Un Sam-goân siá-ê.
Liân-khoân sī sím-mi̍h? Sī chioh thih-liān ê khoân chòe pí-phēng. Kî-tó-hōe siáⁿ-sū hō chit-ê miâ? Sī in-ūi chit-ê hōe lóng sī saⁿ thòe kî-tó tāi-ke saⁿ pang-chān, ná chhin-chhiūⁿ chōe-chōe khoân ê thih ha̍p-chòe chi̍t-tiâu ê liān. Cháiⁿ-iūⁿ saⁿ thòe kî-tó? Phì-lūn ū 24 lâng ji̍p chit-ê hōe, liāu-lí ê lâng cvhiū kì in ê miâ, chi̍t lé-pài ū 6 ji̍t, ēng 6 ji̍t pun hō͘ 24 lâng, chiū 4 lâng ōe tit-tio̍h chi̍t-ji̍t, án-ni chiū múi-ji̍t tio̍h thòe 4 lâng kî-tó. Phì-lūn 24 lâng miâ chòe A,B,Ch,Chh, ûn-ûn, chiū pài-it E,G, H, ti̍t-ti̍t kàu U chiah-ê 20 lâng lóng tio̍h thòe A,B,Ch,Chh, 4 lâng kî-tó, in ia̍h thòe pún-sin kî-tó. Pài-jī chiū lóng thòe E,G, H,I, 4 lâng kî-tó, in ia̍h thòe pún-sin kiû. Chhin-chhiūⁿ án-ni ti̍t-ti̍t kàu pài-la̍k chiū hōe-tiong ê lâng lóng ū saⁿ-thòe kî-tó. Kàu lé-pài-ji̍t chiū 24 lâng lóng saⁿ-thòe lâi kiû. Ū tiāⁿ-tio̍h sím-mi̍h sî chū-chi̍p tī sím-mi̍h só͘-chāi chhin-chhiūⁿ pêng-siông ê kî-tó hōe á-bô? Bô. Sī ta̍k-lâng tī in ka-kī ê só͘-chāi khòaⁿ in ta̍k ji̍t tī-sî ū tiap-á-kú ê êng lâi kî-tó nā-tiāⁿ, lóng bô gāi tio̍h lâng ê kang. Sím-mi̍h lâng thang ji̍p chit-ê hōe? Put-koán lâng kiám-chhái ū lâng siūⁿ pún-sin ū sím-mi̍h khiàm-kheh, á-sī chhin-lâng pêng-iú iáu-bē sìn Chú, i ài chhut-la̍t kiù in, chit-hō ê tāi-chì ài lâng kap i tàu chhut-la̍t kî-tó chiū lóng thang ji̍p chit-ê hōe, thong-ti liāu-lí ê lâng kì i ê miâ, pun hō͘ hōe-tiong ê lâng. Chit-hō hōe tī pa̍t só͘-chāi ū á-bô? Ū. Thiⁿ-ē ū kúi-cha̍p bān lâng ji̍p chit-hō hōe, chóng-sī Choân-chiu kūn-lâi ū siat liân-khoân ê kî-tó-hōe, siáⁿ-sū siat chit-ê hōe? Si in-ūi kin-nî nî-thâu ê kî-tó-hōe ta̍k-ji̍t chiàu pêng-siông ê hoat-tō͘ chū-chi̍p tī lé-pài-tn̂g, ia̍h sī chiàu Chiang-choân só͘ pun ê kî-tó toaⁿ lâi kî-tó, khó-sioh lâng bô jōa-chōe, kî-tó-hōe m̄ oa̍h-tāng. Só͘-í hiaⁿ-tī chiū lēng-gōa ta̍k ē-hng siat kî-tó-hōe chū-chi̍p tī Lú-o̍h. (Hit sî Lú-o̍h iáu-bē khui.) Khí-thâu ì-sù sī kúi-nā lâng chū-chi̍p nā-tiāⁿ, bô phah-sǹg kàu sî hiaⁿ-tī chin-chōe lâng lâi, m̄-nā ka-kī lâi, chōe-chōe ū chhōa in ê chhin-lâng pêng-iú chiū-sī in só͘ ài ín-chhōa lâi tit-tio̍h kiù ê lâng, ǹg-bāng in tùi só͘ khòaⁿ ê kî-tó-hōe sim siū kám-kek lâi sìn Kiù-chú. Án-ni chū-chi̍p ū-sî kàu 70 gōa lâng. Hit-sî liāu-lí kî-tó-hōe kap pêng-siông liāu-lí kî-tó-hōe ê hoat-tō͘ bô tú-tú saⁿ-tâng, ū sî chòe kám-un hōe, ū sî chòe kiù chhin-lâng pêng-iú ê hōe, ū sî chòe kan-chèng-hōe, ta̍k-lâng chiong in só͘ tit-tio̍h ê un-tián, chiū-sī tùi sìn Chú só͘ tit-tio̍h ê hok-khì lâi kan-chèng tī chèng-lâng ê bīn-chêng. Hit ē-hng bêng-bêng Sèng-sîn tōa kàng-lîm, chōe-chōe lâng sim tōa tín-tāng, ū 5 ê sè-sio̍k-lâng khí-lâi kóng ka-kī ê tāi-chì jīn in ê chōe, chhiáⁿ lâng thòe in kî-tó, lāi-tiong ū chi̍t-ê ka-kī kūi-lo̍h lâi jīn-chōe kiû-un.
Chit-ê hōe beh sì-sòaⁿ tāi-ke chhin-chhiūⁿ put-chí m̄-ài sì-sòaⁿ, nā-sī bōe-tit-thang siông-siông án-ni chū-chi̍p, só͘-í lâng siat chit-ê hōe, kàu-taⁿ ū kúi-cha̍p lâng lâi ji̍p, ū ê tī Choân-chiu, ū ê tī Oaⁿ-hái, ū ê tī Ē-mn̂g ta̍k-ji̍t saⁿ-thòe kî-tó.
Góa siá án-ni ǹg-bāng tāi-ke ōe ka-kī siat chit-hō liân-khoân ê kî-tó-hōe, ǹg-bāng Sèng-sîn tōa-tōa kàng-lîm. Kàu-hōe tōa-tōa heng-khí sī sim só͘ goān.
（溫三源[1]寫的）
連環是甚物？是鐵鍊的環做比並。祈禱會啥事號即个事？是因為即个會攏是相替祈禱，大家相幫贈，若親像濟濟環的鐵合做一條的鍊。怎樣相替祈禱？譬論有24儂入即个會，料理的儂就記𢙠的名，一禮拜有8日，用6日分予24儂，就4儂會得著一日，按呢就每日著替4儂祈禱。譬論24儂名做A、B、Ch、Chh，云云[2]，就拜一E、G、H，直直到U遮个20儂攏著替A、B、Ch、Chh，4儂祈禱，𢙠亦替本身祈禱。拜二就攏替E、G、H、I，4儂祈禱，𢙠亦替本身求。親像按呢直直到拜六就會中的儂攏有相替祈禱。到禮拜日就24儂攏相替來求。有定著甚物時聚集佇甚物所在親像平常的祈禱會抑無？無。是逐儂佇𢙠家己的所在看𢙠逐日底時有疊仔久的閒來祈禱但但，攏無礙著儂的工。甚物儂通入即个會？本館儂敢彩有儂想，本身有甚物欠缺，抑是親儂、朋友猶未信主，伊愛出力救𢙠，即號的事誌愛儂佮伊鬥出力祈禱就攏通入即个會，通知料理的儂記伊的名，分予會中的儂。即號會佇別所在有抑無？有。天下有幾十萬儂入即號會，總是泉州近來有設連環的祈禱會。啥事設即个會？是因為今年年頭的祈禱會逐日照平常的法度聚集佇禮拜堂，亦是照漳泉所分的祈禱單來祈禱，可惜儂無偌濟，祈禱會毋活動。所以兄弟就另外逐暝昏設祈禱會聚集佇女學（彼時女學猶未開）。起頭意思是幾若儂聚集但但，無拍算[3]到時兄弟真濟儂來，毋但家己來，濟濟有抴𢙠的親儂、朋友，就是𢙠所愛引抴來得著救的儂，眏望𢙠對所看的祈禱會，心受感激來信救主。按呢聚集有時到70外儂。彼時料理祈禱會佮平常料理祈禱會的法度無拄拄相同，有時做感恩會，有時做救親儂、朋友的會，有時做干證會，逐儂將𢙠所得著的恩典，就是對信主所得著的福氣來干證佇眾儂的面前。彼暝昏明明[4]聖神大降臨，濟濟儂心大振動，有5个世俗儂起來講家己的事誌，認𢙠的罪，請儂替𢙠祈禱，內中有一个家己跪落來認罪求恩。
即个會卜四散，大家親像不止毋愛四散，但是𣍐得通常常按呢聚集，所以儂設即个會，到當有幾十儂來入，有的佇泉州，有的佇安海，有的佇廈門，逐日相替祈禱。
我寫按呢眏望大家會家己設即號連環的祈禱會，眏望聖神大大降臨。教會大大興起，是心所願。