ÛN-SIO. Goán siá chit kúi jī hō͘ lín tāi-ke chai, chhiáⁿ lín kap goán saⁿ-kap kám-siā Siōng-tè.
Goán chit-pang ū kúi-nā lâng saⁿ-kap chhut-mn̂g khì bōe chheh, thoân-tō, ia̍h ū kúi-nā ê sian-siⁿ kap goán khì. Khì ê sî ì-sù sī ài beh khì Tiô-chiu, á-sī Chiàu-an, á-sī Tang-soaⁿ; chóng-sī chhut-mn̂g ê sî khì tòa tī Ûn-sio, ì-sù ia̍h-sī ǹg-bāng tī hia tit-tio̍h tú-hó ê chhù thang chòe lé-pài-tn̂g. Taⁿ só͘ ū·ê sī tī Ē-póaⁿ, ū chi̍t keng sī sòe-sòe ê, chiū-sī lâi i-koán tit-tio̍h tō-lí ê lâng ê. Goán tiàm hia kúi-nā ji̍t, khì sì-ûi bōe chheh, ia̍h put-chí hó ki-hōe; chóng-sī Ûn-sio koe-chhī ê lâng khah bô hoaⁿ-hí sêng-siū.
Goán koh khí-sin ū chi̍t ji̍t kàu Tân-tē, chhē lâi i-koán ê lâng. Ū-ê chin hó khoán-thāi goán; ū-ê beh bóe mi̍h saⁿ chhiáⁿ; goán m̄. Tùi án-ni khòaⁿ siat i-koán m̄-nā lī-ek lâng ê seng-khu, ia̍h lī-ek in ê lêng-hûn. Tī hia ki-hōe ia̍h sī chin hó.
Keh-ji̍t kàu Nâ-thâu ê lé-pài-tn̂g, sī Sòaⁿ-thâu lâi siat·ê. Sian-siⁿ kap hiaⁿ-tī chin hó khoán-thāi goán.
Pài-la̍k kàu Bôe-chiu, ia̍h sī hó ki-hōe.
Pài-it kàu Sai-po͘ hi; iân-lō͘ ū bōe chōe-chōe chheh.
Pài-jī iû-goân tiàm hia; chheh bōe kàu teh-beh liáu.
Pài-saⁿ tùi Sai-po͘ tah chûn siūⁿ beh lâi Le̍h-sī; nā-sī kàu To͘-be-á chiū hō͘ lâi; āu-ji̍t kàu Ûn-sio. Só͘ chhun ê chheh taⁿ bô lōa-chōe só͘-í m̄-sái khì pa̍t só͘-chāi.
Chhiáⁿ hiaⁿ-tī ūi-tio̍h goán só͘ chòe ê kang kî-tó; ia̍h tio̍h thòe Ûn-sio kî-tó, in-ūi hit só͘-chāi ê lâng chin chōe, koh chiàu goán só͘ thiaⁿ-kìⁿ ê ōe, beh tī hia siat lé-pài-tn̂g ia̍h ū chin chōe lâng hiâm, taⁿ iā ū kúi-nā lâng lâi kóng beh sè-chhù. Kiû Siōng-tè khui chèng-lâng ê sim, tī hia bô chó͘-tòng, ōe tit-tio̍h chiâⁿ. Sim só͘ goān.
―――――――○――――――――
PA-PÒ͘-A. O-tāi-lī-a ê pak-sì ū chi̍t ê hái-sū miâ kiò Pa-pò͘-a. Hit ūi ū lâng pún ū pài kúi-sîn, lóng m̄-bat tō-lí. Eng-kok ê lâng khì hia thoân Siōng-tè kok ê Hok-im, kàu chōe-chōe lâng sìn Chú ji̍p Sèng-hōe. Kūn-lâi hit só͘-chāi sìn Chú ê lâng chū-chi̍p chòe thoân-tō hōe. Hit-tia̍p ū chi̍t lâng kia̍h chi̍t ki chhiuⁿ khí-lâi kóng, "Chêng lán siông-siông kia̍h chit-hō. Nā bô kia̍h·i m̄-káⁿ khì chhài-hn̂g; pê chûn-á ê sî ta̍uh-ta̍uh ū hē i tī chûn·ni̍h; kiâⁿ-lō͘ ê sî ū kia̍h·i; khì khùn ê sî ū lok i tī sin-piⁿ; teh chia̍h ê sî ia̍h sī án-ni. Taⁿ lóng m̄-sái ēng·i, sī in-ūi sím-mi̍h iân-kò͘? Sī in-ūi lán í-keng tit-tio̍h Sèng-keng, tùi chit pún lán tit-tio̍h pêng-an, hō͘ lán lóng m̄-sái kiaⁿ, bián koh kia̍h chhiuⁿ."
―――――――○――――――――
Tī MÁ-ta̍t-ka-su-ka ê tōa hái-sū ū chi̍t lâng miâ Lâi-in. I chòe lâng ê lô͘-châi, thiaⁿ tō-lí, sìn Chú ji̍p kàu, āu-lâi lâng kéng i chòe bo̍k-su. Nā-sī i chòe lâng ê lô͘-châi tio̍h sūn chú-lâng ê iok-sok, tì-kàu bô thang choan-choan pān bo̍k-su ê chit-jīm. I chiū nn̄g nî kú siông-siông kî-tó Siōng-tè hō͘ i ōe-tit-thang thoat-lī lô͘-châi, thang lâi chīn i bo̍k-su ê chit-jīm. Chhat-put-to só͘ kî-tó beh bô ǹg-bāng. Kai-chài ū chi̍t-pái chi̍t ê lô͘-châi put-chí chīn-tiong tī kàu-hōe, chiū chiong chit-ê tāi-chì khì kā Cháiⁿ-siòng kóng. Āu-lâi Cháiⁿ-siòng chiū chhiáⁿ i khì ông-kiong lāi kóng tō-lí. Lú-ông thiaⁿ-kìⁿ i só͘ kóng ê tō-lí chin hoaⁿ-hí, chiū chiong gō͘-cha̍p kho͘ hō͘ i khì tùi i ê chú-lâng sio̍k-sin, thang choan-choan chòe Chú ê kang.
Taⁿ i tit-tio̍h thàu-pàng m̄-nā chòe bo̍k-su, ia̍h sòa kà o̍h, i sui-jiân bô put-chí bat jī, iáu-kú lī-ek lâng chin chōe. Án-ni lán tha̍k i m̄-nā chai chit-ê lâng chòe Siōng-tè chīn-tiong ê lô͘-po̍k, ia̍h chai Lú-ông thiàⁿ i ê peh-sìⁿ, hoaⁿ-hí lâng pài Siōng-tè.
―――――――○――――――――
Goán ū chih-tio̍h Lí I-seng ê phoe kóng 7 ge̍h 19 ji̍t phah-sǹg ōe kàu Hiong-káng.
KÈ-CHHŌA Ê SŪ. Kū-nî cha̍p-it ge̍h ū chhiáⁿ lia̍t-ūi siá "Kè-chhōa ê tāi-chì." Kàu kin-nî sì-ge̍h chiong ū siu sì tiuⁿ, chiū-sī Bí-chú, Ti put-chiok chai, Lio̍h-á-chai, Bú-chhú, só͘ siá·ê. Taⁿ goán ū chim-chiok khòaⁿ lâi chhú thâu-miâ Lio̍h-á-chai, chiū-sī N̂g Te̍k-siān, jī miâ Bú-chhú, chiū-sī Iûⁿ Ki-ūi, lâi siúⁿ thâu-miâ nn̄g kho͘, jī miâ chi̍t kho͘.
―――――――: ―――――――
Gō͘ ge̍h jī-cha̍p poeh ji̍t Khiⁿ-bé kàu-hōe Chhî Pō͘-tîn kè-óng.
La̍k ge̍h cha̍p-jī ji̍t Sin-koe-á kàu-hōe Lí Chiong-biāu kè-óng.
雲霄。阮寫即幾字予恁大家知，請恁佮阮相合感謝上帝。
阮即班有幾若儂相合出門去賣冊、傳道，亦有幾若个先生佮阮去。去的時意思是愛卜去潮州，抑是詔安[1]，抑是東山[2]，總是出門的時去蹛佇雲霄。意思亦是眏望佇遐得著拄好的厝通做禮拜堂。當所有的是佇下坂[3]，有一間是細細的。阮坫遐幾若日，去四圍賣冊，亦不止好機會，總是雲霄街市的儂較無歡喜承受。
阮故起身有一日到陳岱[4]，揣來醫館[5]的儂。有的真好款待阮，有的卜買物相請，阮毋。對按呢看，設醫館毋但利益儂的身軀，亦利益𢙠的靈魂。佇遐機會亦是真好。
隔日，到林頭[6]的禮拜堂，是汕頭來設的。先生佮兄弟真好款待阮。
拜六到梅洲[7]，亦是好機會。
拜一到西埔[8]墟，沿路有賣濟濟冊。
拜二猶原坫遐，冊賣到咧卜了。
拜三對西埔搭船想卜來列嶼[9]，但是到礁尾仔[10]就雨來，後日到雲霄。所賰的冊，當無偌濟，所以毋使去別所在。
請兄弟為著阮所做的工祈禱，亦著替雲霄祈禱，因為彼所在的儂真濟，故照阮所聽見的話，卜佇遐設禮拜堂亦有真濟儂嫌，當也有幾若儂來講卜稅厝。求上帝開眾儂的心，佇遐無阻擋，會得著成。心所願。
巴布亞。澳大利亞的北勢有一个海嶼名叫「巴布亞[11]」。彼位有儂本有拜鬼神，攏毋捌道理。英國的儂去遐傳上帝國的福音，到濟濟儂信主入聖會。近來彼所在信主的儂聚集做傳道會。彼疊，有一儂揭一支鎗起來講，「前，咱常常有揭即號，若無揭伊，毋敢去菜園；耙船仔的時沓沓有下伊佇船裡；行路的時有揭伊；去睏的時有落[12]伊佇身邊；咧食的時亦是按呢。當攏毋使用伊，是因為甚物緣故？是因為咱已經得著聖經，對即本咱得著平安，予咱攏毋使驚，免故揭鎗。」
――
佇馬達加斯加[13]的大海嶼有一儂名「萊茵」。伊做儂的奴才，聽道理，信主入教。後來儂揀做牧師。但是伊做儂的奴才，著順主儂的約束，致到無通專專辦牧師的職任。伊就兩年久常常祈禱上帝予伊會得通脫離奴才，通來盡伊牧師的職任。差不多所祈禱卜無眏望。佳哉有一擺一个牧師去巡教會看見即个奴才，不止盡忠佇教會，就將即个事誌去共宰相講。後來宰相就請伊去王宮內講道理。女王聽見伊所講的道理，真歡喜，就將五十箍予伊去對伊的主儂贖身，通專專做主的工。
當伊得著敨放，毋但做牧師，亦紲教學。伊雖然無不止捌字，猶故利益儂真濟。按呢咱讀伊毋但知即个儂做上帝盡忠的奴僕，亦知女王疼伊的百姓，歡喜儂拜上帝。
――
阮有接著李醫生[14]的批，講7月19日拍算會到香港。
嫁抴的事。舊年十一月有請列位寫「嫁抴的事誌。」到今年四月終，有收四張，就是「美主（音）」、「知不足齋」、「略仔知」、「武取（音）」所寫的。當阮有斟酌看，來取頭名「略仔知」，就是「黃擇善[15]」；二名「武取」，就是「楊基位（音）」，來賞頭名兩箍，二名一箍。
――
五月二十八日，坑尾教會徐步塵（音）過往。
六月十二日新街仔教會李章妙（音）過往。
[1] Chiàu-an：詔安，縣名，著是當今漳州市詔安縣。 ↩
[2] Tang-soaⁿ：東山，地名號，舊底屬詔安所管，當今是漳州市的一个縣。 ↩
[3] Ē-poáⁿ：下坂，社名，著是當今漳州市雲霄縣雲陵鎮下坂村。 ↩
[4] Tân-tē：陳岱，地號名，著是當今雲霄縣陳埭鎮。 ↩
[5] 醫館：是咧講當時英國長老教會厚雅各醫生等儂去設佇漳浦城關的「源梁醫院」即間教會醫館。 ↩
[6] Nâ-thâu：林頭，社名，著是當今漳州詔安縣四都鎮林頭村。 ↩
[7] Bôe-chiu：梅洲，地號名，著是當今漳州詔安縣梅洲鄉。 ↩
[8] Sai-po͘：西埔，地號名，著是當今漳州東山縣西埔鎮。 ↩
[9] Lē-sī：列嶼，地號名，正確是「Le̍h-sī」，著是當今漳州雲霄縣列嶼（峛嶼）鎮。金門縣也有列嶼。 ↩
[10] To͘-be-á：查考附近的地號名，攏查無。拍算是寫毋著，照講是Ta-bé-á (礁尾仔)㱏著。著是當今雲霄縣陳岱鎮礁美村。 ↩
[11] Pa-pò͘-a：巴布亞，海嶼地號名，著是當今的巴布亞群島，包括屬印尼國所管的巴布亞省，佮巴布亞紐幾內亞即个國家。 ↩
[12] lok：落，著是下咧、放咧的意思。 ↩
[13] Má-ta̍t-ka-su-ka：馬達加斯加，著是當今馬達加斯加共和國（法語：République malgache, Repoblikan\'i Madagasikara），是非洲東爿靠印度洋的海嶼國。 ↩
[14] 李醫生：著是Dr. A. L. Macleish，佇廈門有號中國名「李阿祉」，蘇格蘭儂，詳見《聖會報儂名檔》。 ↩
[15] N̂g Te̍k-siān：黃擇善，捌佇泉州城的堂會做傳道，詳見《聖會報儂名檔》。 ↩