Tē káu chiuⁿ.
Góa cháiⁿ-iūⁿ ōe chai góa ū tit-tio̍h kiù?
Má Bo̍k-su siá·ê.
Lūn lâng tit-tio̍h kiù á bô, Sèng-chheh ū kóng-khí hit ê pîn-kù, chīn kàu-gia̍h thang hō͘ lâng m̄-sái gî, só͘-í lâng ōe chai i ū chhut sí ji̍p oa̍h á bô. "Hó ê pêng-iú·ah! Taⁿ lán chòe Siōng-tè ê kiáⁿ." (Ⅰ Iok-hān 3:2.) "Góa sī chhim chai só͘ sìn ê Chú ōe chiàu-kò͘ góa só͘ thok-tiōng i kàu hit ji̍t." (Ⅱ Thê-mô͘-thài, 1:12).
1 Khún-kiû Siōng-tè hō͘ góa chai,
Góa sī tit-kiù, lóng bōe hāi,
Hō͘ góa khiā-chāi bô giâu-gî,
Sim-koaⁿ koat-toàn kàu chi̍t-sì.
2 Khó-sioh sim-lāi ta̍uh-ta̍uh kiaⁿ,
Siōng-tè an-ùi sòa bōe thiaⁿ,
Tùi-te̍k chīn chōe chīn lī-hāi,
Chú lâi kiù sī sim só͘ ài.
Lán tit-tio̍h kiù m̄-sī lán chòe khí-thâu Iâ-so͘ lâi chhiâⁿ bé, iā m̄-sī Iâ-so͘ chòe khí-thâu lán lâi chhiâⁿ bé. Siat-sú nā-sī án-ni lán chiū lóng bōe tit-tio̍h kiù. Lán tio̍h chai lán tú-tú sìn Iâ-so͘ ê sî sī hit-tia̍p liâm-piⁿ tit-tio̍h kiù, in-ūi lán tùi i ōe-tit chiâu-pī. (Ko-lô-se, 2:10). Khòaⁿ hit-ê lōng-chú tò-lâi, i ê lāu-pē chek-sî pò-iông hit-ê siau-sit kóng, "In-ūi góa chit-ê kiáⁿ sí ū koh oa̍h, sit-lo̍h ū koh tit-tio̍h." (Lō͘-ka, 15:24). Lí nā sìn iâ-so͘, Siōng-tè pún-sin tùi lí kóng lí ū tit-tio̍h kiù. Sèng-chheh ū kóng, " Sìn I ê Kiáⁿ ê lâng ū éng-oán oa̍h." (Iok-hān, 3:36). "Góa phoe kià lín, hō͘ sìn Siōng-tè ê Kiáⁿ ê lâng chai ū éng-oán oa̍h, hō͘ lín siông-siông sìn Siōng-tè ê Kiáⁿ. (Ⅰ Iok-hān 5:13).
1 Sè-kan chèng-lâng,
Tit Chú thiàⁿ-thàng,
Sim-koaⁿ óa-khò,
Iâ-so͘ kong-lô.
Sui-jiân tōa pháiⁿ,
Bián kiaⁿ siū hāi,
Siōng-tè chû-pi,
Bô ōe thang pí.
2 Góa chai góa Chú,
Tek-khak beh kiù,
Sìn I ê lâng,
M̄-sái choa̍t-bāng.
Chóng-sī góa gî,
Bōe-tit hoaⁿ-hí,
Ta̍uh-ta̍uh teh lún,
Kiaⁿ Chú bô ún.
3 Taⁿ kiû Sèng-sîn,
Kín-kín lîn-bín,
Hō͘ góa kian-kò͘,
Sìn-thàn Iâ-so͘,
Chiū sim pêng-an,
Bián-tit hoān-lān,
Kàu bé chiūⁿ-thiⁿ,
Kap Chú saⁿ-kiⁿ.
Pêng-iú·ah! Lí tio̍h ta̍uh-ta̍uh kì·tit lí tit-tio̍h kiù choan-choan sī khò Iâ-so͘ chiah ōe, lóng m̄-sī tùi pa̍t tiâu lō͘. Ū chi̍t pái Pí-tek thàn Iâ-so͘ ê chhùi lī-khui chûn kiâⁿ chúi-bīn, nā-sī hut-jiân siūⁿ-tio̍h hong chin thàu chiū kiaⁿ, liâm-piⁿ ài tiâm-lo̍h·khì. Lí ê bīn nâ bô ta̍uh-ta̍uh hiòng Iâ-so͘, sim nā bô siàu-liām·i, lí iā ōe tîm-le̍k tī tōa gûi-hiám, sòa ōe kiaⁿ-hiâⁿ bô pêng-an.
Hok-im só͘ chhiat-iàu ê tō-lí chiū-sī kóng, "Sìn chiah ōe tit-tio̍h kiù."
Kiám-chhái lí beh mn̄g góa, góa beh thái ōe chai góa sī sìn Chú ê lâng? Lí nā kàu-khàm Sèng-chheh, lí bián-tit mn̄g góa án-ni. Sèng-chheh ū chí-bêng ū nn̄g hāng ê sū éng-oán ū sio-liân, chiū-sī sìn kap kiâⁿ. Chí nn̄g-hāng bōe pun-khui·tit. Lí pún-sin nā ū sìn, koh lí ū kiâⁿ Siōng-tè ê tō-lí, chiū tek-khak ōe chai lí sī sìn Chú ê lâng á m̄-sī. "Sio̍k Ki-tok·ê, sī chòe sin chhòng-chō ê lâng, kū ê tāi-chì í-keng bô, lóng-chóng ê tāi-chì têng ōaⁿ sin." (Ⅱ Ko-lîm-to, 5:17.)
1 Góa Chú Iâ-so͘,
Góa só͘ him-bō͘,
Sī ji̍t-ji̍t sìn,
Ná kú ná chìn,
Hō͘ sè-jîn chai,
Góa si̍t ho̍k-sāi,
Sim-lāi gōa-phê,
Sūn-thàn Thiⁿ-pē.
2 Kiû lí chiàu-kò͘,
Ta̍k ji̍t pó-hō͘,
Oē kiâⁿ kàu bé,
Thang kìⁿ Thiⁿ-pē,
Bián-tit sè-kan,
Hoân-ló chai-lān,
Phah-bô góa sìn,
Chú·ah! Khó-lîn.
Iâ-so͘ kóng, "Góa sī phû-tô chhiū, lín sī ki; kap góa nā sio-liân·ê, góa kap i sio-liân, chiū kiat chí chōe-chōe." (Iok-hān, 15:5). Thàn sè-sio̍k ê lâng kiám-chhái hó tek-hēng chōe, koh i ê phín-hēng chōe-chōe hāng thang khó-chhú, chóng-sī i nā kàu lîm-chiong, hiah-ê bōe hō͘ i e sim pêng-an. Lán nā-sī ūi-tio̍h Iâ-so͘ kiâⁿ sím-mi̍h tāi-chì, sui-jiân chin-chiàⁿ bô kàu-gia̍h thang kiù lán, iáu-kú thang lia̍h-chòe sī pîn-kù, lán ū sìn I. Iâ-so͘ pún-sin ū kóng, "Tùi in ê ké-chí ōe bat I." (Má-thài, 7:16).
第七章
我怎樣會知我有得著救？
（馬牧師[1]寫的）
論儂得著救抑無，聖冊有講起彼个憑據，盡夠額通予儂毋使疑，所以儂會知伊有出死入活抑無。「好的朋友啊！當咱做上帝的囝」（《Ⅰ約翰》3:2）；「我是深知所信的主會照顧我所託仗伊到彼日」（《Ⅱ提摩太》1:12）。
1、
懇求上帝予我知，
我是得救，攏𣍐害，
予我徛在無堯疑，
心肝決斷到一世。
2、
可惜心內沓沓驚，
上帝安慰紲𣍐聽，
對敵盡濟盡厲害，
主來救是心所愛。
咱得著救，毋是咱做起頭，耶穌來成尾；也毋是耶穌做起頭，咱來成尾。設使若是按呢，咱就攏𣍐得著救。咱著知咱拄拄信耶穌的時是佇彼疊連鞭得著救，因為咱對伊會得褿備（《歌羅西》2:10）。看彼个浪子倒來，伊的老父即時播揚彼个消息講，「因為我即个囝是有故活，失落有故得著（《路加》15:24）。」汝若信耶穌，上帝本身對汝講汝有得著救。聖冊有講，「信伊的囝的儂有永遠活（《約翰》3:36）」。「我批寄恁，予信上帝的囝的儂知有永遠活，予恁常常信上帝的囝（《Ⅰ約翰》5:13）」
1、
世間眾儂，
得主疼通，
心肝倚靠，
耶穌功勞。
雖然大否，
免驚受害，
上帝慈悲，
無會通比。
2、
我知我主，
的確卜救，
信伊的儂，
毋使絕望。
總是我疑，
𣍐得歡喜，
沓沓咧忍，
驚主無允。
3、
當求聖神，
緊緊憐憫，
予我堅固，
信趁耶穌，
就心平安，
免得犯亂，
到尾上天，
佮主相見。
朋友啊！汝著沓沓記得汝得著救，專專是靠耶穌㱏會，攏毋是對別條路。有一擺彼得趁耶穌的喙，離開船，行水面，但是忽然想著風真透，就驚，連鞭愛沉落去。汝的面若無沓沓向耶穌，心若無數念伊，汝也會沉溺佇大危險，紲會驚惶無平安。
福音所切要的道理就是講，「信㱏會得著救。」
敢彩汝卜問我，我卜汰會知我是信救的儂？汝若校勘聖冊，汝免得問我按呢。聖冊有指明有兩項的事永遠有相連，就是「信」佮「行」。此兩項𣍐分開得。汝本身若有信，故汝有行上帝的道理，就的確會知汝是信主的儂抑毋是。「屬基督的，是做新創造的儂，舊的事誌已經無，攏總的事誌重換新。（《Ⅱ哥林多》5:17）」
1、
我主耶穌，
我所欣慕，
是日日信，
乃久乃進，
予世人知，
我實服侍，
心內外皮，
順趁天父。
2、
求汝照顧，
逐日保護，
會行到尾，
通見天父，
免得世間，
煩惱災難，
拍無我信，
主啊！可憐。
耶穌講，「我是葡萄樹，恁是枝，佮我若相連的，我佮伊相連，就結籽濟濟。（《約翰》15:5）」趁世俗的儂敢彩好德行濟，故伊的品行濟濟項通可取，總是伊若到臨終，遐个𣍐予伊的心平安。咱若是為著耶穌行甚物事誌，雖然真正無夠額通救咱，猶故通掠做是憑據，咱有信伊。耶穌本身有講，「對𢙠果子會捌伊。（《馬太》7:16）」
耶穌有問咱，「汝疼我無？」汝若會老實講，「主汝無一項毋知，汝知我疼汝，」汝真正離開天國無遠。
[1] 馬牧師：指倫敦會的馬約翰牧師（Rev. John Macgowan，1835-1922）。 ↩