Bat chhâ-khó kàu-hōe tùi gō͘-sûn-choeh i-lâi, tōa ū heng-khí oa̍h-tāng, lóng-sī tùi kî-tó tit-tio̍h Sèng-sîn si̍t-chāi ê kong-hāu. Chhiⁿ-chhiūⁿ Tiong-kok ê lāi-tōe hōe, tē-it tùi-tiōng chit-ê hoat-tō͘, bat tiāⁿ-tio̍h tī ta̍k-ê pài-la̍k, tùi sì tiám-cheng khí ,kàu la̍k tiám-cheng chí , choan-choan thòe Tiong-kok kî-tó. Chêng-nî chóng-hōe chū-chi̍p tī Siōng-hái, ū chhiat-chhiat gī-lūn chit-ê tāi-chì, iā tiāⁿ-tio̍h ta̍k-ê pài-la̍k ê-hng, chhiáⁿ ta̍k só͘-chāi ê Sèng-tô͘ tâng-sî kî-tó, í-keng ū chōe-chōe lâng tāi-seng kiâⁿ chit-hō ê gī-lūn. Taⁿ lán chiah-ê tōa khiàm-kheh Sèng-sîn ê un-tián, khòaⁿ chiah-ê sìn Tsú ê lâng, ta̍k lâng, ta̍k ke, ta̍k kàu-hōe thang chai, nā tit-tio̍h Sèng-sîn ê siúⁿ-sù, chiū tō-lí tek-khak chū-jiân chiâu-pī. Koh Siōng-tè kam-goān siúⁿ-sù Sèng-sîn, bô thang giâu-gî, khòaⁿ Lō͘-ka 11:13.
Tàu-tí lán chiah-ê lâng, tio̍h tāi-seng pī-pān lâi thèng-hāu, in-ūi Chú khiā tī sim-mn̂g ê gōa-bīn beh phah mn̂g, lán tio̍h khui-mn̂g lâi chih-chiap i.
Sèng-sîn ia̍h-sī án-ni. Lán lâng chhiat-chhiat tio̍h tāi-seng pī-pān, thang lâi hoaⁿ-hí chiap-la̍p i. Chhâ-khó pa̍t só͘-chāi ê lâng, khòaⁿ chit-ê tâng-sî ê kî-tó, chòe tōa koan-chhiat iàu-kín, put-lūn tī ke-lāi, á-sī chhut-mn̂g, á-sī tī lé-pài-tn̂g, ū chōe-chōe lâng tī pài-la̍k ê-hng, tiāⁿ-tio̍h ì-sù pek-chhiat kî-tó, chiū-sī sī chhit tiám kàu káu tiám ê sî, ēng kèng-khiân ê sim kî-tó, lóng-sī chiàu in ê ki-hōe. Siat-sú ōe kap chèng-lâng saⁿ-kap chū-chi̍p, sī koh-khah hó, in-ūi chit-hō tâng-sim tâng-sî ê kî-tó, chū-jiân ōe kám-tōng lán ê sim, in-ūi Siōng-tè sī chi̍t-ê, só͘-í sìn Tsú ê lâng sī chòe chi̍t-ke. Hiān-sî Siōng-tè ê un-tián í-keng chiâu-pī, lán to̍k-to̍k tio̍h pī-pān sim kî-tó, lâi chiap-la̍p Sèng-sîn. Só͘ ì-ài·ê, sī Chiang, Choân, Éng-chhun, Lêng-nâ, lóng-chóng ê kàu-hōe, hoân-nā sìn Chú ū tì-ì beh o̍h chit-hō lâi kiâⁿ·ê, ta̍k-lâng tio̍h tâng-sim tâng-sî pek-chhiat lâi kî-tó, chiah ōe tit-tio̍h Siōng-tè si-un tī kàu-hōe, ke-thiⁿ chin chōe lâng, sī só͘ tōa-tōa ǹg-bāng·ê.
捌查考教會對五旬節以來，大有興起活動，攏是對祈禱得著聖神實在的功效。親像中國的內地會，第一對重即號的法度，捌聽著佇逐个拜六，對四點鐘起，到六點鐘止，專專替中國祈禱。前年總會聚集佇上海，有切切議論即个事誌，也定著逐个拜六暝昏，請逐所在的聖徒同時祈禱，已經有濟濟儂事先行即號的議論。當咱遮个大欠缺聖神的恩典，看遮个信主的儂，逐儂、逐家、逐教會通知。若得著聖神的賞賜，就道理、德行自然褿備。故上帝甘願賞賜聖神，無通堯疑，看《路加》11:13。
到底咱遮个儂，著事先備辦來聽候，因為主徛佇心門的外面卜拍門，咱著開門來接接伊。
聖神亦是按呢。咱儂切切著事先備辦，通來歡喜接納伊。查考別所在的儂，看即个同時的祈禱，做大關切要緊，不論佇家內，抑是出門，抑是佇禮拜堂，有濟濟儂佇拜六暝昏，定著意思迫切祈禱，就是佇七點到九點的時，用敬虔的心祈禱。攏是照𢙠的機會。設使會佮眾儂相合聚集，是故較好，因為即號同心同時的祈禱，自然會感動咱的心，因為上帝是一个，所以信主的儂是做一家。現時上帝的恩典已經褿備，咱獨獨著備辦心祈禱，來接納聖神。所意愛的，是漳、泉、永春、龍巖，攏總的教會，凡若信主有致意卜學即號來行的，逐儂著同心同時迫切來祈禱，㱏會得著上帝施恩佇教會，加添真濟儂，是所大大眏望的。