Tē poeh chiuⁿ.
Góa tio̍h thèng-hāu jōa-kú, Iâ-so͘ chiah beh kiù góa?
Má Bo̍k-su siá·ê.
Pêng-iú·ah! Lí ū teh mn̄g, góa tio̍h thèng-hāu jōa-kú Iâ-so͘ chiah beh kiù góa? Chit-hō ê mn̄g bô ha̍p-sit. Lí hoán-tńg tio̍h mn̄g góa beh thèng-hāu jōa-kú chiah kam-goān chiū-kūn Iâ-so͘ hō͘ I kiù góa? M̄-sī I ài beh iân-chhiân sī lí ài. Lí nā chin-chiàⁿ ài-tit Iâ-so͘ kiù lí, lí ê khoán-sit tú-tú sī chhin-chhiūⁿ hit ê lōng-chú, chhut-gōa lām-sám khai i ê ke-hé, ài beh tò-lâi chhē i ê lāu-pē. Hit-tia̍p tò-lâi i chin lún kiaⁿ-kìⁿ lāu-pē m̄ chiap-la̍p i, i chiah iân-lō͘ siūⁿ-lâi siūⁿ-khì khòaⁿ beh kóng sím-mi̍h ōe chiah ōe hō͘ i ê lāu-pē ê sim ōe khah nńg. I kî-si̍t m̄-sái lún kàu án-ni. I kiaⁿ-hiâⁿ sī ke-kang, in-ūi lāu-pē chin pek-chhiat ài-tit i ê hāu-siⁿ tò-lâi, ta̍uh-ta̍uh teh siàu-liām i, koh ta̍uh-ta̍uh tiàm mn̂g-kháu teh liâu-bāng. Chi̍t ji̍t hut-jiân khòaⁿ-kìⁿ i chiū cháu chìn-chêng, phō i ê ām-kún kā i chim-chhùi. Siōng-tè ài-tit tāng-chōe ê lâng hoán-hóe kóe-pìⁿ tò-lâi chiū-kūn I, iā-sī chhin-chhiūⁿ án-ni.
1. Ta̍k-hāng lóng piān,
M̄-thang iân-chhiân,
Siōng-tè pī-pān,
Hok-khì pêng-an,
Siúⁿ-sù sè-kan,
Chhiong-chiok bû-hān,
Tio̍h lâi bô gî,
Chiu chai hoaⁿ-hí.
2. Siōng-tè jîn-ài,
Kó͘-chá í lâi,
Thong sè bōe pí,
Oh-tit kóng khí,
Bān-mi̍h chiâu-pī,
Siáⁿ-sū giâu-gî?
Kín-kín tio̍h lâi,
Kèng-khiân ho̍k-sāi.
Lí kóng lí m̄-káⁿ chiū-kūn Iâ-so͘, in-ūi lí phah-sǹg lí ê chē-kòa chin tāng. Lí nā chin-chiàⁿ chai-kiò lí ê chōe tōa sī hó, chóng-sī lí í-keng chai, lí tio̍h koh-khah kín óa-kūn Iâ-so͘, in-ūi thong thiⁿ-kha-ē bô lâng ōe kiù lí, put-kò Iâ-so͘ chiū ōe. "Lí hō͘ lâng thâi lâu-huih, sio̍k-hôe goán tī cho̍k-lūi peh-sìⁿ ê tiong-ng lâi kui Siōng-tè." (Be̍k-sī-lio̍k 5:9). Iâ-so͘ thiaⁿ-kìⁿ chiū kóng, "Ióng-kiāⁿ·ê m̄-sái i-seng, ū pīⁿ·ê tio̍h ēng i, Góa lâi m̄-sī beh chio hó-lâng, sī beh chio pháiⁿ-lâng hoán-hóe." (Má-khó 2:17).
1. Hoân-ló iu-būn, chin kan-khó͘,
Sè-kan tit-kiù, lóng bô lō͘,
Kín-kín chiū-kūn Kiù-sè-chú,
I chiū chhut-la̍t liâm-piⁿ kiù.
2. Lí nā iân-oān, m̄-káⁿ lâi,
Ǹg-bāng pa̍t ji̍t m̄-sái hāi,
Che sī koat-toàn tōa chhò-gō͘,
Tit-kiù lóng-chāi sìn Iâ-so͘.
Sèng-chheh ū kóng, "Taⁿ sī siū chiap-la̍p ê sî, taⁿ sī tit-tio̍h kiù ê ji̍t." (Ⅱ Ko-lîm-to 6:2).
Chá ū chi̍t lâng mn̄g chi̍t ê lāu-lâng, "Lí chin-chiàⁿ chai lí ōe tit-tio̍h kiù á bōe?" Lâu-lâng ìn i kóng, "Góa iáu-bē sí beh thái ōe chai? Tio̍h thèng-hāu sí-liáu chiah ōe bêng-pe̍k." Chit-ê lāu-lâng só͘ ìn sī bô ha̍p-gî, sòa piáu-bêng i m̄-bat Sèng-chheh ê tō-lí. Sèng-keng ta̍uh-ta̍uh teh pek lâng hiān-sî tio̍h tit-tio̍h kiù, lóng bô chi̍t-pái hoan-hù lâng tio̍h thèng-hāu pa̍t-ji̍t chiah tio̍h him-bō͘ Siōng-tè sià i ê chōe. Lóng sī kóng lâng tio̍h kóaⁿ-kín lâi sìn Iâ-so͘ chiah ōe tit-tio̍h kiù.
Pí-tek gō͘-sûn-chhoeh teh kóng tō-lí ū hiâm Iû-thài-lâng ū hāi-sí Iâ-so͘. I ū kóng, "Lín kó-jiân chiong put-gī ê chhiú lâi lia̍h lâi tèng sí Iâ-so͘." Chéng-lâng thiaⁿ-kìⁿ chit-ê ōe sim-koaⁿ lāi chhin-chhiūⁿ chhì teh chhì mn̄g Pí-tek kap sù-tô͘ kóng, "Hiaⁿ-tī goán tio̍h cháiⁿ-iūⁿ chòe." Pí-tek bô kah i tio̍h thèng-hāu pa̍t-ji̍t Siōng-tè chiah kam-goān sià i ê chōe. I kā i tio̍h kín-mé hoán-hóe kóe-pìⁿ chiah ōe tit-tio̍h kiù. "Hit ji̍t chèng-lâng hoaⁿ-hí chiap-la̍p i ê ōe lóng-chóng niá sóe-lé, lâng-gia̍h kàu saⁿ-cheng lâng." (Sù-tô͘-hêng-toān, 2:23, 37, 41).
Lū-tí-a, chiū-sī Chhui-ngá-chhui-lat ê hū-jîn-lâng thiaⁿ-kìⁿ Pó-lô kóng tō-lí, Chú khui i ê sim liâm-piⁿ tit-tio̍h kiù. (Sù-tô͘-hêng-toān 16:14, 15).
Hui-li̍p-pí kò͘-kaⁿ ê lâng teh-beh ka-kī chū-chīn thiaⁿ-kìⁿ Pó-lô kóng m̄-thang ka-kī hāi, goán lóng tī-teh, ngia̍uh-ngia̍uh-chhoah phak tī ê bīn-chêng kóng, "Sian-siⁿ góa tio̍h cháiⁿ-iūⁿ chòe chiah ōe tit-tio̍h kiù?" Pó-lô ìn i kóng, "Tio̍h sìn Chú Iâ-so͘ Ki-tok, lí kap lí ê ke lóng tit-tio̍h kiù." Hit mî kò͘-kaⁿ ê lâng sóe chit nn̄g lâng ê siong-hûn, choân-ke siū sóe-lé; chhiáⁿ i ji̍p chhù, siat-iân khoán-thāi i; í-keng sìn Siōng-tè choân-ke hoaⁿ-hí. (Sù-tô͘-hēng-toān 16:19-34).
Hit-ê chha̍t tèng si̍p-jī-kè tùi Iâ-so͘ kóng, "Chú·ah! Lí tit-tio̍h lí ê kok ê koân koh lâi tio̍h kì-tit góa." Iâ-so͘ kóng, "Góa si̍t-chāi kā lí kóng, kin-á-ji̍t lí tek-khak kap góa kàu Lo̍k-hn̂g." Téng-bīn só͘ kóng chiah-ê lâng, ta̍k-ê sī liâm-piⁿ tit-tio̍h kiù, bô chi̍t-ê the-sî phah-sǹg tio̍h thèng-hāu kàu āu-ji̍t chiah beh siūⁿ hoán-hóe kóe-pìⁿ tit-tio̍h sià-chōe.
1. Thiaⁿ-kìⁿ Iâ-so͘,
To-lī thoân-pò͘,
Tam-tng kan-khó͘,
Lâi khui oa̍h-lō͘,
Sè-kan chèng-lâng,
Eng-kai tâu-hâng,
Sim-koaⁿ hoaⁿ-hí,
Sūn-thàn tō-lí.
2. Hiān-sî tio̍h lâi,
Bo̍h-tit kòa-gāi,
Chē-kòa sui tāng,
M̄-bián choa̍t-bāng,
Iâ-so͘ lîn-bín,
Lí kiám m̄-sìn,
Hiān-sî tio̍h lâi,
Iân-chhiân chiū hāi.
Pêng-iú·ah! Lí í-keng ū iân-chhiân jōa-kú mah? Sī kúi-nā ge̍h, á-sī kúi-nā nî mah? Lí tio̍h siūⁿ, lí jū iân-chhiân lí jú oh-tit sìn, in-ūi bô sìn sim ōe pìⁿ chòe ngī, kàu pa̍t-ji̍t kiám-chhái lí ài sìn chiū bōe. "Ji̍t-ge̍h bē kè-sin tio̍h ki̍p-sî saⁿ bián-lē, kiaⁿ-liáu hō͘ chōe bê-he̍k kàu ka-kī ngī-sim. In-ūi.....lí nā kam-goān thiaⁿ-thàn góa ê ōe, bo̍h-tit ngī-sim chhin-chhiūⁿ chāi-chá ê peh-sìⁿ tú-tak góa." (Hi-pek-lâi 3:13, 15).
1. Hiān-sî tio̍h lâi,
Kín-kín ho̍k-sāi,
Khò Chú kong-lô,
Bián-tit hoân-ló,
Hó-lâng tio̍h lâi,
Pháiⁿ-lâng nā ài,
Him-bō͘ Kiù-chú,
Khoài tit-tio̍h kiù.
2. Hiān-sî tio̍h lâi,
Hó-lâng kap pháiⁿ,
Put-lūn sī pù,
Kiau-ngō͘ khiam-hu,
Sòng-hiong choa̍t-bāng,
Thong sè chèng-lâng,
Eng-kai tio̍h khò,
Iâ-so͘ kong-lô.
（第八篇）
我著聽候偌久，耶穌㱏卜救我？
馬牧師寫的
朋友啊！汝有咧問，我著聽候偌久耶穌㱏卜救我？即號的問，無合適。汝反轉著問，我卜聽候偌久㱏甘願就近耶穌，予伊救我？毋是伊愛卜延延[1]，是汝愛。汝若真正愛得耶穌救汝，汝的款式拄拄是親像彼个浪子，出外濫糝開伊的家伙，愛卜倒來揣伊的老父。彼疊倒來，伊真忍[2]，驚見老父毋接納伊，伊㱏沿路想來想去，看卜講甚物話㱏會予伊的老父的心較軟。伊其實毋使忍到按呢。伊驚惶是加工，因為老父真迫切愛得伊的後生倒來，沓沓咧數念伊，故沓沓坫門口咧瞭望。即日忽然看見伊就走進前，抱伊的頷管共伊唚喙。上帝愛得重罪的儂反悔改變，倒來就近伊，也是親像按呢。
1、
逐項攏便，
毋通延延，
上帝備辦，
福氣平安，
賞賜世間，
充足無限，
著來無疑，
就知歡喜。
2、
上帝仁愛，
古早以來，
通世𣍐比，
僫得講起，
萬物褿備，
啥事堯疑？
緊緊著來，
敬虔服侍。
汝講汝毋敢就近耶穌，因為汝拍算汝的罪過真重。汝若真正知叫汝的罪大是好，總是汝已經知，汝著故較緊倚近耶穌，因為通天骹下無儂會救汝，不過耶穌就會。「汝予儂刣流血，贖回阮佇族類百姓的中央來歸上帝。」（《默示錄》5:9）耶穌聽見就講，「勇健的毋使醫生，有病的著用伊，我來毋是卜招好儂，是卜招否儂反悔。」（《馬可》2:17）
1、
煩惱憂悶，真艱苦，
世間得救，攏無路，
緊緊就近救世主，
伊就出力連鞭救。
2、
汝若延緩，毋敢來，
眏望別日毋使害，
這是決斷大錯誤，
得救攏在信耶穌。
聖冊有講，「當是受接納的時，當是得著救的日。」（《Ⅱ哥林多》6:2）
早有一儂問一个老儂，「汝真正知汝會得著救抑𣍐？」老儂應伊講，「我猶未死，卜汰會知？著聽候死了㱏會明白。」即个老儂所應是無合宜，紲表明伊毋捌聖冊的道理。聖經沓沓咧迫儂現時著得著救，攏無一擺吩咐儂著聽候別日㱏著欣慕上帝赦伊的罪。攏是講儂著趕緊來信耶穌㱏會得著救。
彼得五旬節咧講道理有嫌猶太儂有害死耶穌。伊有講，「恁果然將不義的手來掠來釘死耶穌。」眾儂聽見即个話，心肝內親像刺咧刺，問彼得佮使徒講，「兄弟，阮著怎樣做？」彼得無教伊著聽候別日上帝㱏甘願赦伊的罪。伊教伊著緊猛[3]反悔改變，㱏會得著救。「彼日眾儂歡喜接納伊的話，攏總領洗禮，儂額到三千儂。（《使徒行傳》2:23,37,41）」
呂底亞，就是推雅推喇[4]的婦人儂聽見保羅講道理，主開伊的心，連鞭得著救。（《使徒行傳》16:14,15）
腓立比顧監的儂咧卜家己自盡，聽見保羅講毋敢家己害，阮攏佇咧，矍矍掣[5]，覆佇伊的面前講，「先生，我著怎樣做㱏會得著救？」保羅應伊講，「著信主耶穌基督，汝佮汝的家攏得著救。」彼暝顧監的儂洗即兩儂的傷痕，全家受洗禮，請伊入厝，設筵款待伊，已經信上帝，全家歡喜。（《使徒行傳》16:19-34）
彼个賊釘十字架，對耶穌講，「主啊！汝得著汝的國的權，故來著記得我。」耶穌講，「我實在共汝講，今仔日汝的確佮我到樂園。」頂面所講遐个儂，逐个是連鞭得著救，無一个推辭拍算著聽候到後日㱏卜想反悔改變，得著赦罪。
1、
聽見耶穌，
道理傳播，
擔當艱苦，
來開活路，
世間眾儂，
應該投降，
心肝歡喜，
順趁道理。
2、
現時著來，
莫得掛礙，
罪過雖重，
毋免絕望，
耶穌憐憫，
汝敢毋信，
現時著來，
延延就害。
朋友啊！汝已經有延延偌久嘛？是幾若月，抑是幾若年嘛？汝著想，汝愈延延，汝愈僫得信，因為無信，心會變做硬，到別日敢彩汝愛信就𣍐。「日月未過身[6]，著及時相勉勵，驚了予罪迷惑到家己硬心。因為......汝若......甘願聽趁我的話，莫得硬心親像在早的百姓抵觸我。」（《希伯來》3:13,15）
1、
現時著來，
緊緊服侍，
靠主功勞，
免得煩惱，
好儂著來，
否儂若愛，
欣慕救主，
快得著救。
2、
現時著來，
好儂佮否，
不論是富，
驕傲謙虛，
喪兇絕望，
通世眾儂，
應該著靠，
耶穌功勞。