基本信息
- 書刊
- 漳泉聖會報（Chiang-choân Sèng-hōe Pò）
- 卷期
- 1888-7,(1),2
- 年份
- 1888
- 作者
- 打馬字
- 標題
- (欠題目)（(Khiàm tôe-ba̍k)）
(Khiàm tôe-ba̍k)
(Táⁿ-má-jī bo̍k-su siá ê.)
Ti Tāi-eng Lûn-tun kiaⁿ-siâⁿ, kúi-nî chêng ū chi̍t-ê lâng, tōa chhang-miâ, gâu siá-jī chòe sin-bûn; khó-sioh sī put-sìn ê lâng, m̄ pài Siòng-tè, khòaⁿ-khin Sèng-chheh, oàn-hūn hok-im ê tō-lí, biáu-sī Sèng-hōe, ki-chhì Iâ-so͘ ê ha̍k-seng, kóng Sèng-chheh bô-iáⁿ sī Siōng-tè ê be̍k-sī, sī lâng ka-kī chhòng, só͘-í lóng m̄ káng-kiù, m̄ khòaⁿ.
Ū chi̍t ji̍t i teh kiâⁿ-sóa thit-thô siâⁿ-gōa chhân-hn̂g ê tiong-kan khòaⁿ kong-kéng. Kiâⁿ kàu kah-ì, siūⁿ tio̍h tò-tńg-khì, chiū chai ū bê-lō͘, m̄-chai tah-lo̍h chi̍t tiâu tio̍h kiâⁿ. Sì-kòe chhē khòaⁿ ū tú-hó ê lâng thang mn̄g, chiū khòaⁿ-kìⁿ sòe-keng chhù, ū sòe-hàn ê cha-bó͘ gín-á chē mn̂g-kháu teh khòaⁿ chheh. Chiū chiū-kūn cha-bó͘ gín-ná lâi mn̄g lō͘. Cha-bó͘ gín-ná chiū pò i tah-lo̍h chi̍t tiâu tio̍h kiâⁿ. Hit ê lâng chiū koh mn̄g i, "Lí teh khòaⁿ sím-mi̍h chheh?" Ìn kóng, "Sèng-chheh." Hit ê lâng chiū tìⁿ chhìn-chhiò kóng, "He sī gōng ê chheh, lí cháiⁿ-iūⁿ ài khòaⁿ?" Gín-ná khòaⁿ hit ê lâng lām-sám ê khoán-sit, chiū lâu ba̍k-sái, kā i kóng, "Bo̍h-tit ēng chit hō ê ōe lâi kóng Siōng-tè ê chheh; tû chit-ê chheh í-gōa, góa kap goán lāu-bú chit-tia̍p lóng bô pa̍t-mi̍h ê hok-khì." Hit lâng chiū siông-sè mn̄g gín-ná in ke·ni̍h kan-khó͘ ê tāi-chì, tit chai sī sòng-hiong ê ke, lāu-pē sī thàn-chia̍h lâng, chòe phah-chio̍h ê sai-hū. Khó-sioh kúi ji̍t chêng, lāu-pē tī chio̍h-khut-lāi teh chòe-kang ê sî, ū kha̍p-tio̍h put-chí siong-tiōng, chit-tia̍p tiàm tī i-seng-koán, m̄-chai tī-sî ōe koh-chài chòe-kang. Ke-lāi bô pa̍t-lâng thang chòe-kang thàn-chîⁿ, in-ūi lāu-bú ia̍h-sī phòa-pīⁿ tó tī bîn-chhn̂g, to̍k-to̍k chí-ū chit ê cha̍p-it hè ê cha-bó͘ gín-ná thang chiàu-kò͘ i. Chiàu lâng khòaⁿ si̍t-chāi chhiⁿ-chhám lo̍k-phek. Nā-sī chiàu-si̍t ū chi̍t-hāng ê tōa hok-khì, chiū-sī chòe sìn Chú ê ke, ōe hiáu-tit khòaⁿ Sèng-chheh, chai Thiⁿ-pē tek-khak chiàu-kò͘, hō͘ lāu-bú kap cha-bó͘-kiáⁿ siū an-ùi.
Hit lâng hit ji̍t kàu hit keng chhù mn̄g lō͘, ia̍h sī Siōng-tè só͘ pâi-pí ê tāi-chì, beh chiàu-kò͘ chiah-ê óa-khò i ê lâng; in-ūi hit lâng sui-jiân m̄-sìn bô kèng Siōng-tè, iáu-kú ōe thé-thiap lâng ê kan-khó͘. I thiaⁿ-kìⁿ chit-ê gín-ná só͘ kóng in ke·ni̍h ê tāi-chì, chiū khó-lîn i, the̍h-chhut chi̍t ê kim-poa̍t-á (ta̍t tit la̍k-kho͘ gōa gûn) sàng i, hō͘ i thang bóe ke-lāi só͘ khiàm-ēng ê mi̍h.
Siōng-tè m̄-nā chiàu-kò͘ i chit ke sòng-hiong ê peh-sìⁿ, ia̍h ōe kiâⁿ pa̍t-hāng hó ê ì-sù. Hit lâng tò-khì ê sî, lō͘·ni̍h sim teh siàu-liām cha-bó͘ gín-ná lūn Sèng-chheh só͘ kóng ê ōe. Kiâⁿ kàu chi̍t keng chheh-tiàm chiū ji̍p-khì bóe chi̍t pún Sin-iok ê Sèng-chheh, ài khòaⁿ sī kóng sím-mi̍h hō ê tō-lí, ōe an-ùi kan-khó͘ ê lâng, chhin-chhiūⁿ tī hit sòng-hiong ê ke, i tú-á khòaⁿ-kìⁿ ê tāi-chì. Sèng-chheh tòa tò-khì, sòe-sim káng-kiù, chiū put-chí kî-koài, khòaⁿ Sèng-chheh lóng m̄-sī chhin-chhiūⁿ i tāi-seng só͘ phah-sǹg; chiū chhíⁿ-gō͘ ka-kī ê tāng-chōe, lâi sìn Iâ-so͘. Pún tī m̄-sìn ê lâng ê tiong-kan ná chòe-thâu, taⁿ jia̍t-sim ho̍k-sāi Siōng-tè.
(欠題目)
（打馬字牧師寫的）
佇大英國倫敦京城，幾年前有一儂，大聰明，𠢕寫字做新聞，可惜是不信的儂，毋拜上帝，看輕聖冊，怨恨福音的道理，藐視聖會，譏刺耶穌的學生，講聖冊無影是上帝的默示，是儂家己創，所以攏毋講究，毋看。
有一日，伊咧行徙、憩陶城外畻園的中間看光景，行到合意，想著倒轉去，就知有迷路，毋知佗落一條著行。四界揣看有拄好的儂通問，就看見細間厝，有細漢的諸姥囡仔坐門口咧看冊。就就近諸姥囡仔來問路。諸姥囡仔就報伊佗落一條著行。彼个儂就故問伊，「汝咧看甚物冊？」應講，「聖冊。」彼个儂就𩏠[1]凊笑，講「彼是戇的冊，汝怎樣愛看？」囡仔看彼儂濫糝的款式，就流目屎，共伊講「莫得用即號的話來講上帝的冊，除即个冊以外，我佮阮老母即疊攏無別物的福氣。」彼儂就詳細問囡仔𢙠家裡艱苦的事誌，得知是喪兇的家，老父是趁食儂，做拍石的師傅。可惜幾日前，老父佇石窟內咧做工的時，有磕著不止嵩重，即疊坫佇醫生館，毋知底時會故再做工。家內無別儂通做工趁錢，因為老母亦是破病，倒佇眠床，獨獨只有即个十一歲的諸姥囡仔通照顧伊。照儂看實在凄慘落魄。但是照實有一項的大福氣，就是做信主的家，會曉得看聖冊，知天父的確照顧，予老母佮諸姥囝受安慰。
彼儂彼日到彼間厝問路，亦是上帝所排比的事誌，卜照顧遮个倚靠伊的儂，因為彼儂雖然毋信，無敬上帝，猶故會體貼儂的艱苦。伊聽見即个囡仔所講𢙠家裡的事誌，就可憐伊，摕出一个金鈸仔[2]（值得六箍外銀）送伊。予伊通買家內所欠用的物。
上帝毋但照顧伊即家喪兇的百姓，亦卜行別項好的意思。彼儂倒去的時，路裡心咧數念諸姥囡仔論聖冊所講的話。行到一間冊店，就入去買一本《新約的聖冊》，愛看是講甚物好的道理，會安慰艱苦的儂，親像佇彼喪兇的家，伊拄仔看見的事誌。聖冊帶倒去，細心講究，就不止奇怪，看聖冊攏毋是親像伊事先所拍算，就醒悟家己的重罪，來信耶穌。本佇毋信的儂的中間乃做頭，當熱心服侍上帝。