(Iok-hān 10:11-18.)
Ia̍p Hàn-chiong siá·ê.
Chit ê tôe-ba̍k ê tōa iàu-kín, sī lūn Kiù-chú gâu chiàu-kò͘ I ê ha̍k-seng, chhin-chhiūⁿ hó ê bo̍k-chiá ê gâu chiàu-kò͘ iûⁿ-kûn. Tāi-lio̍k pun nn̄g hāng.
1. Lūn chit ê tôe-ba̍k ê jū-i, chiū-sī bo̍k-chiá iúⁿ-chhī iûⁿ-kûn. Kiù-chú siat chit ê phì-jū, sī chiàu Iú-thài-lâng só͘ ōe hiáu-tit, in-ūi in chōe-chōe lâng chhī iûⁿ chòe ke-gia̍p. Hit ê gâu chiàu-kò͘ iûⁿ ê lâng, tek-khak chīn i kò͘ iûⁿ ê hoat-tō͘, chhòng iûⁿ-tiâu kian-kò͘ sóe-sàu chheng-khì, hō͘ iûⁿ-kûn tiàm. Chheng-chá chiū chhōa iûⁿ khì chháu-po͘ chia̍h chháu, ē-po͘ chiū chhōa kàu khoe-piⁿ á-sī chíⁿ-piⁿ chia̍h chúi, jiân-āu chiah kóaⁿ tò-lâi iûⁿ-tiâu hō͘ i hioh-khùn. Bô-lūn kôaⁿ-joa̍h ta̍k-ji̍t án-ni, bô m̄-sī beh hō͘ iûⁿ ióng-chòng siⁿ-thòaⁿ heng-ōng.
Kiám-chhái tú-tio̍h chhâi-lông kàu beh kā iûⁿ, chiū chīn-la̍t kap i saⁿ-chiⁿ, ài kiù iûⁿ bián siū siong-hāi. Ū-sî kap chhâi-lông saⁿ-chiⁿ kàu sit-lo̍h sìⁿ-miā ia̍h bat, che sī hó ê bo̍k-chiá iúⁿ-chhī iûⁿ ê sū.
2. Lūn chit ê tôe-ba̍k ê chiàⁿ-ì, chiū-sī Kiù-chú gâu chiàu-kò͘ I ê ha̍k-seng. In-ūi I ū ēng Sèng-chheh chòe hoat-tō͘, siông-siông kà-sī, koh kàng-lo̍h Sèng-sîn kám-hòa, hō͘ I ê ha̍k-seng sim-lāi tit-tio̍h tō-lí ê iúⁿ-chhī, ia̍h siat-li̍p tam-tng chit-jīm ê lâng tī-lí chek-tok, beh hō͘ I ê ha̍k-seng sim-sîn chheng-khì, phín-hēng toan-chong, chiàu tō-lí lâi kiâⁿ. Sim-chì thòe I ê ha̍k-seng pàng-sak sìⁿ-miā, in-ūi I ê ha̍k-seng hām-lo̍h tī Mô͘-kúi ê chhiú, siū Mô͘-kúi chè-ap, chīn-chāi gûi-hiám. Kiù-chú beh kiù·i, kam-goān pàng-sak sìⁿ-miā, hō͘ lâng tèng tī si̍p-jī-kè. Só͘-í kóng, Góa sī hó ê bo̍k-chiá thòe iûⁿ pàng-sak sìⁿ-miā. M̄-sī chhin-chhiūⁿ hit-tia̍p ê tha̍k-chheh-lâng, Hoat-lī-sài lâng, ài tit-tio̍h miâ-siaⁿ, chiah lâi kà-sī lâng, nā tú-tio̍h kan-khó͘ chiū m̄ kam-goān kiâⁿ i ê chit. Chóng-sī Kiù-chú lîm-kàu sè-kan, iàu-kín sī beh kiù I ê ha̍k-seng thoat-lī Mô͘-kúi ê chhiú, chiah tiâu-kò͘-ì thòe I ê ha̍k-seng pàng-sak sìⁿ-miā.
Nā-sī chit sè-kan ê bo̍k-chiá thòe iûⁿ pàng-sak sìⁿ-miā, bô tek-khak ōe kiù iûⁿ thoat-lī chhâi-lông ê chhùi, ia̍h Kiù-chú pàng-sak sìⁿ-miā si̍t-chāi ōe kiù I ha̍k-seng thoat-lī Mô͘-kúi ê chhiú. In-ūi I ū koh-oa̍h, só͘-í kóng Góa ê sìⁿ-miā m̄-sī lâng só͘ ōe chhiūⁿ góa ka-kī pàng-sak, góa ōe pàng-sak, ia̍h ōe ho̍k-tò, che sī góa hōng Pē ê bēng-lēng, che sī Kiù-chú gâu chiàu-kò͘ I ê ha̍k-seng ê sū.
3. Lūn sìn Chú ê lâng sī chòe I ê iûⁿ, tek-khak tio̍h thàn I ê bēng-lēng. In-ūi Kiù-chú í-keng ēng tō-lí iúⁿ-chhī lán ê sim, sī beh hō͘ lán sim-koaⁿ kian-kò͘, tè Chú lâi kâiⁿ, hō͘ chèng-lâng chai lán sêng-si̍t sī chòe Kiù-chú ê ha̍k-seng, kui êng-kng tī Thiⁿ-pē.
Lâng nā án-ni kiâⁿ, tiàm sè-kan chiū an-ún bô gûi-hiám, ia̍h ōe piáu-bêng sī sêng-si̍t sìn Chú. Kiám-chhái ū lâng kian-ta ēng gōa-phê hō͘ lâng bōe hun-piat kàu bêng, m̄-kú Kiù-chú chai i ê chin ké, só͘-í kóng, Góa sī hó ê bo̍k-chiá, bat góa ê iûⁿ, siat-sú lâng nā chin-sim sìn Chú, chiū i ka-kī sim-lāi chū-jiân ōe chhim bat Kiù-chú, só͘-í kóng, "Iûⁿ ia̍h bat góa," chiū-sī jīn I chòe Siōng-tè ê Ki-tok, put-lūn sím-mi̍h tāi-chì, lóng-chóng lia̍h thàn I ê bēng-lēng chòe iàu-kín.
Kiat-bé. Chit ê tôe-ba̍k put-chí ū iàu-kín ê tō-lí thang kà-sī lán hiān-kim tam-tng chit ê lâng, he̍k-sī bo̍k-su, he̍k-sī tióng-ló, he̍k-sī thoân tō-lí ê lâng, tio̍h gâu thé-thiap Kiù-chú ê sim, choan-bū kàu-hōe, pò-iông Hok-im; in-ūi Kiù-chú koh-oa̍h liáu-āu, ū ēng I ê kàu-hōe kau-thok I ê ha̍k-seng.(Iok-hān 21:15-17). Koh Kiù-chú beh chiūⁿ thiⁿ ê sî iah ū bēng-lēng ha̍k-seng tio̍h thoân Hok-im hō͘ bān peh-sìⁿ thiaⁿ (Má-khó 16:15). Tùi án-ni thang chai chiàu-kò͘ kàu-hōe kap pò-iông Hok-im, chin-chiàⁿ sī chòe lán tam-tng chit ê lâng eng-kai tio̍h taⁿ ê tàⁿ. Ē-tóe beh gī-lūn saⁿ hāng.
1. Tam-tng chit ê lâng tio̍h thàn Chú ê bēng-lēng, in-ūi lán só͘ niá ê chit m̄-sī tùi lâng, sī tùi Chú ê kéng-tiàu. Só͘-í tio̍h un-khûn chiàu-kò͘ kàu-hōe, thoân-pò Hok-im, m̄-thang phah-sǹg sī hō͘ bo̍k-su só͘ chhiáⁿ, nā hō͘ i hoaⁿ-hí chiū hó; ia̍h m̄-thang phah-sǹg sī hō͘ kàu-hōe só͘ chhiáⁿ, nā-sái kiâⁿ pún-hūn tī kàu-hōe tiong chiū kàu-gia̍h. Nā-sī án-ni, sī lia̍h i ê koan-hē sī tùi lâng. Lán tio̍h siūⁿ kàu-hōe sī Chú ê kàu-hōe, Hok-im sī Chú ê Hok-im, chiū chai hit ê koan-hē si̍t-chāi sī tùi Chú.
Koh bo̍h-tit phah-sǹg tio̍h tiàm tī sím-mi̍h kàu-hōe khah khoàiⁿ-oa̍h, tī sím-mi̍h só͘-chāi thoân-tō khah ū piān-pok khún-tio̍k, khah ōe an-jiân bô sū. Nā án-ni, sī beh kè-bô͘ ka-kī ê lī-ek, iàu-kín tio̍h koat-ì beh thàn Chú ê chí-ì, I nā khui-lō͘ beh hō͘ lán khì lī-ek lâng, chiū put-lūn khì sím-mi̍h só͘-chāi, tú-tio̍h sím-mi̍h ê kan-khó͘, ia̍h tio̍h kam-sim khì kiâⁿ hit ê pún-hūn. Koh beh chhut-mn̂g khì thoân-tō, m̄-thang tāi-seng phah-sǹg kàu bó͘ sî chiū beh tò-lâi, tio̍h khòaⁿ ki-hōe, put-lūn kú á bô kú, lóng tio̍h thàn Chú ê chí-ì.
2. Tam-tng chit ê lâng tio̍h un-khûn khì kiâⁿ i ê pún-hūn, ji̍t-ji̍t tio̍h chòe Chú só͘ hō͘ lán ê kang, siông-siông ēng Sèng-chheh ê tō-lí kà-sī tok-chek sìn Chú ê lâng, kap i ê ke-lāi, hō͘ in chìn-pō͘ chiâⁿ sèng, hó-táⁿ jīn Chú ê miâ ná chhin-chhiūⁿ chīn-tiong ê tì-sek ê lô͘-po̍k, chiah ōe tit-tio̍h Chú ê pò-siúⁿ.
Siat-sú tam-tng chit ê lâng, bô lia̍h kàu-hōe chòe iàu-kín, choan-choan beh chiàu-kò͘ ka-kī, chham-chhap pa̍t-hāng ê tāi-chì, lēng-gōa thàn tām-po̍h chîⁿ, thang chiàu-kò͘ i ê ke, lóng bô koan-sim chiong Sèng-chheh kà-sī sìn Chú ê lâng, kap lóng bô sûn-sī kàu-hōe ê ke, tì-kàu kàu-hōe lāi ê lâng ū ê léng-sim, ū ê bô chheng-khì, ū ê bô choan-siú an-hioh-ji̍t, chit-hō sī pháiⁿ koh pîn-toāⁿ ê lô͘-po̍k, i tek-khak siū Chú ê chek-pī.
Koh tam-tng chit ê lâng, m̄-thang phah-sǹg i ê pún-hūn nā-sái an-hioh-ji̍t tiàm lé-pài-tn̂g khui-thiah tō-lí kà-sī kàu-hōe chiū kàu-gia̍h, la̍k ji̍t kan thang liāu-lí pa̍t-hāng ê tāi-chì. Nā án-ni, chiū bōe lī-ek gōa-bīn ê lâng. Iàu-kín tio̍h ta̍k-ji̍t chhē ki-hōe, put-lūn tiàm lé-pài-tn̂g, á-sī chhut-mn̂g, lóng tio̍h koan-sim pò-iông Hok-im.
3. Tam-tng chit ê lâng tio̍h siông-siông kî-tó, óa-khò Sèng-sîn ê pang-chān, in-ūi lán gû-gōng, koh loán-jio̍k, ài chòe-chiâⁿ chit-hō tōa kan-hē ê kang, tek-khak tio̍h kiû Sèng-sîn pang-chān. Kiù-chú koh oa̍h liáu-āu ū èng-ín I ê ha̍k-seng kóng, To̍k-to̍k Sèng-sîn kàng-lîm ê sî lín chiū ū châi-lêng koh thòe góa chòe kan-chèng tī Iâ-lō͘-sat-léng, thong Iû-thài, Sat-má-lī-a kàu tī tōe-ke̍k. Ha̍k-seng ǹg-bāng kàu gō͘-sûn-choeh, kó-jiân tit-tio̍h só͘ èng-ún, chiū chi̍t ji̍t saⁿ-chheng lâng siū kám-hòa, tùi hit-tia̍p chiū ha̍k-seng só͘ chòe ê kang lóng ū hāu-giām.
Taⁿ hiān-sî tam-tng chit ê lâng, nā chai ka-kī ê loán-jio̍k, pek-chhiat kî-tó, kàu tit-tio̍h Sèng-sîn pang-chān, chiū lán ê chun-thàn bēng-lēng, un-khûn tio̍h-bôa, tek-khak ū hāu-giām. Nā bô tit-tio̍h Sèng-sîn pang-chān, chiū sui-jiân chun-thàn bēng-lēng un-khûn tio̍h-bôa, ia̍h bōe lī-ek lâng, só͘-í chhim-chhim ǹg-bāng chiah-ê tâng-phōaⁿ ê lâng, lóng ōe tit-tio̍h Sèng-sîn ê un-tián siúⁿ-sù, sī sim só͘ goān.
（《約翰》10:11-18）
（葉漢章寫的）
即个題目的大要緊，是論救主𠢕照顧伊的學生，親像好的牧者的𠢕照顧羊群。大略分兩項。
1、論即个題目的喻意，就是牧者養飼羊群。救主設即个譬喻，是照猶太儂所會曉得，因為𢙠濟濟儂飼羊做家業。彼个𠢕照顧羊的儂，的確盡伊顧羊的法度，創羊櫉堅固，洗掃清氣，予羊群坫。清早就抴羊去草埔食草，下晡就抴到溪邊抑是井邊食水，然後㱏趕倒來羊櫉予伊歇睏。無論寒熱，逐日按呢，無毋是卜予羊勇壯、生湠、興旺。
敢彩拄著豺狼到，卜咬羊，就盡力佮伊相爭，愛救羊免受傷害。有時佮豺狼相爭到失落性命亦捌，這是好的牧者養飼羊的事。
2、論即个題目的正意，就是救主𠢕照顧伊的學生。因為伊有用聖冊做法度，常常教示，故降落聖神感化。予伊的學生心內得著道理的養飼，亦設立擔當職任的儂治理責督，卜予伊的學生心神清氣；品行端莊，照道理來行。甚至替伊的學生放摔性命，因為伊的學生陷落佇魔鬼的手，受魔鬼制壓，盡在危險。救主卜救伊，甘願放摔性命，予儂釘佇十字架。所以講，我是好的牧者替羊放摔性命。毋是親像彼疊的讀冊儂，法利賽儂，愛得著名聲，㱏來教示儂，若拄著艱苦就毋甘願行伊的職。總是救主臨到世間，要緊是卜救伊的學生脫離魔鬼的手，㱏刁故意替伊的學生放摔性命。
但是即世間的牧者替羊放摔性命，無的確會救羊脫離豺狼的喙，亦救主放摔性命實在會救伊學生脫離魔鬼，會救伊學生脫離魔鬼的手。因為伊有故活，所以講我的性命毋是儂所會像我家己放摔。我會放摔，亦會復倒[1]，這是我奉父的命令，這是救主𠢕照顧伊的學生的事。
3、論信主的儂是做伊的羊，的確著趁伊的命令。因為救主已經用道理養飼咱的心，是卜予咱心肝堅固，綴主來行，予眾儂知咱誠實是做救主的學生，歸榮光佇天父。
儂若按呢行，坫世間就安穩無危險，亦會表明是誠實信主。敢彩有儂乾焦用外皮予儂𣍐分別到明，毋拘，救主知伊的真假，所以講，我是好的牧者，捌我的羊，設使儂若真心信主，就伊家己心內自然會深捌救主，所以講「羊亦捌我」，就是認伊做上帝的基督，不論甚物事誌，攏總掠趁伊的命令做要緊。
結尾。即个題目不止有要緊的道理通教示咱現今擔當職的儂，或是牧師，或是長老，或是傳道理的儂，著𠢕體貼救主的心，專務教會，播揚福音，因為救主故活了後，有用伊的教會交託伊的學生（《約翰》21:15-17）。故救主卜上天的時亦有命令學生著傳福音予萬百姓聽（《馬可》16:15）。對按呢通知照顧教會佮播揚福音，真正是做咱擔當職的儂應該著擔的擔。下底卜議論三項。
1、擔當職的儂著趁主的命令，因為咱所領的職毋是對儂，是對主的揀召。所以著殷勤照顧教會，傳播福音，毋通拍算是予牧師所請，但予伊歡喜就好；亦毋通拍算是予教會所請，但使行本份佇教會中就夠額。若是按呢，是掠伊的關係是對儂。咱著想，教會是主的教會，福音是主的福音，就知彼个關係實在是對主。
故莫得拍算，著坫佇甚物教會較快活，佇甚物所在傳道較有辯駁、窘逐，較會安然無事。若按呢，是卜計謀家己的利益，要緊著決意卜趁主的旨意，伊若開路卜予咱去利益儂，就不論甚物所在，拄著甚物的艱苦，亦著甘心去行彼个本份。故卜出門去傳道，毋通事先拍算到某時就卜倒來，著看機會，不論久抑無久，攏著趁主的指示。
2、擔當職的儂著殷勤去行伊的本份，日日著做主所予咱的工，常常用聖冊的道理教示、督責信主的儂，佮伊的家內，予𢙠進步成聖，好膽認主的名，若親像盡忠知識的奴僕，㱏會得著主的報賞。
設使擔當職的儂，無掠教會做要緊，專專卜照顧家己，摻插別項的事誌，另外趁淡薄錢，通照顧伊的家，攏無關心，將聖冊教示信主的儂，佮攏無巡視教會的家，致到教會內的儂有的冷心，有的無清氣，有的無專守安歇日，即號是否故貧懶的奴僕，伊的確受主的責備。
故擔當職的儂，毋通拍算伊的本份但使安歇日坫禮拜堂開拆道理教示教會就夠額，六日間通料理別項的事誌。若按呢，就𣍐利益外面的儂。要緊著逐日揣機會，不論坫禮拜堂抑是出門，攏著關心播揚福音。
3、擔當職的儂著常常祈禱，倚靠聖神的幫贈。因為咱愚戇，故軟弱，愛做成即號大干係的工，的確著求聖神幫贈。救主故活了後有應允伊的學生講，「獨獨聖神降臨的時，恁就有才能故替我做干證佇耶路撒冷，通猶太、撒瑪利亞到地獄。」學生眏望到五旬節，果然得著所應允，就一日三千儂受感化，對彼疊就學生所做的工攏有效驗。
當現時擔當職的儂，若知家己的軟弱，迫切祈禱到得著聖神幫贈，就咱的遵趁命令，殷勤、著磨，的確有效驗。若無得著聖神幫贈，就雖然遵趁命令，殷勤、著磨，亦𣍐利益儂，所以深深眏望遮个同伴的儂，攏會得著聖神的恩典賞賜，是心所願。
[1] ho̍k-tò：復倒，著是故再倒轉來。 ↩