圖像

1 / 1

− 100% +

✕

Ē-mn̂g Pôe-tek siā.

(Chiap chêng-tiuⁿ tē 5 bīn,)

Tùi hit-sî sò͘ kà ê hoat-tō͘ chiàu chhù-sū chiām-chiām chiâⁿ, chóng-sī kà ūi ū khah-chá teh kiâⁿ.

Só͘ kà ê chhin-chhiūⁿ ê-tóe.

Pài-it ē-po͘, ū kà I-hoat. (Lô Toan-chong, Ia̍p Chì-sêng.)

″ ″ ē-hng, ″ ″ Tē-lí. Pit sian-siⁿ.

Pài-jī ē-hng, lóng-chóng chū-chi̍p iā kóng iā piān.

Pài-saⁿ ē-po͘, ū kà Ūi. Mûi Ko͘-niû.

″ ″ ē-hng, ″ ″ Soàn-hoat. Gio̍k-oá.

Pài-sì ē-po͘, ″ ″ Eng-kok ōe. Chu sian-siⁿ.

Pài-gō͘ ″ ″ ″ ″ Koaⁿ-ōe. Ia̍p Io̍k-lîn.

Pài-la̍k ″ ″ ″ ″ Eng-kok ōe. Gê Bûn-péng.

Pài-jī ē-hng ta̍k pái ū thok-tiōng lâng gī-lūn ū lī-ek ê tāi-chì, á-sī saⁿ-kap piān-lūn sím-mi̍h sū-lí, iā sī saⁿ-kap kau-pôe, koh hit ē-hng siā-gōa ê lâng iā thang lâi khòaⁿ. Pài-gō͘ ē-hng sī chhut-chāi ta̍k lâng kàu i ê lé-pài-tn̂g kî-tó.

Ta̍k ē-hng 8 tiám cheng ū chiām-sî ê kî-tó-hōe chiū-sī táng-sū lûn-liû chú-lí.

Sin-bûn-chóa ū kúi-nā hō, chiū-sī Ji̍t-pò, Lé-pài-pò, iā Ge̍h-pò. Koh teh pī-pān lōa-chōe chheh, ǹg-bāng ná kú ná chōe. Siat-sú ū pêng-iú ài tôe chîⁿ pang-chān bóe chheh iā thang. Í-keng ū bo̍k-su kap pêng-iú ū tôe 110 kho͘ bóe lāi-bīn ê ke-si kap chheh. Siàu-liân lâng pún-sin iā ū chhut-la̍t. Sui-bóng bē thang kóng ū chū-li̍p, iáu-kú ǹg-bāng ōe chiām-chiām chiâⁿ hit-ê tāi-chì. Só͘ ǹg-bāng iā ū koh khah tōa ê ì-sù, chiū-sī ǹg-bāng chit ê siā ná tōa chiâⁿ, kàu sî ōe kham-tit kap gōa-kok ê siā saⁿ-liân, tì-kàu siang pêng ke tit-tio̍h tōa lī-ek. Lán chai thiⁿ-ē chōe-chōe só͘-chāi ê siàu-liân lâng ū tōa hia̍p-le̍k saⁿ chiàu-kò͘; saⁿ-kap tí-tng siàu-liân lâng só͘ tú-tio̍h tāng ê chhì-liān, taⁿ chai chit-ê tāi-chì sī kàu-gia̍h thang chòe lán tōa ê bián-lē. Siàu-liân lâng ê êng-kng sī in ê khùi-la̍t, khó-sioh sì-bīn ū chōe-chōe tōe-hām hō͘ bô siūⁿ ê lâng poa̍h-lo̍h-khì, phah-sǹg in ê khùi-la̍t hòe-bô in ê cheng-sîn, tì-kàu in ê êng-kng kap chun-kùi lóng phah-bô-khì. Só͘-í tit-tio̍h chit hō ê ki-hōe hō͘ lâng láu-si̍t kian-kò͘ ê sim-chì, ióng-kiāⁿ tám-le̍k; iā koh bô sit-lo̍h un-jiû saⁿ thé-thiap ê sim, che sī cha̍p-hun pó-sioh ê ki-hōe. Siat-sú siàu-liân lâng ōe chiâⁿ chit hō khoán-sit, in ê la̍t chīn tōa, ōe hāi-chāi kiàn-tì gī kap sêng-si̍t ê chin-lí, ōe khiam-sùn, iáu-kú chīn-tiong tè lán ê Chú Iâ-so͘ Ki-tok ê kha-pō͘. Lán ê Chú bat keng-kè siàu-liân lâng te̍k hāng ê tāi-chì, só͘-í ōe hiáu-tit saⁿ thé-thiap, lîn-bín. Chhòng-chō sè-kan í-lâi bē-bat ū siàu-liân lâng chhin-chhiūⁿ lán ê Chú koâiⁿ-tōa ê tek-hēng. I ê chheng-kiat ta̍k hāng chiâⁿ lâng ê khoán, kap jîn-ài ê tek-hēng chiū-sī tē-it ko-bêng.

Siā ê só͘-chāi chiū-sī Thài-san.

廈門培德社

（接頂張第5面）^[1]

對彼時所教的法度，照次序漸漸成，總是教畫有較早咧行。

所教的親像下底：

拜一下晡，有教醫法。（羅端莊（音）、葉志誠（音））

″″暝昏^[2]，″″地理。（畢先生）

拜二暝昏，攏總聚集也講也辯

拜三下晡，有教畫。（梅姑娘）

″″暝昏，″″算法。（玉倚（音））

拜四下晡，″″英國話。（朱先生）

拜五″″，″″官話。（葉毓麟（音））

拜六″″，″″英國話。（倪文炳（音））

拜二暝昏，逐擺有託仗儂議論有利益的事誌，抑是相合辯論甚物事理，也是相合交陪，故彼暝昏社外的儂也通來看。拜五暝昏是出在逐儂到伊的禮拜堂祈禱。

逐暝昏8點鐘有暫時的祈禱會，就是董事輪流主理。

新聞紙有幾若號，就是日報、禮拜報、也有月報。故咧備辦偌濟冊，眏望乃久乃濟。設使有朋友愛題錢幫贈買冊也通。已經有牧師佮朋友有題110箍買內面的傢俬佮冊。少年儂本身也有出力。雖罔未通講有自立，猶故眏望會漸漸成彼个事誌。所眏望也有故較大的意思，就是眏望即个社乃大成，到時會堪得佮外國的社相連，致到雙爿加得著大利益。咱知天下濟濟所在的少年儂有大協力相照顧，相合抵當少年儂所拄著重的試煉，當知即个事誌是夠額通做咱大的勉勵。少年儂的榮光是𢙠的氣力，可惜四面有濟濟地陷，予無想的儂跋落去，拍算𢙠的氣力廢無𢙠的精神，致到𢙠的榮光佮尊貴攏拍無去。所以得著即號的機會予儂老實、堅固的心志，勇健膽力，也故無失落溫柔相體貼的心，這是十分寶貝的機會。設使少年儂會成即號款式，𢙠的力盡大，會㕢在^[3]建置義佮誠實的真理，會謙遜，猶故盡忠綴咱的主耶穌基督的骹步。咱的主捌經過少年儂逐項的事誌，所以會曉得相體貼、憐憫。創造世間以來，未捌有少年儂親像咱的主懸大的德行。伊的清潔逐項成儂的款，佮仁愛的德行就是第一高明。

社的所在就是泰山^[4]。

尾註