Ông Kî-sióng siá·ê.
Chí gō͘-ge̍h cha̍p-gō͘ ê lé-pài ū chiap-la̍p poeh ê ta-po͘-lâng, chi̍t-ê hū-jîn-lâng, kiōng káu lâng, hō͘ i niá sóe-lé. Jī-jī ê lé-pài koh chiap-la̍p chi̍t-ê chí-bē, kap chi̍t ê gín-á hō͘ i niá sóe-lé. Che sī hō͘ lán thang kám-siā Thiⁿ-pē ê tōa-un.
Gō͘-ge̍h chhoe-cha̍p kàu cha̍p-jī Sió-khe pò͘-tō-hōe chū-chi̍p tī Póaⁿ-á. Lâi hù hōe ê bo̍k-su thoân-tō la̍k lâng, hiaⁿ-tī jī-cha̍p gōa lâng. Tī chhoe-cha̍p ē-po͘ saⁿ-tiám tāi-seng chū-chi̍p chòe kî-tó-hōe, lâi thoân-tō kî-tó pek-chhiat kiû Sèng-sîn tōa pang-chān pò͘-tō-hōe, sì-bīn pò-iông tō-lí, ōe tit-tio̍h tōa kong-hāu.
Cha̍p-it ji̍t chhut-mn̂g pò-iông tō-lí ū thoân-tō sì lâng, hiaⁿ-tī poeh lâng pun chòe saⁿ lō͘ khì thoân tō-lí, khah chōe só͘-chāi tit-tio̍h hó ki-hōe.
Cha̍p-jī koh chhut-mn̂g ū bo̍k-su thoân-tō la̍k lâng hiaⁿ-tī cha̍p-sì lâng, kiōng jī-cha̍p lâng, pun chòe sì lō͘ khì thoân tō-lí, ia̍h sī hó ki-hōe chōe-chōe hoaⁿ-hí thiaⁿ chiap-la̍p tō-lí.
Tùi siat pò͘-tō-hōe kàu taⁿ, ū chōe-chōe hiaⁿ-tī hoaⁿ-hí kap tng-chit ê lâng sì-kòe hn̄g-kūn pò-iông tō-lí, chhut-la̍t tio̍h-bôa chòe Chú ê kang; án-ni Thiⁿ-pē hoaⁿ-hí si-un ēng tit-tio̍h kiù ê lâng ke-thiⁿ tī Sèng-hōe. Kàu-hōe ná heng-ōng, Mô͘-kúi ê kok chiū ná soe-bî, che sī chū-jiân ê tō-lí. Kūn-lâi Póaⁿ-á tōe-hng ê peh-sìⁿ khah chōe ū thiaⁿ-kìⁿ Hok-im ê tō-lí, chai sîn-pu̍t bo̍k-chú sī bô lō͘-ēng ê mi̍h, só͘-í chōe-chōe lâng pàng-sak ngó͘-siōng lâi kui-ho̍k Siōng-tè.
Liân ta̍k lâu-siā kin-nî ngiâ pu̍t-hiuⁿ ê tāi-chì ia̍h lóng khah soe-bî. Tī Chùn-sim lâu-siā ta̍k-nî chiaⁿ-ge̍h jī-sì ū chng sì ê giâ-kang pîⁿ tio̍h khai kúi-nā pah kho͘, kin-nî chiū bô chng pòaⁿ ê. Lâm-soaⁿ ta̍k-nî chng chi̍t pîⁿ, taⁿ hiah-ê chòe-thâu·ê lâi pài Siōng-tè ia̍h bô chng pòaⁿ ê. Chio̍h-kó͘-lâu ê Ông-kong ta̍k-nî ngiâ-hiuⁿ chin lāu-jia̍t, taⁿ hiah-ê sìⁿ So͘·ê tōa-pòaⁿ lâi pài Siōng-tè, m̄-nā lóng bô lāu-jia̍t sòa bô lâng beh kng. Lō͘-bé chiah Chùn-sim nn̄g lâng lâi kng. Lóng bô pòaⁿ hāng chēng-chauh-chauh, koe-lō͘ ê lâng chhiò kóng, "In ê kàu-hōe tī-teh heng, sîn-pu̍t ang-hu̍t chiū beh soe·lah."
Koh Pak-soaⁿ-keng ū cha̍p-gōa sian ê siàⁿ-pu̍t, hut-jiân chi̍t ji̍t keng-lāi hoat hé chiong chí cha̍p-gōa sian tōa sian pu̍t sio kàu o͘-sô-sô, ū ê pìⁿ hé-thòaⁿ. Tú-á sī Póaⁿ-á ê hi-ji̍t, chèng-lâng chhiò kóng, "Hiah ê sîn-pu̍t lóng bōe cháu, ia̍h bōe kiò kiù-lâng, khah su niáu-chhú kap koe káu." Koh chhim-chhân-keng chhit-ge̍h-pòaⁿ chòe tiong-goân chin lāu-jia̍t, hê-siūⁿ chia̍h ē-hng liáu, chhut-mn̂g lo̍h-ha̍k hō͘ hó͘ kā khì chia̍h. Tāi-tō-kong bōe kiù·i.
Lâm-soaⁿ siā chi̍t lâng khí-gōng, khì chhiáⁿ Chiam-chio̍h ê Tāi-tō-kong koh miâ Ngô͘ Chin-jîn, kóng ōe chòe i-seng, hit mî kap siáu-gōng ê lâng tòa chòe chi̍t-ūi. Kàu pòaⁿ-mî tiám chek ê hé-sái ka-la̍uh chháu-á phāng, hé chiūⁿ chhù, gōng ê cháu, Tāi-tō-kong bōe cháu sio kàu pìⁿ hé-thòaⁿ. Chèng-lâng chhiò kóng, "Tāi-tō-kong khah su chit-ê gōng·ê."
Án-ni góa kūn-lâi teh khòaⁿ Siōng-tè ta̍uh-ta̍uh kiâⁿ I ê koân-lêng bia̍t-bô Mô͘-kúi ê koân hō͘ i kiàn-siàu, bōe-tit thang théng-khí i ê khùi-la̍t lâi siong-hāi lâng. (Hi-pek-lâi 2:14.) Ia̍h kiâⁿ i ê koân-lêng ta̍k só͘-chāi ta̍uh-ta̍uh tiàu lâng lâi chòe i ê peh-sìⁿ, hō͘ Ki-tok ê kok ná khui-khoah. Lán chòe Chú ê chhe-ēng, kap chòe Chú ê peh-sìⁿ, thang hó-táⁿ chhut-la̍t pò-iông tō-lí chòe Chú ê kang, m̄-thang hoân-ló kiaⁿ-hiâⁿ pîn-tōaⁿ, tio̍h ti̍t-ti̍t óa-khò Chú ê khùi-la̍t, ǹg-bāng bô kú thian-kok ê tō-lí ōe tōa heng-ōng thàng kàu bān-kok; Mô͘-kúi tùi-te̍k lóng hâng-ho̍k Chú e kha-ē, sī sim só͘ ài·ê. Si. 110:1.
Póaⁿ-á lé-pài-tn̂g khí-hó, só͘ chhun ê tōe ū chai nn̄g-pah la̍k-cha̍p gōa châng ê gêng-chio, kū-nî ū bōe sì-cha̍p gōa chheng chîⁿ, chòe kong-hōe ê lō͘-ēng. Kū-nî pún tông-hōe ū koh bóe chi̍t khu chhân, kap chi̍t tè chhù-tē-á, kin-nî koh chai kúi cha̍p châng gêng-chio, só͘ siu ê chîⁿ ǹg-bāng bô-kú saⁿ-thiⁿ chòe ka-kī chhiáⁿ Bo̍k-su ê lō͘-ēng. Ǹg-bāng khòaⁿ Sèng-hōe-pò ê sian-siⁿ hiaⁿ-tī chí-bē siông-siông thòe Póaⁿ-á ê kàu-hōe kî-tó, hō͘ tāi-ke tâng-sim ūi-tio̍h Chú chhut-la̍t ài chiâⁿ tông-hōe lâi chhiáⁿ bo̍k-su, sī sim só͘ goān.
（王奇賞[2]寫的）
此五月十五的禮拜，有接納八个諸夫儂，一个婦人儂，共九儂，予伊領洗禮，二二的禮拜，故接納一个姊妹，佮一个囡仔，予伊領洗禮。這是予咱通感謝天父的大恩。
五月初十到十二，小溪佈道會聚集佇坂仔。來赴會的牧師、傳道六儂，兄弟二十外儂。佇初十下晡三點事先聚集做祈禱會，來傳道祈禱迫切求聖神大幫贈佈道會，四面播揚道理，會得著大功效。
十一日出門播揚道理，有傳道四儂，兄弟八儂，分做三路去傳道理。較濟所在得著好機會。
十二故出門，有牧師傳道六儂，兄弟十四儂，共二十儂，分做四路去傳道理，亦是好機會濟濟，歡喜聽，接納道理。
對設佈道會到當，有濟濟兄弟歡喜佮當職的儂四界、遠近播揚道理，出力、著磨，做主的工。按呢天父歡喜施恩，用得著救的儂加添佇聖會。教會乃興旺，魔鬼的國就乃衰微，這是自然的道理。近來坂仔地方的百姓較濟有聽見福音的道理，知神佛、木主[3]是無路用的物，所以濟濟儂放摔偶像來歸服上帝。
連逐樓社今年迎佛香[4]的事誌亦攏較衰微。佇圳心[5]樓社，逐年正月二四有粧四个蜈蚣棚[6]，著開幾若百箍，今年就無粧半个。南山[7]逐年粧一棚，當遐个做頭的來拜上帝，亦無粧半个。石鼓樓[8]的王公[9]逐年迎香真鬧熱，當遐个姓蘇的大半來拜上帝，毋但攏無鬧熱紲無儂卜掆。路尾㱏圳心兩儂來掆。攏無半項，靜寂寂[10]，街路的儂笑講，「𢙠教會佇咧興，神佛、尪佛就卜衰啦。」
故北山宮[11]有十外身的聖佛，忽然一日宮內發火將此十外身大身的佛燒到烏趖趖，有的變火炭。拄仔是坂仔的墟日，眾儂笑講，「遐个神佛攏𣍐走，亦𣍐叫救儂，較輸鳥鼠佮雞狗。」故心田宮[12]七月半做中元真鬧熱，和尚食暝昏了，出門落礐予虎咬去食。大道公[13]𣍐救伊。
南山社一儂起戇[14]，去請尖石[15]的大道公，故名吳真人，講會做醫生，彼暝佮痟戇的儂蹛做一位。到半暝點燭的火屎交落[16]草仔縫，火上厝，戇的走，大道公𣍐走，燒到變火炭。眾儂笑講「大道公較輸即个戇的」。
按呢我近來咧看上帝沓沓行伊的權能，滅無魔鬼的權予伊見笑，𣍐得通呈起伊的氣力來傷害儂。（《希伯來》2:14）亦行伊的權能逐所在沓沓召儂來做伊的百姓，予基督的國乃開闊。咱做主的差用，佮做主的百姓，通好膽出力播揚道理，做主的工。毋通煩惱、驚惶、貧懶，著直直倚靠主的氣力，眏望無久天國的道理會大興旺，𥦁到萬國。魔鬼、對敵攏降服主的骹下，是心所愛的。（《詩》110:1）
坂仔禮拜堂起好，所賰的地，有栽兩百六十外欉的弓蕉，舊年有賣四十外千錢，做公會的路用，舊年本堂會有故買一坵畻，佮一桗厝地仔，今年故栽幾十欉弓蕉，所收的錢眏望無久相添做家己請牧師的路用。眏望看《聖會報》的先生、兄弟姊妹常常替坂仔的教會祈禱，予大家同心為著主出力愛成堂會來請牧師，是心所願。
[2] Ông Kî-sióng：王奇賞，本地牧師。詳見《聖會報儂名檔》。 ↩
[3] bo̍k-chú：木主，著是神主。著是儂過身了後，柴刻咧予囝孫序細服侍的靈位。 ↩
[4] ngiâ pu̍t-hiuⁿ：迎佛香，著是迎神、割香。 ↩
[5] Chùn-sim：圳心，社名，著是當今平和縣坂仔鎮民主村圳心社。 ↩
[6] 蜈蚣棚：也號做蜈蚣陣，是漳、泉的鄉里咧迎神割香的時陣，所搭的一種陣頭，因為即種陣頭是一節紲一節，用儂掆，一節是一條長枋，枋仔頂有下神佛抑是佛轎，一陣長長，親像蜈蚣咧趖振動。 ↩
[7] Lâm-soaⁿ：南山，社名，著是當今平和縣坂仔鎮寶南村南山社。 ↩
[8] Chio̍h-kó͘-lâu：石鼓樓，社里名，是佇咧當今平和縣坂仔鎮民主村的石鼓樓小組，遐因為有起一落塗樓，號做石鼓樓。 ↩
[9] 王公：王爺公，境主、地方守護神即號的神明。 ↩
[10] chēng-chauh-chauh：靜寂寂。有的所在講chēng-chiauh-chiauh。 ↩
[11] Pak-soaⁿ-keng：北山宮，當時佇平和縣坂仔鎮仁山村北山社的宮廟。 ↩
[12] chhim-chhân-keng：心田宮，著是佇平和縣坂仔鎮心田村（也有寫做深田宮）。即間廟奉侍大道公（保生大帝）。 ↩
[13] Tāi-tō-kong：大道公，保生大帝，得道進前原名吳本，是道教的醫神。 ↩
[14] khí-gōng：起戇，這是漳州話，意思著是講儂頭殼起悾戇，悾歁。 ↩
[15] Chiam-chio̍h：尖石，社名，著是當今平和縣國強鎮古爽村尖石組。 ↩
[16] ka-la̍uh：交落。著是落（lak）落去。 ↩
[1] Poáⁿ-á：坂仔，地名號，著是當今漳州平和縣的坂仔鎮。 ↩