Hoa Bo̍k-su siá·ê.
Tī Tāi-eng kok ê tang-sì ū chi̍t-ê hái miâ kiò Pak-hái, tī hia ū sì-pah gōa lí tn̂g, nn̄g-pah gōa lí khoah ê só͘-chāi khah chhián. Hî chin chōe lóng chū-chi̍p tī hia.
Chia lī Lûn-tun chha-put-to saⁿ sì cha̍p phò͘ ê chúi-lō͘, só͘-í Tāi-eng ê tōa-pù-lâng ha̍p-kó͘ chéng hî-chûn chhiáⁿ thó-hái lâng khì hia thó-hî. Tī hia thó-hî sī chin gûi-hiám, in-ūi hia khah siông khí pò-thâu-hong. Chi̍t nî chha-put-to ū gó͘-lak ge̍h-ji̍t lo̍h-seh. Teh lo̍h seh ê sî móa chûn pe̍h-phông-phông. Siat-sú nā beh khí-tiàⁿ, seng-phâng heh-phâng i ê soh-lō͘, pūn-bīn ta̍k-hāng chin ku̍t, in-ūi chiah-ê lóng kiân peng. Koh in-ūi kôaⁿ kha-chhiú lóng ngī, só͘-í ōe siông-siông poa̍h-tó, siak-tó á-sī hō͘ i kôaⁿ·sí. Nā tú-tio̍h tōa-seh ê sî bōe khòaⁿ-kìⁿ pa̍t chiah chûn, só͘-í siông-siông ōe saⁿ lôe·tio̍h. Tāi-eng, Ko-lân, Tek, Tān-kok ê hé-chûn teh óng-lâi chin-chōe sī tùi hia kè. Nā tàu-bū ê sî chiū put-chí gûi-hiám. Tī 1883 nî ū kòng-phòa cha̍p-gōa chiah ê thó-hái-chûn, sí saⁿ-pah la̍k-cha̍p lâng. Chiah-ê thó-hî·ê nā tú-tio̍h lé-pài-ji̍t á-sī êng ê sî khah-chōe chia̍h-chiú, poa̍h-kiáu, oan-ke, pháiⁿ-chhùi.
Cha̍p-gōa nî chêng ū chi̍t-ê Tāi-eng kok ê kheh-siong kàu hia khòaⁿ-kìⁿ in hit-hō khoán, i chiū siūⁿ, chiah-ê lâng chi̍t nî tò-lâi in tau kìⁿ-tio̍h pē-bú, bó͘-kiáⁿ, hiaⁿ-tī, chhin-lâng, put-kò sī saⁿ-sì lé-pài nā-tiāⁿ, kî-û·ê kui-nî tiàm tī hái·ni̍h lóng bô thiaⁿ-kìⁿ tō-lí. Án-ni chiū ná kú ná pōe-ge̍k Siōng-tè pìⁿ chòe húi-lūi sī put-chí khó-sioh.
I chiū chhut-lâi tôe-gûn chō Hok-im-chûn chhiáⁿ thoân-tō khì hia kà-sī in. Āu-lâi chōe-chōe lâng kái-siâ kui-chèng kui tī lán ê Kiù-chú.
Hiah-ê thó-hái lâng khòaⁿ-kìⁿ án-ni, ia̍h chiong kong-si ê gûn koh chō Hok-im-chûn, ia̍h ū chō I-seng chûn. Hiān-sî kiōng ū poeh chiah tī hia. "Siōng-tè ah! Sī lán ê Kiù-chú, Lí khoán-thāi goán chiàu kong-gī, bî-biāu bô lâng ōe chhún-to̍k·tit; tùi tōe ê chīn-thâu kàu hái-kak, lóng-chóng ǹg-bāng Lí. Si-phian 65:5.
（花牧師寫的）
佇大英國的東勢，有一个海，名叫北海[1]，佇遐有四百外里長，兩百外里闊的所在較淺。魚真濟攏聚集佇遐。
遮離倫敦差不多三四十鋪的水路，所以大英的大富儂，合股整漁船請討海儂去遐討魚。佇遐討魚是真危險，因為遐較常起報頭風[2]。一年差不多有五六月日落雪。咧落雪的時，滿船白滂滂。設使若卜起錠、升篷、歇篷，伊的索路、笨面[3]逐項真滑，因為遮个攏堅冰。故因為寒，骹手攏硬，所以會常常跋倒、摔倒抑是予伊寒死。若拄著大雪的時，𣍐看見別隻船，所以常常會相犁著。大英、高蘭[4]、德、但國[5]的火船[6]咧往來真濟是對遐過。若罩霧的時，就不止危險。佇1883年有摃破十外隻的討海船，死三百六十儂。遮个討魚的，若拄著禮拜日抑是閒的時較濟食酒、跋絞、冤家、否喙。
十外年前，有一个大英國的客商，到遐看見𢙠彼號款，伊就想，遮个儂一年倒來𢙠兜見著父母、姥囝、兄弟、親儂，不過是三四禮拜但但，其餘的規年坫佇海裡攏無聽見道理。按呢就乃久乃背逆上帝，變做匪類，是不止可惜。
伊就出來題銀，造福音船，請傳道去遐教示𢙠。後來濟濟儂改邪歸正，歸佇咱的救主。
遐个討海儂看見按呢，亦將公司的銀故造福音船，亦有造醫生船。現時共有八隻佇遐。「上帝啊！是咱的救主，微妙無儂會忖度[7]得，對地的盡頭到海角，攏總眏望汝。」（《詩篇》65:5）
[1] Pak-hái：北海，是佇咧不列顛群島、歐洲大陸佮斯堪的納維亞半島中間的海，是大西洋一部分。 ↩
[2] 報頭風：因為天時臨時做下氣壓，致到雄雄衝風（chhèng-hong）不止生狂，往往紲生狂雨。也講「起報頭」。 ↩
[3] 起錠，普通話講「起錨」；升篷，普通話講「起帆」；歇篷，普通話講「收帆」。笨，普通話講「甲板」。笨面，普通話著是「甲板上」。 ↩
[4] Ko-lân：高蘭，當時荷蘭共和國的一个省，號做「高蘭登邦」，著是今仔日的「芬洛」（Venlo）。 ↩
[5] Tān-kok：但國，著是丹麥國。 ↩
[6] 火船：也號做火薰船。著是當今所講的輪船。 ↩
[7] chhún-to̍k：忖度，這是古漢文的詞，意思是「推測（chhui-chhek）」、「按算」。 ↩