Hoa Bo̍k-su siá-ê.
Biān-tiān ê pún-tōe lâng chōe-chōe sī khiā tī chhim-soaⁿ chhiū-nâ khòng-iá ê só͘-chāi. In bōe hiáu-tit khí-chhù, put-kò sī tah-liâu nā-tiāⁿ; khah chōe sī m̄-bat jī, lóng-sī phah-la̍h, bán soaⁿ·ni̍h ka-kī hoat ê ké-chí lâi chia̍h.
Sui-bóng choh-chhân chóng-sī tām-po̍h nā-tiāⁿ. In put-chí sìn siâ, chin kāu khiàn-sńg. Tī gō͘-cha̍p nî chêng, ū Hoe-kî kok ê bo̍k-su khì hia thoân tō-lí, siat gī-o̍h. Bô kúi nî chiū kúi-nā chheng lâng chiap-la̍p tō-lí. Chit-tia̍p ū nn̄g-bān gōa lâng niá sóe-lé. Tùi in thàn tō-lí í-āu phah-la̍h soah, chiū-sī ha̍k-si̍p choh-sit, khí-chhù, tùi án-ni chiū ná khah ū chhun-chhóa. Tī cha̍p-gōa nî chêng in ū tôe saⁿ-bān kho͘ lâi khí kúi-nā keng thoân tō-lí ê tōa-o̍h, koh tôe chi̍t-bān gō͘-chheng kho͘, beh chòe chiah-ê o̍h ê só͘-hùi. Ta̍k-nî iā tio̍h tôe pún-tông ê bo̍k-su, kò͘-tn̂g kap tn̂g-lāi ê só͘-hùi. M̄-nā sī tôe chiah-ê, ia̍h tio̍h koh tôe soan-tō-hōe ê gûn.
Bat ū liân-liân la̍k-chhit nî só͘ pò͘ ê tiū, lóng ū khit niáu-chhú chia̍h·khì. Ū nî chia̍h chiâⁿ pòaⁿ, ū nî chia̍h kàu beh liáu. Lâng chiū ēng to̍k-io̍h khì thāu. Āu-lâi chiū tng niáu-chhú lâi kè tǹg. Chiàu lâng khòaⁿ, liân in pún-tông ê só͘-hùi phah-sǹg put-chí oh tôe kàu chiok, thái-thó ōe tôe kàu soan-tō-gûn? Ū chi̍t-ê lé-pài-ji̍t gōa-kok ê bo̍k-su kóng tō-lí bêng-pe̍k, chip-sū the̍h cha̍p-kho͘ soan-tō-gûn beh lâi kau·i.
Bo̍k-su tōa gông-ngia̍h kóng, "Chiah-ê the̍h lâi, lín kiám bōe gō sí mah?"
Chip-sū ìn i kóng, "Goán iáu-kú ū niáu-chhú-á thang chí-ki, khòaⁿ hiah-ê m̄-bat tō-lí ê lâng ê lêng-hûn teh iau-gō."
Tōa-liōng siá-sì lâng ê hoán-tńg hó-gia̍h. Kian-līn chiú chîⁿ·ê hoán-tńg sòng-hiong. Chim-giân 11:24.
（花牧師寫的）
緬甸的本地儂濟濟是徛佇深山樹林曠野的所在。𢙠𣍐曉得起厝，不過是搭竂但但，較濟是毋捌字，攏是拍獵，挽山裡家己發的果子來食。雖罔作畻，總是淡薄但但。𢙠不止信邪，真厚俔顙，佇五十年前，有花旗國的牧師去遐傳道理，設義學。無幾年就幾若千儂接納道理。即疊有兩萬外儂領洗禮。對𢙠趁道理以後，拍獵煞，就是學習作穡、起厝，對按呢就乃較有伸徙[1]。佇十外年前𢙠有題三萬箍來起幾若間傳道理的大學，故題一萬五千箍，卜做遮个學的所費。逐年也著題本堂的牧師、顧堂佮堂內的所費。毋但是題遮个，亦著故題宣道會的銀。
捌有連連六七年所播的秞，攏有乞鳥鼠食去。有年食成半，有年食到卜了。儂就用毒藥去毒。後來就張[2]鳥鼠來過頓。照儂看，連𢙠本堂的所在拍算不止僫題到足，汰討會題到宣道銀？有一个禮拜日外國的牧師講道理明白，執事摕十箍宣道銀卜來交伊。
牧師大昂愕講，「遮个摕來，恁敢𣍐餓死嘛？」執事應伊講，「阮猶故有鳥鼠仔通止饑，看遐个毋捌道理的儂的靈魂咧枵餓。」
大量[3]捨施[4]儂的，反轉好額。堅吝[5]守錢的，反轉喪兇。（《箴言》11:24）