Gio̍k An-le̍k hoan-e̍k.
Lán tio̍h khòaⁿ Iâ-so͘ ê bô͘-iūⁿ chiū ōe chai sìn Chú ê lâng nā siū-khó͘ ōe tit-tio̍h siáⁿ lī-ek.
Ⅰ. "Iâ-so͘ sui-jiân sī Siōng-tè ê kiáⁿ iáu-kú ū tú-tio̍h kan-khó͘, chiū thang hoaⁿ-hí sūn-thàn Pē ê bēng-lēng." (Hi-pek-lâi 5:8.) Só͘-í lán nā beh chìn-pō͘ , ná kú ná gâu thàn Siōng-tè ê chí-ì chin-chiàⁿ tio̍h siū-khó͘.
Ⅱ. "Lán ê chè-si-thâu m̄-sī bōe-ōe thé-thiap lán ê loán-jio̍k, sī bat keng-kè chiah-ê kan-khó͘ ná chhin-chhiūⁿ lán chi̍t-poaⁿ-iūⁿ, to̍k-to̍k bô hām-lo̍h chōe." (Hi-pek-lâi 4:15.) Lán ia̍h-sī án-ni, bô tú-tio̍h sí-sit, phòa-pīⁿ, khún-tio̍k, sòng-hiong kan-khó͘ ê lâng bōe hiáu-tit chiâu-chn̂g thé-thiap pa̍t-lâng.
Ⅲ. Iâ-so͘ siū-khó͘ ì-sù sī beh lī-ek lâng, chiū-sī beh kiù in kàu éng-oa̍h. Lán ū chōe ê lâng siū khó͘ lóng bô hit-hō ê kong-hāu. Ki-tok sio̍k-chōe ê kan-khó͘ lán bōe-ōe pun lâi siū. Iáu-kú Iâ-so͘ kóng, "Góa só͘ lim ê poe lín beh lim, góa só͘ niáⁿ ê sóe-lé lín beh niáⁿ."
Ⅳ. Iâ-so͘ siū-khó͘ m̄-nā sī beh lī-ek lâng, ia̍h-sī beh kui êng-kng tī i ê Pē. I kî-tó kóng, "M̄-sī chiàu góa ê ì-sù, sī chiàu lí ê chí-ì." Lâng nā hián-bêng chit-hō hâng-ho̍k ê sim chin-chiàⁿ hō͘ khòaⁿ in ê lâng chai in teh kui êng-kng Siōng-tè.
Só͘-í lán siū-khó͘ tio̍h hoaⁿ-hí, in-ūi pí hióng-siū sè-kan khoài-lo̍k hok-khì, kan-khó͘, khah ū lī-ek.
（玉安力翻譯）
咱著看耶穌的模樣就會知信主的儂若受苦會得著啥利益。
1、「耶穌雖然是上帝的囝，猶故有拄著艱苦，就通歡喜順趁父的命令。（《希伯來》5:8）」所以咱若卜進步，乃久乃𠢕趁上帝的旨意真正著受苦。
2、「咱的祭司頭，毋是𣍐會體貼咱的軟弱，是捌經過遮个艱苦若親像咱一般樣，獨獨無陷落罪。（《希伯來》4:15）」咱亦是按呢：無拄著死失、破病、窘逐、喪兇、艱苦的儂𣍐曉得褿全體貼別儂。
3、耶穌受苦意思是卜利益儂，就是卜救𢙠到永活。咱有罪的儂受苦攏無彼號的功效。基督贖罪的艱苦咱𣍐會分來受。猶故耶穌講，「我所啉的杯，恁卜啉；我所領的洗禮，恁卜領。」
4、耶穌受苦毋但是卜利益儂，亦是卜歸榮光佇伊的父。伊祈禱講，「毋是照我的意思，是照汝的旨意。」儂若顯明即號降服的心，真正予看𢙠的儂知𢙠咧歸榮光上帝。
所以咱受苦著歡喜，因為比享受世間快樂、福氣、艱苦較有利益。