Cha̍p-sì chiuⁿ.
Tē 3 chat. Chiàu sè-kan lâng khoàⁿ sī gûi-hiám·ê, chiàu Siōng-tè sī tiāⁿ-tio̍h pêng-an·ê.
10 chat. Siōng-tè tek-khak beh chiàu-kò͘ I só͘ sio̍k-hôe ê peh-sìⁿ.
13 chat. Chiàu lâng khoàⁿ bô thang ǹg-bāng, Mô͘-se hit-sî iû-goân kian-kò͘ sìn Siōng-tè.
15 chat. Siōng-tè nā hoan-hù tio̍h chēng-chēng khiā, á-sī tio̍h khí-lâi kiâⁿ, nn̄g-hāng pîⁿ-pîⁿ sī lán ê pún-hūn.
Siōng-tè nā hoan-hù tio̍h chìn-chêng kiâⁿ ji̍p gûi-hiám ê só͘-chāi, lán iû-goân tio̍h thàn.
16 chat. Siōng-tè nā hoan-hù tio̍h ji̍p gûi-hiám, I tek-khak beh chiàu-kò͘ lán, hō͘ lán oē keng-kè. Khoàⁿ 29 chat.
20 chat. Siōng-tè ēng nn̄g-hāng. Chi̍t-hāng sī kiù I ê peh-sìⁿ, chi̍t-hāng sī sím-phoàⁿ i ê tùi-te̍k.
29, 30 chat. Lâng nā choân-sim oá-khò Siōng-tè, chiah oē thoat-lī ta̍k-hō ê pháiⁿ.
Cha̍p-gō͘ chiuⁿ.
1-19 chat. Siōng-tè nā kiù lán put-lūn tùi sím-mi̍h kan-khó͘, lán tio̍h o-ló kám-siā I. Kàu thian-tông beh án-ni gîm. Khoàⁿ Be̍k 15:3.
22 chat. Tit-tio̍h hok-khì liáu chiah tú-tio̍h chhì-liān. Khoàⁿ Lō͘-ka 4:1, 2.
23, 24 chat. Tio̍h kì-tit tī thiⁿ-lō͘ piⁿ ū chōe-chōe hāng ê kan-khó͘ chhì-liān, chiah-ê lóng sī Siōng-tè só͘ chai-iáⁿ tiāⁿ-tio̍h·ê.
25 chat. Siōng-tè oē hō͘ chiah-ê chhì-liān ê khó͘ pìⁿ tiⁿ. Koh chiah-ê chhì-liān oē hō͘ lán chai sim-lāi ê pháiⁿ.
26 chat. Ia̍h oē hō͘ lán kap Siōng-tè li̍p-io̍k kau-pôe, khah bat I.
27 chat. Keng-kè chhì-liān liáu chiah oē tit-tio̍h oa̍h, (Í-lîm ê chúi.) kap tōa-hok. (Chó-chhiū.)
Cha̍p-la̍k chiuⁿ.
3 chat. Í-sek-lia̍t peh-sìⁿ oē kì-tit chá-chêng ê hok-khì, bōe kì-tit chá-chêng ê kan-khó͘.
3-4 chat. Lán tio̍h siū hêng-hoa̍t ê sî, Siōng-tè ū-sî kàng tōa-hok hō͘ lán.
12, 13 chat. Tī khòng-iá·ni̍h ū thang chia̍h, chiū-sī sè-kan lâng lóng bōe-hiáu-tit·ê. Khoàⁿ Iok-hān 4:32-34.
14 chat. Má-ná sī koan-chiò Kiù-chú tùi thiⁿ lo̍h-lâi·ê.
15 chat. Sī Siōng-tè pe̍h-pe̍h siúⁿ-sù·ê.
18 chat. Ū kàu-gia̍h hō͘ chèng-lâng chia̍h-pá. Kūn-kūn tī sin-piⁿ. Khoàⁿ Lô-má 10:6-9.
20 chat. Cha-bō͘-ji̍t só͘ tit-tio̍h ê hok-khì bô kàu-gia̍h thang chòe kin-á-ji̍t ê bí-niû.
21 chat. Ji̍t-ji̍t tio̍h chia̍h hit-ê tùi thiⁿ lo̍h-lâi ê piáⁿ.
25 chat. Ū kàu lō͘-bé.
23-30 chat. Siōng-tè bē chhut cha̍p-tiâu-kài hit tāi-seng lâng ū siú an-hioh-ji̍t.
32 chat. Kàu thian-tông oē kì-liām tī sè-kan só͘ tú-tio̍h ê tāi-chì.
-----°-----
Chêng Sèng-hōe-pò ū kóng kàu saⁿ-ge̍h ìn Sèng-hōe-pò ê chóa beh oāⁿ khah hó·ê, in-ūi ū ke iân-chhiân chi̍t-ge̍h ji̍t kú.
Taⁿ chóa í-keng ū kàu·lah, chhin-chhiūⁿ chit ge̍h só͘ ìn ê chóa chiū-sī.
十四章
第3節，照世間儂看是危險的，照上帝是定著平安的。
10節，上帝的確卜照顧伊所贖回的百姓。
13節，照儂看無通眏望，摩西彼時猶原堅固信上帝。
15節，上帝若吩咐著靜靜徛，抑是著起來行，兩項平平是咱的本分。
上帝若吩咐著朝前行入危險的所在，咱猶原著趁。
16節，上帝若吩咐著入危險，伊的確卜照顧咱，予咱會經過。看29節。
20節，上帝用兩項，一項是救伊的百姓，一項是審判伊的對敵。
29，30節，儂若全心倚靠上帝，㱏會脫離逐號的否。
十五章
1-19節，上帝若救咱不論對甚物艱苦，咱著呵咾感謝伊。到天堂卜按呢吟。看《默》15:3。
22節，得著福氣了㱏拄著試煉。看《路加》4:1，2。
23，24節，著記得佇天路邊有濟濟項的艱苦試煉，遮个攏是上帝所知影定著的。
25節，上帝會予遮个試煉的苦變津。故遮个試煉會予咱知心內的否。
26節，亦會予咱佮上帝立約交陪，較捌伊。
27節，經過試煉了㱏會得著活（以琳的水）佮大福（棗樹）。
十六章
3節，以色列百姓會記得早前的福氣，𣍐記得早前的艱苦。
3-4節，咱著受刑罰的時，上帝有時降大福予咱。
12，13節，佇曠野裡有通食，就是世間儂攏𣍐曉得的。看《約翰》4:32-34。
14節，嗎哪是關照救主對天落來的。
15節，是上帝白白賞賜的。
18節，有夠額予眾儂食飽。近近佇身邊。看《羅馬》10:6-9。
20節，昨暮日所得著的福氣無夠額通做今仔日的米糧。
21節，日日著食彼个天落來的餅。
25節，有到路尾。
23-30節，上帝未出十條戒彼事先儂有守安歇日。
32節，到天堂會紀念佇世間所拄著的事誌。
-----°-----
前聖會報有講到三月印聖會報的紙卜換較好的，因為有加延延一月日久。
當紙已經有到啦，親像即月所印的紙就是。