Hō͘ I-seng siá·ê.
Tiong-kok lâng chōe-chōe hāng ê phòa-pīⁿ khah chōe ê iân-kò͘ sī tùi bô chheng-khì khí. Ū-sî sī tōe-hng ê lâ-sâm, ū-sî sī chhù-lāi ê lâ-sâm, ū-sî sī sin-khu ê lâ-sâm. Khó-sioh chōe-chōe lâng m̄-bat chit-ê sū, chhin-chhiūⁿ ū lâng phòa-pīⁿ tùi khí-thâu kàu taⁿ i lóng m̄-ài ōaⁿ-saⁿ, sóe sin-khu. Koh chhù-lāi pâng-keng kap mi̍h-kiāⁿ, í-ki̍p bîn-chhn̂g piⁿ chōe-chōe ê lâ-sâm, ná kú chek-chū ná chōe hō͘ i chiâⁿ phòa-pīⁿ, i lóng m̄-chai ū hām-hāi. Che si̍t-chāi ū gûi-hiám, si̍t-chāi sī chhò-gō͘. Ta̍k lâng ê pún-hūn tio̍h chheng-khì. Che chheng-khì ê hoat-tō͘ ōe chiàu-kò͘ sin-thé khah bô pīⁿ-thiàⁿ.
Lâng nā ū phòa-pīⁿ só͘ tiàm ê pâng-keng lóng m̄-thang lâu chi̍t-tiám-á ê ù-òe. Kò͘ pīⁿ-lâng·ê ê pún-sin tio̍h siat-hoat hō͘ pīⁿ-lâng ê chhn̂g-pho͘, óaⁿ, tī, tháng, ô͘, thâm-koàn, thô͘-kha pí pêng-sî khah chheng-khì; ha̍p-gî ji̍t-ji̍t tio̍h chheng. Góa chai chit-hō ê hoat-tō͘ m̄-sī ha̍p lâng só͘ ài; chōe-chōe lâng hiâm kóng, "Che ōe gûi-hiám thang kiaⁿ, nā ōaⁿ saⁿ ōe kám-hong, sóe sin-khu ōe phah-chhìn, sàu thô͘-kha sī hā-chiān, khui-mn̂g khui-thang ōe sahⁿ-tio̍h hong." Í-gōa iáu ū chōe-chōe hāng pêng-sî só͘ kò͘-chip ê m̄-hó, chhin-chhiūⁿ lim-chia̍h sèng-chêng.
Taⁿ lâng tek-khak tio̍h siūⁿ ēng lâ-sâm ê só͘-chòe lâi hāi-tio̍h sin-khu khah tio̍h, á-sī ēng chheng-khì ê hoat-tō͘ lâi pó-hō͘ sin-khu khah hó. Góa ǹg-bāng ta̍k só͘-chāi ê hōe-iú ōe hiáu-tit khah tì-ì chheng-khì ê tāi-chì, khah hó-táⁿ tû-khì kū ê khiàn-sńg kap lâ-sâm ê mi̍h, put-lūn tī sim-lāi, á chhù-lāi. M̄-thang phah-sǹg ū tām-po̍h lī-ek, á-sī nā tû-khì lóng-chóng ê lâ-sâm ū khah gûi-hiám ê sū lâu·teh. M̄-nā án-ni góa iā ǹg-bāng ta̍k só͘-chāi ê lé-pài-tn̂g iā tio̍h chheng-khì. Tio̍h siat thang-á, thang tit-tio̍h kng, thang tit-tio̍h ióng-khì; nā bô kng chiū tn̂g-lāi ōe àm, nā bô khui mn̂g khui thang chiū chōe-chōe hāng ê tîn-ai ōe chek-chū iā pháiⁿ khòaⁿ, koh pîn-kù lâng ê pîn-toaⁿ. Ū-sî Bo̍k-su, I-seng, Ko͘-niû chhut-mn̂g khì sûn-sī sèng-hōe khòaⁿ ū só͘-chāi ê kàu-hōe lóng bōe hiáu-tit pó-sioh sèng-keng, ū pún phòa iā m̄ siu-lí, tì-kàu thâu-bé kúi-nā chiuⁿ bô-lô·khì. Lé-pài-tn̂g lāi ê tâi-téng, í, toh, chhù-téng, thô͘-kha lóng sī tîn-ai. Koh hōe-iú ji̍p lé-pài-tn̂g lāi iā bô chim-chiok in só͘ phùi ê phīⁿ, thâm, nōa. Koh chí-bē lóng bô iok-sok ka-kī kap in ê kiáⁿ; pún-sin lâi kóng-khí chōe-chōe chhiàu-tâm, á-sī tâm-lūn êng-á-ōe, iā bô iok-sok in ê hāu-siⁿ cha-bó͘-kiáⁿ, ū-sî chí-bē sòa ài kap gín-á tàu hōa, hō͘ i chia̍h mi̍h-chia̍h, bô kà-sī gín-á ho̍k-sāi Siōng-tè ê lé. Ū-sî hiaⁿ-tī tòa in ê tàⁿ-thâu hē tī lé-pài-tn̂g, lóng bô chi̍t lâng kìm·i, iā lóng bô siūⁿ ōe phah lâ-sâm Sèng-tiān, kap kiáu-jiáu tio̍h ho̍k-sāi Siōng-tè ê sū, tì-kàu hō͘ jīm-chit ê lâng tāi-ke khòa-lū, só͘-í góa kán-kán lâi siá chiah-ê iàu-kín ê ōe ǹg-bāng tāi-ke tit-tio̍h lī-ek.
（厚醫生[1]寫的）
中國儂濟濟項的破病，較濟的緣故是對無清氣起。有時是地方的垃儳，有時是厝內的垃儳，有時是身軀的垃儳。可惜濟濟儂毋捌即个事，親像有儂破病，對起頭到當伊攏毋愛換衫，洗身軀。故厝內、房間佮物件，以及眠床繃濟濟的垃儳，乃久積聚乃濟，予伊成破病，伊攏毋知有陷害。這實在有危險，實在是錯誤。逐儂的本份著清氣。這清氣的法度會照顧身體較無病疼。
儂若有破病所坫的房間攏毋通留一點仔的污穢。顧病儂的，的本份著設法予病儂的床鋪、碗、箸、桶、壺、痰罐、塗骹比平時較清氣，合宜日日著清。我知即號的法度毋是合儂所愛，濟濟儂嫌講，「這會危險通驚，若換衫會感風，洗身軀會拍凊；掃塗骹是下賤，開門開窗會歃著風。」以外猶有濟濟項平時所固執的毋好，親像啉食、性情。
當儂的確著想，用垃儳的所做來害著身軀較著，抑是用清氣的法度來保護身軀較好。我眏望逐所在的會友會曉得較致意清氣的事誌，較好膽除去舊的俔顙佮垃儳的物，不論是心內，抑厝內。毋通拍算有淡薄利益，抑是若除去攏總的垃儳有較危險的事留咧。毋但按呢，我也眏望逐所在的禮拜堂也著清氣。著設窗仔，通得著光，通得著氧氣。若無光就堂內會暗，若無開門開窗就濟濟項的塵埃會積聚，也會否看，故憑據儂的貧懶。有時牧師、醫生、姑娘出門去巡視聖會，看有所在的教會攏𣍐曉得保惜聖經，有本破也毋修理，致到頭尾幾若章無無去。禮拜堂內的檯頂、椅、桌、厝頂、塗骹攏是塵埃。故會友入禮拜堂內也無斟酌𢙠所呸的鼻、痰、瀾。故姊妹攏無約束家己佮𢙠的囝，本身來講起濟濟笑談，抑是談論閒仔話，也無約束𢙠後生、諸姥囝，有時姊妹紲愛佮囡仔鬥嘩[2]，予伊食物食[3]，無教示囡仔服侍上帝的禮。有時兄弟帶𢙠的擔頭[4]下佇禮拜堂，攏無一儂禁伊，也攏無想會拍垃儳聖殿，佮攪擾著服侍上帝的事，致到予任職的儂大家掛慮，所以我簡簡來寫遮个的要緊的話，眏望大家得著利益。