Tō͘ Bûn-an siá·ê.
Góa só͘ tha̍k Si̍t-la̍t hó siau-sit ê sū, góa ê sim put-chí hoaⁿ-hí, kám-siā Siōng-tè si-un hō͘ I ê lô͘-po̍k tit-tio̍h khui sin lé-pài-tn̂g. Góa beh thòe chit nn̄g lâng kî-tó, kiû Siōng-tè hō͘ in nn̄g lâng tit-tio̍h têng-thâu-siⁿ, ia̍h hō͘ in chīn gâu ín-chhōa pa̍t-lâng lâi ho̍k-sāi Siōng-tè, kui êng-kng tī I.
Lán ê hiaⁿ-tī Tīⁿ Pek-liân só͘ siá tī Sèng-hōe-pò, án-ni "Hok-kiàn lâng tī Si̍t-la̍t tāi-iok ū sì-bān, chóng-sī bô siat Hok-kiàn lâng ê lé-pài-tn̂g."
Chit-ê sū sī m̄-tio̍h, tek-khak ū chhò-gō͘, in-ūi tī Si̍t-la̍t ū lé-pài-tn̂g, kúi-nā keng, ū chi̍t keng miâ kiò "Hok-im-koán" tī hé-chhia-lō͘ kîⁿ, ū siat saⁿ-cha̍p gōa nî kú, Hok-kiàn lâng choan-choan lâi chū-chi̍p, put-chí chōe lâng lâi ho̍k-sāi Siōng-tè; ia̍h ū Bí-í-bí kàu ê lé-pài-tn̂g, Ông-ke kàu iā ū. Góa pún-sin chai kúi-nā lâng tī Si̍t-la̍t ū put-chí chhut-la̍t kóng tō-lí, só͘-í lī-ek chōe-chōe lâng. Góa só͘ siá án-ni, in-ūi lán ê hiaⁿ-tī chí-bē tī Chiang-choân kàu-hōe-lāi, ū kiáⁿ tiàm tī Si̍t-la̍t hu-hoa ê só͘-chāi. In nā tha̍k Sèng-hōe-pò thiaⁿ-kìⁿ Si̍t-la̍t bô lé-pài-tn̂g, phah-sǹg i ê sim chiū iu-būn, siông-siông teh siūⁿ in ê kiáⁿ khah bōe kì-tit tō-lí ê kà-sī, kiaⁿ-liáu thàn ka-kī ê e ì-sù, in-ūi bô lé-pài-tn̂g thang ho̍k-sāi Siōng-tè.
（杜文安（音）寫的）
我所讀「石叻好消息的事」，我的心不止歡喜，感謝上帝施恩予伊的奴僕得著開新禮拜堂。我卜替即兩儂祈禱，求上帝予𢙠兩儂得著重頭生，亦予𢙠盡𠢕引抴別儂來服侍上帝，歸榮光佇伊。
咱的兄弟鄭柏年所寫佇《聖會報》，按呢「福建儂佇石叻大約有四萬，總是無設福建儂的禮拜堂」。
即个事是毋著，的確有錯誤，因為佇石叻有禮拜堂，幾若間，有一間名叫「福音館」佇火車路墘，有設三十外年久，福建儂專專來聚集，不止濟儂來服侍上帝，亦有美以美教[1]的禮拜堂，王家教[2]也有。我本身知幾若儂佇石叻有不止出力講道理，所以利益濟濟儂。我所寫按呢，因為咱的兄弟姊妹佇漳泉教會內，有囝坫佇石叻虛華的所在[3]。𢙠若讀《聖會報》聽見石叻無禮拜堂，拍算伊的心就憂悶，常常咧想伊的囝較𣍐記得道理的教示，驚了趁家己的意思，因為無禮拜堂通服侍上帝。