Choân-chiu kàu-hōe ê hiaⁿ-tī sìⁿ Ông miâ Pin ū sim-pū-á, sìⁿ Pò͘ miâ kiò Sò͘, káu hè, i ū tī Choân-chiu lú-o̍h tha̍k-chheh. Tī siâⁿ-lāi cha-bó͘ gín-á khah-chōe sī ê-hng-sî tò-khì chá-khí-sî ji̍p o̍h.
Saⁿ-ge̍h cha̍p-saⁿ chá Pin-hiaⁿ chhut-mn̂g khì bōe-io̍h, Pín-só khì chòe-kang. Hit-ji̍t Sò͘-ah kóng m̄-khì tha̍k, in ke-lāi ê gín-á kā i kóng, Nā m̄-khì tha̍k tio̍h tiàm chit-chhù tàu-saⁿ-kāng. Ū tia̍p-á-kú i chhut-khì, āu-lâi in ke-lāi ê gín-á chhē i bô, phah-sǹg káⁿ-sī khì tha̍k-chheh. Kàu khah oàⁿ Ko͘-niû ū chhe lâng khì i ê chhù chhē i, chhē lóng bô. Káⁿ-sī hō͘ lâng thau-chhōa-khì.
Pin-hiaⁿ siâng-khiā-lāi ū chi̍t-lâng pún-sī chòe-chha̍t, bat hō͘ koaⁿ-hú lia̍h-khì koaiⁿ-kaⁿ, pàng chhut-lâi bô jōa-kú, chit-lâng ta̍uh-ta̍uh thau-the̍h Pin-hiaⁿ ê mi̍h. Chit-ê gín-á chhut-khì chi̍t-khek-á kú, hit-lâng ia̍h khoán pau-ho̍k chhut-khì, kàu taⁿ hit-lâng iáu-bē tò-lâi. Ū lâng phah-sǹg káⁿ-sī hit-lâng thau-chhōa-khì. Thiaⁿ-kìⁿ kóng hit-ê gín-á tham-chia̍h, kiám-chhái ēng mi̍h phiàn i khì.
Chhiáⁿ hiaⁿ-tī chí-bē kap thoân tō-lí ê sian-siⁿ thòe goán sì-kòe bā khoàⁿ oē chhē·tio̍h bōe. Nā ū thiaⁿ-kìⁿ lâng teh bōe gín-á, á-sī bóe gín-á, chhiáⁿ tāi-ke thòe goán chhâ-khoàⁿ, thong-ti Choân-chiu tióng-chip chai.
Tân Soan-lēng siá·ê.
泉州教會的兄弟姓王名彬有新婦仔，姓傅名叫素，九歲，伊有佇泉州女學讀冊。佇城內諸姥囡仔較濟是暝昏時倒去，早起時入學。
三月十三早彬兄出門去賣藥，彬嫂去做工。彼日素仔講毋去讀，𢙠家內的囡仔共伊講，若毋去讀著坫即厝鬥相共。有疊仔久伊出去，後來𢙠家內的囡仔揣伊無，拍算敢是去讀冊。到較晏姑娘有差儂去伊的厝揣伊，揣攏無。敢是予儂偷抴去。
彬兄𫝛徛內有一儂本是做賊，捌予官府掠去關監，放出來無偌久，即儂沓沓偷摕彬兄的物，即个囡仔出去一刻仔久，彼儂亦款包袱出去，到當猶未倒來。有儂拍算敢是彼儂偷抴去。聽見講彼个囡仔貪食，敢彩用物騙伊去。
請兄弟姊妹佮傳道理的先生替阮四界䀛看會揣著𣍐。若有聽見儂咧賣囡仔抑買囡仔，請大家替阮查看，通知泉州長執知。
陳宣令寫的。