一匹不止水，總是織了無啥褿，有所在肥，有所在㾪。婦人儂無詳細看，講規匹攏卜買。我摕紙卜包的時，忽然想著拜五一條詩講『咱著顯明咱信主的款式是怎樣。』我面就轉紅，遍身流凊汗講『即匹織了無啥褿，汝有看詳細抑無？』婦人儂就毋買。現時我的心肝無要緊伊毋買，是憂悶我做救主的學生，毋知有偌濟擺捌騙儂。到彼暝昏，我咧想，一日久做生理無騙儂，是比造三里路的石牆較僫。這是因為我做生理，若無騙儂毋慣勢。」
到拜六早起，心肝較平安。即日是著傳道理，予阮社裡無拜上帝的儂聽。我想講道理是較快，就摕一本《新約》，去一个老嬸婆𢙠兜。到就共伊講，『遮久，好嘛？』講了就煞，因為毋知著怎樣講，乾焦㖤嗽[5]、吞瀾，㱏講，『老嬸婆啊，罕得看見汝去禮拜。』
伊應我講，『著，我佇家內咧顧我的事誌』。我就故共伊講，『我愛請汝來去......』......」
......
......