(Ko Tâng-kau siá·ê)
Lâm-oaⁿ 37 to͘ Mn̂g-kháu-tiàⁿ Hîm-soaⁿ téng ū chi̍t keng Hui-hōa giâm. Khí giâm ê sî, Táng-sū hoân-ló soaⁿ koâiⁿ lō͘ kiā, chhù-hiā oh taⁿ, chiah chhut jī-pe̍h siat-kéng kóng, "Bó͘ ji̍t Hîm-soaⁿ Pu̍t-chó͘ beh pe hiā". Sì-hng chōe-chōe lâng khì khòaⁿ. Táng-sū kóng, nā beh khòaⁿ tio̍h soaⁿ-téng, ta̍k lâng thang the̍h tām-po̍h chiūⁿ-khì, tùi án-ni chhù-hiā lóng the̍h chiūⁿ-soaⁿ. Táng-sū kóng, "Taⁿ chhù-hiā lóng tùi soaⁿ-ē pe chiūⁿ soaⁿ-téng lah. Só͘-í hō-kiò Hui-hōa giâm." M̄-chai chit keng sī sím-mi̍h sî khí ê, chóng-sī Bêng-boa̍t Chheng-chho͘ ū hō͘ Tīⁿ Kok-sèng húi, chi̍t sian Koan-im bô lâng ti̍h, Mn̂g-kháu-tàiⁿ ê lâng chiah chhiáⁿ lâi in só͘-chāi.
Tī chí 5·ge̍h bé, Phoh-tau chi̍t-ê ông-lo̍k khì kap chi̍t-ê hê-siūⁿ kè-bô͘, saⁿ-kiⁿ pòaⁿ-mî tiàm soaⁿ-téng pàng-hé, Sin-iâⁿ ê lâng khòaⁿ-kìⁿ kî-koài, soaⁿ-téng cháiⁿ-iūⁿ hô-kong chhàn-lān. Keh chá-khí chiūⁿ khì ......sī hê-siūⁿ tī chia, mn̄g i "Siáⁿ-sū lâi......"....hê-siūⁿ kóng, "Góa tī Kó͘-san-sī teh hoân-ló sè-.....só͘-chāi chheng-hiu, ....., hut-.......kàu chia khòaⁿ-kìⁿ hoat hô-kong, káⁿ-sī pu̍t-chó͘ beh koh heng. Sin-iâⁿ ê lâng sìn·i, chāi-kūn ê lâng hō͘ i bê-khì. (Hit ê hê-siūⁿ sī tī Chio̍h-pu̍t-sī teh kā hê-siūⁿ choh-sit, ū kap hê-siūⁿ oan-ke, chiah thih-thâu lâi Oaⁿ-hái khòaⁿ keng. Āu-lâi ū lâng jīn tit i sī tī Chio̍h-pu̍t-sī, i chiah kóng sī tī Chio̍h-pu̍t-sī chhōa khì. Koh ū ê chai i tī Oaⁿ-hái teh khòaⁿ keng, i chiū kóng sī Oaⁿ-hái chhōa khì.)
I bê-he̍k lâng koh ū nn̄g-hāng, chi̍t hāng kóng i sī tek-tō hê-siūⁿ, ōe chai bē-lâi kè-khì; iā ōe tio̍k-e̍k kóaⁿ-kúi, siáu-ê chiū-kūn·i, i ōe i hó. I hoat sī pa̍k....ni̍h, ēng thô-ki liú-ki lâi sut. Chi̍t hāng......nn̄g bé o͘-chôa chìm-chúi, thái-ko·ê khì lim ōe.....khì. Ū chi̍t-nn̄g ê hò͘ⁿ-sū ê sì-kòe kóng, só͘.....thái-ko·ê, siáu-ê, jōa-hn̄g iā lâi ǹg-bāng i hó. 10 ge̍h chhoe 1, Ē-mn̂g chi̍t-ê siáu·ê, beh khì hō͘ Pu̍t-chó͘ ....hoán-tńg sí tī O͘-chhù-liâu, hiān-sî teh phah koaⁿ-si....
Tùi án-ni ta̍k-ji̍t nā sēng, lâng-bé oe-oe khoeh-khoeh kiâⁿ bô tn̄g, khan lāu-lâng, phō sòe-kiáⁿ, ....phò͘ hn̄g jōa-chá chiu kàu hia. Liân chiam-kha iù-chhiú ê chāi-sek-lú ia̍h bô hiâm lō͘ hn̄g soaⁿ koâiⁿ, kūiⁿ-peh-nì kiâⁿ, chòe sì-kha-káu pê, ji̍t·sî iau-ki sit-tǹg bô iàu-kín, mî·sî hioh tī chhiū-nâ chià-kau iā kam-goān. M̄-nā sù-bîn-ka ê lâng hō͘ i bê-he̍k, chiū kú-jîn chìn-sū ia̍h hō͘ i ín-iú. Hāi ah! Lâng cháiⁿ-iūⁿ kàu chiah gōng ah!
Thiaⁿ-kìⁿ kóng tôe ū chi̍t nn̄g bān gûn beh chòe khí giâm ê lō͘-ēng. Tī 8·ge̍h 26·ji̍t chiūⁿ-niû, hit ji̍t Hēng-the̍h kap Niá-thâu ûi pâi chē-toh oan-ke saⁿ-thâi, kong-chhin chhú-hô. Kóng "Lín sī tâng-chong (nn̄g siā lóng sìⁿ Lū,) ia̍h-sī pîⁿ-pîⁿ ho̍k-sāi pu̍t-chó͘ m̄-thang oan-ke." Tùi án-ni chiū soah, saⁿ hô-hó.
Hê-siūⁿ kap Táng-sū put-chí hó khoán-thāi lâng ia̍h siat-hoat chiàu-kò͘ hn̄g ê lâng, ū lâng chhut-gûn khí chhù, ū lâng chhut bí, ū lâng chhut phē, beh hō͘ hiah-ê lâng.....
（高同交[1]寫的）
南安37都門口店[2]熊山[3]頂有一間飛瓦巖[4]。起巖的時，董事煩惱山懸路崎，厝瓦僫擔，㱏出字白[5]設景[6]講「某日熊山佛祖卜飛瓦」，四方濟濟儂去看。董事講，若卜看，著山頂，逐儂通摕淡薄上去。對按呢，厝瓦攏對山下飛上山頂啦。所以號叫「飛瓦巖」。毋知即間是甚物時起的，總是明末清初有予鄭國姓[7]毀，一身[8]觀音無儂挃，門口店的儂㱏請來𢙠所在。
佇此5月尾，樸兜[9]一个王祿[10]去佮一个和尚計謀，三更半暝坫山頂放火，新營[11]的儂看見奇怪，山頂怎樣河光[12]燦爛。隔早起，上去......是和尚佇遮，問伊「啥事來......」......和尚講，「我佇鼓山寺咧煩惱世......所在清幽[13]......忽......到遮看見發河光，敢是佛祖卜故興。」新營的儂信伊，在近的儂予伊迷去。（彼个和尚是佇石佛寺[14]咧共和尚作穡，有佮和尚冤家，㱏剃來安海[15]看宮[16]。後來有儂認得伊是佇石佛寺，伊㱏講是佇石佛寺抴去。故有的知伊佇安海咧看宮，伊就講是安海抴去。）
伊迷惑儂故有兩項，一項，講伊是得道和尚，會知未來過去，也會逐疫趕鬼，痟的就近伊，伊會醫好。醫法是縛......裡，用桃枝、柳枝來摔。一項......兩尾烏蛇浸水，體瘑[17]的去啉會......去。有一兩个好事的，四界講，所......體瘑的、痟的，偌遠也來，眏望醫好。（10月初1，廈門一个痟的，卜去予佛祖......反轉死佇烏厝寮[18]，現時咧拍官司......）
對按呢，逐日若盛，儂馬挨挨夾夾，行無斷，牽老儂，抱細囝，......鋪[19]遠，偌早就到遐。連尖骹幼手的在室女[20]亦無嫌路遠、山懸，強撆躡[21]行，做四骹狗爬，日時枵饑失頓無要緊，暝時歇佇樹林蔗溝也甘願。毋但庶民家的儂予伊迷惑，就是舉人、進士亦予伊引誘。害啊！儂怎樣到㱏戇啊！
聽見講，題有一兩萬銀卜做起巖的路用。佇8月26日上樑[22]，彼時，杏宅[23]佮嶺頭[24]圍排坐桌冤家相刣，公親[25]取和。講「恁是同宗......（兩社攏姓呂），亦是平平服侍佛祖，毋通冤家。」對按呢就煞，相和好。
和尚佮董事不止好款待儂，亦設法照顧遠的儂，有儂出銀起厝，有儂出米，有儂出被，卜......予遐个儂......
......
[1] Ko Tâng-kau：高同交。詳見《聖會報儂名檔》。 ↩
[2] Mn̂g-kháu-tàiⁿ：門口店，當今是南安市水頭鎮文斗村門口店。店，唸做「tàiⁿ」是南安水頭、石井、晉江東石、同安（含集美、翔安）、金門縣、安溪縣即片的腔，學界共即个聲韻算是「同安腔」。 ↩
[3] Hîm-soaⁿ：熊山，當今屬佇福建南安市水頭鎮的一座山。 ↩
[4] Hui-hōa-giâm：飛瓦巖，佇當今泉州南安市水頭鎮新營村的熊山頂。瓦，唸做「hōa」是南安水頭鎮在地的腔口，屬泉州音。 ↩
[5] jī-pe̍h：字白，著是告示、貼佇壁頂卜引儂來看的紙條。 ↩
[6] siat-kéng：設景，著是設局騙儂。設景，近義詞，佇當今漳州話有講「創景」，當中含義著是騙儂、創治儂。 ↩
[7] Tīⁿ Kok-sèng：鄭國姓，著是國姓爺鄭成功。 ↩
[8] sian：身，量詞，是咧講親像尪佛、尪仔即號的。漳州話講「sin」。 ↩
[9] Phoh-tau：樸兜，著是佇當今南安市水頭鎮樸里村樸兜社。 ↩
[10] ông-lo̍k：王祿，著是所講的「王祿仔仙」，規日毋做正經事誌，四界行四界騙食。 ↩
[11] Sin-iâⁿ：新營，著是當今泉州南安市水頭鎮新營村。 ↩
[12] hô-kong：河光，意思是自然界的溪河抑是山佇咧暗暝的時陣所發出來的光環佮靈氣。 ↩
[13] chheng-hiu：清幽，清爽故安靜。 ↩
[14] Chio̍h-pu̍t-sī：石佛寺，佇當今泉州晉江市金井鎮塘東村東爿的卓望山頂。又故號做「西資巖寺」。 ↩
[15] Oaⁿ-hái：安海，當今泉州晉江安海鎮。 ↩
[16] 看宮：著是顧宮廟，做廟公。 ↩
[17] thái-ko：體瘑，是「麻瘋」，英語「Leprosy」。總是，體瘑猶有表示「腌臢」，或普通話「猥瑣」的意思。 ↩
[18] O͘-chhù-liâu：烏厝寮，著是當今南安市水頭鎮山前村烏厝寮社。 ↩
[19] phò͘：鋪，路程近遠的量詞。一鋪路，是五公里遠。 ↩
[20] 在室女：未嫁翁、未行房的諸姥囡仔。 ↩
[21] kiūⁿ-peh-nì：強撆躡，著是「勉強家己」去做某物事誌的意思，毋是甘願做，總是無做故𣍐使得。 ↩
[22] chiūⁿ-niû：上樑，起厝的時陣，揣吉時好日安厝脊大樑的例俗。 ↩
[23] Hēng-the̍h：杏宅，著是當今南安市水頭鎮南僑村杏宅社，社里主姓是呂。 ↩
[24] Niá-thâu：嶺頭，著是當今南安市水頭鎮曾嶺村嶺頭社，社里主姓是呂。 ↩
[25] kong-chhin：公親，出面來調解事主雙方矛盾的儂。 ↩