Bōng-bâi lâng in lâng sí, bô tāi lo̍h thô͘-kha, ū khí sí-lâng ê só͘-chāi, sī îⁿ-îⁿ ê tâi, bô chhù-téng sī kìⁿ thiⁿ. Lāi-bīn sì-ûi chhòng saⁿ chân kè, chi̍t chân thang tóe ta-po͘ lâng, chi̍t chân hū-jîn-lâng, chi̍t chi̍t chân gín-ná. Chiah-ê kè chhu-chhu kàu tiong-ng ê chhim-chíⁿ. Chhim-chíⁿ pàng kau-âm thang lâu chúi chhut gōa-bīn. Kau-âm thâu ēng ba̍t-chhng ê khì-khū chat·i, hō͘ lâ-sâm bōe lâu-chhut. In chhòng chit-hō sī kóng thó͘-tōe m̄-thang bak-tio̍h, chhàu-nōaⁿ ê mi̍h.
Lâng sí, chiū ēng thih-kè kng i khì, sàng-chòng ê lâng khîⁿ pe̍h chhiú-kun saⁿ tè kiâⁿ. Beh kàu-tè sàng-chòng ê lâng thêng, kng ê lâng kàu mn̂g-kháu thǹg sí-lâng ê i-chiûⁿ, chiong sin-si lok tī lāi-bīn ê kè-téng, chiū chhut-lâi koaiⁿ-mn̂g.
Chian-chiáu (chiū-sī Eng ê lūi) khiā tī chhiū-ni̍h, á-sī tī chhiûⁿ-téng pe lo̍h-lâi teh sí-lâng ê bah lâi chia̍h. Khah m̄-sái gō͘ tiám-cheng kú, chiū lóng chia̍h liáu-liáu. In-ūi chiah-ê chiáu chia̍h-khì chia̍h khì put-chí se̍k, chin chai-iáⁿ, só͘-í chia̍h kōe liáu. Koh kè poeh-ji̍t chiah-ê kut chiū ta-khok-khok, lâng chiū lâi chiong hiah ê kut ngeh khí-lâi hiat lo̍h chhim-chíⁿ lāi. Lo̍h hō͘ ê sî hō͘ -chúi sóe hiah-ê kut-thâu, hiah-ê lâ-sâm e lâu tī kau-âm thâu, hō͘ hit-ê ba̍t-chhng ê khì-khū cha̍h i bōe-tit chhut, chheng-chúi lâu chhut-khì.
Nn̄g-saⁿ nî chêng ū kî-koài ê tāi-chì, chiū-sī chi̍t lâng sí, lâng kng i khì hē tī hit-ê lāi-bīn; chian-chiáu pe lo̍h-lâi teh·i, in-ūi hit-ê lâng sī hūn-khì m̄-sī sí, só͘-í liâm-piⁿ cheng-sîn chai i sī tī bâi-chòng ê só͘-chāi, chiū chin kiaⁿ. Beh kóaⁿ chian-chiáu kap chhut hit ê só͘-chāi chin oh, āu-lâi phe-sí chiah chhut-lâi. Hit-sî teh siūⁿ beh cháiⁿ-iūⁿ, chiū tò-khì in tau, in ê bó͘-kiáⁿ khòaⁿ-kìⁿ lia̍h-chòe sī hit-ê sí-lâng ê kúi, chiū tōa-siaⁿ âu-kiò. I kā in kóng, Góa sī lâng, bô sí. I ê bó͘-kiáⁿ lóng m̄-sìn i. I bô-ta-tit-ôa chiū khì chhē i pún só͘ bat ê gōa-kok bo̍k-su chiong i ê chêng-hêng kā i kóng. Bo̍k-su hō͘ i i-chiûⁿ thang chhēng, sòa hō͘ i tòa tī i ê chhù. I ê chhin-lâng lóng m̄ jīn im̄ chhap i, in-ūi kóng, I í-keng sí khì bâi-chòng.
I chiū beh thó tām-po̍h ka-kī ê ke-gia̍p, in lóng m̄ hō͘ i. Āu-lâi i chiū khì kò, liân koaⁿ-hú ia̍h kóng i sí·lah, m̄-chhap·i.
Chit chat sū thang kà-sī lán kap Chú saⁿ-kap sí saⁿ-kap koh-oa̍h ê lâng. Lūn sè-kan, lūn ka-kī, lūn chōe tio̍h lia̍h-chòe í-keng sí, kap i bô kan-sia̍p, só͘ kiâⁿ ê tio̍h chhin-chhiūⁿ koh-oa̍h ê lâng. "Án-ni lín khò lán ê Chú Iâ-so͘ Ki-tok, tio̍h lia̍h ka-kī í-keng sí lâi thoat-lī pháiⁿ, oa̍h lâi ho̍k-sāi Siōng-tè."
望霾（音）[1]儂𢙠儂死，無埋落塗骹，有起死儂的所在，是圓圓的檯[2]，無厝頂，是見天。內面四圍創三層架，一層通貯諸夫儂，一層婦人儂，一層囡仔。遮个架趄趄到中央的深井。深井放溝涵通流水出外面。溝涵頭密穿[3]的器具紥伊。予垃儳𣍐流出。𢙠創即號，是講土地毋通毣著臭爛的物。
儂死，就用鐵架掆伊去，送葬的儂鉗白手巾相綴行。卜到帶，送葬的儂停，掆的儂到門口褪死儂的衣裳，將身屍落[4]佇內面的架頂，就出來關門。
鸇鳥[5]（就是鷹的類）徛佇樹裡，抑是佇牆頂飛落來啄死儂的肉來食。較毋使五點鐘久，就攏食了了。因為遮个鳥食去不止熟[6]，真知影，所以食噲了。故過八日，遮个骨就焦涸涸，儂就來將遐个骨挾起來㧒落深井內。落雨的時，雨水洗遐个骨頭，遐个垃儳的流佇溝涵頭，彼个密穿的器具閘伊𣍐得出，清水流出去。
兩三年前有奇怪的事誌，就是一儂死，儂掆伊去下佇彼个內面，鸇鳥飛落來啄伊，因為彼个儂是暈去，毋是死，所以連鞭精神，知伊是佇埋葬的所在，就真驚。卜趕鸇鳥佮出彼个所在。彼時咧想，卜怎樣，就倒去𢙠兜。𢙠的姥囝看見，掠做是彼个死儂的鬼，就大聲喉叫[7]。伊共𢙠講，我是儂，無死。伊的姥囝攏毋信伊。伊無奈得何[8]，就去揣伊本所捌的外國牧師，將伊的情形共伊講。牧師予伊衣裳通穿，紲予伊蹛佇伊的厝。伊的親儂攏毋認伊，毋插伊，因為講，伊已經死去埋葬。
伊就卜討淡薄家己的家業，𢙠攏毋予伊。後來伊就去告，連官府亦講伊死啦，毋插伊。
即節事，通教示咱佮主相合死，相合故活的儂。論世間，論家己，論罪著掠做已經死，佮伊無干涉，所行的著親像故活的儂。「按呢恁靠咱的主耶穌基督，著掠家己已經死，來脫離否，活來服侍上帝。」
[1] Bōng-bâi：望霾，印度的地號名，著是當今所講的「孟買」即个所在。 ↩
[2] 圓圓的檯：當今中文界翻譯做「無言檯」抑是「無聲塔」。清末闕名著的《遊歷筆記》，記載佇「傍倍」（孟買）所看著的： 波斯義塚，以磚石砌成大圈，中有鐵柵分格，每柵置一屍，一任群鳥啄食，俟血肉盡，其骨即由鐵柵落下，亦惡俗也。聞有一人，其妻女同時而死，彼不忍見群鳥啄食，用鐵絲籠罩其體，待其自腐而落下，其用心亦良苦矣。 ↩
[3] ba̍t-chhng：密穿。一穿一穿不止密穿，譬論講篩仔、濾布。著是普通話講的「密孔」。 ↩
[4] lok：落。著是下咧、放咧的意思。 ↩
[5] chian-chiáu：鸇鳥，著是普通話講的禿鷹（禿鷲）。 ↩
[6] 熟：著是熟練、熟手。 ↩
[7] âu-kiò：喉叫，普通話「嗷叫」。 ↩
[8] bô-ta-tit-ôa：也有講bô-tai-tit-ôa，「無奈得何」，當今漳州海澄腔猶有咧講。意思是普通話「無可奈何」，也著是無法度、無變步。 ↩