Tân Khé-hong siá·ê.
Góa ū nn̄g pái kià phoe khì Tāi-eng kok hō͘ Oa̍t Bo̍k-su, ū chhiáⁿ i nā ū ki-hōe chiah siá kúi-nā kù hó ōe lâi ìn tī Sèng-hōe pò, in-ūi chōe-chōe lâng bô khòaⁿ-kìⁿ sian-siⁿ ê bīn, phah-sǹg tek-khak ài thiaⁿ-kìⁿ i ê siau-sit. Taⁿ tit-tio̍h i hê-phoe; phoe tiong só͘ kóng·ê, m̄-sī kan-ta tùi góa kóng, iā sī tùi chèng-lâng kóng, chhiáⁿ ìn tī Sèng-hōe pò, ǹg-bāng khòaⁿ kap thiaⁿ ê lâng ōe tit-tio̍h lī-ek.
I ê phoe ê tāi-lio̍k kóng, "Góa ta̍uh-ta̍uh siàu-liām lín bo̍k-su kap chèng thoân tō-lí chiah ê lâng, koh kiû Sèng-sîn kám lín ê sim, hō͘ lín sî-sî thoân tèng si̍p-jī-kè ê tō-lí lâi kiù-lâng. (Khòaⁿ Ⅰ Ko 1:23. Iok 12:28). Chit kúi ji̍t góa siūⁿ choan-bū kî-tó thoân tō-lí, chit kù ū kám-kek góa ê sim, ài thok-tiōng bô lō͘-ēng ê lô͘-po̍k, chiong chit kù lâi thong-ti Goa̍t-hōe chiah ê lâng tio̍h tâng-sim kî-tó, hō͘ lán tāi-ke siông-siông án-ni kiâⁿ. Ū-sî góa tit-tio̍h ū ki-hōe thang thiaⁿ tō-lí tit-tio̍h kà-sī sim siū kám-kek; góa kìⁿ-nā siū sím-mi̍h bián-lē á-sī khah bêng-pe̍k sím-mi̍h tō-lí chiū ài Tiong-kok ê hiaⁿ-tī saⁿ-kap tit-tio̍h. Kúi-nā pái kia̍h-pit beh siá só͘-ū kám-kek góa ê sim-koaⁿ ê ōe, kià lâi ìn tī Sèng-hōe pò. Khó-sioh ū-sî siá bōe lâi, ū-sî siá liáu m̄-káⁿ kià, sī khòaⁿ sim só͘ khǹg·ê sī oa̍h-oa̍h sio-sio, chhin-chhiūⁿ Lêng-bu̍t, nā-sī só͘ siá chhut-lâi, chiū-sī léng-léng sí-sí chhin-chhiūⁿ chhâ-thâu, kià lâi bô sím-mi̍h lō͘-ēng, kan-ta tìn-ūi nā-tiāⁿ.
Kūn-lâi góa ū khì sûn kàu-hōe, chiong Tiong-kok è heng-soe kóng bêng, hō͘ goán chit-pêng tâng tit-tio̍h un-tián ê lâng thiaⁿ, chōe-chōe hiaⁿ-tī chí-bē chin hoaⁿ-hí thiaⁿ. Bat kóng Tiong-kok nî-nî ū khah chōe lâng lâi chòe Kiù-chú ê ha̍k-seng. Koh lāi-tiong iā ū lâng kam-goān ūi-tio̍h Kiù-chú ê miâ lâi siū kan-khó͘, kam-goān tio̍h-bôa lâi kiù tâng-phōaⁿ ê lâng. Góa khah ài kóng heng, m̄-ài kóng soe, put-kò chhin-chhiūⁿ pún-kok ê kàu-hōe ji̍p-kàu ê lâng bô sím-mi̍h sêng-si̍t, Tiong-kok ê Sèng-hōe iā ū. Nā-sī lán tio̍h khòaⁿ hit-ê jia̍t-sim·ê, kiat hó ké-chí·ê, chiū khah ōe hoaⁿ-hí o-ló lán ê Kiù-chú.
Kūn-lâi góa ióng-ióng ǹg-bāng bô kú ōe kìⁿ-tio̍h lín ê bīn, saⁿ-kap chòe Chú ê kang, tâng-sim kî-tó, káng-kiù Sèng-chheh, saⁿ bián-lē, saⁿ chiàu-kò͘, ǹg-bāng ōe ná sèng, ná o̍h Chú, ná hoaⁿ-hí chòe Chú ê kang. (Iok-hān 17:18, 20:21).
Siông-sè khòaⁿ Oa̍t sian-siⁿ ê phoe, thang chai i bô chi̍t-sî bô chi̍t só͘-chāi bô-m̄ ūi-tio̍h Chú tio̍h-bôa lâi chīn i ê chit-hūn. Koh chai i móa-sim thiàⁿ-sioh lán, siông-siông kî-tó, chá-àm siàu-liām lán. Sin-khu sui-jiân hn̄g, nā-sī sim si̍t-chāi sī kūn. Sian-siⁿ ê ha̍k-būn kap châi-tiāu kap tek-hēng lán tāi-ke tāi-khài chai, nā-sī iáu-kú ka-kī kóng oh-tit siá só͘ khǹg·ê m̄-káⁿ ìn tī Sèng-hōe pò, che sī khiam-sùn ê ōe, in-ūi lán ê tō-lí tùi-tiōng khiam-pi. Sui-jiân put-chí chhut-la̍t ê lâng, iā bô ka-kī lia̍h-chòe kàu-gia̍h ê sim, lán siat-sú ōe siá tām-po̍h, á-sī gī-lūn kúi-nā phiⁿ, kiám thang gōng-gōng phah-sǹg sī tē-it gâu ê mah?
（陳啟方寫的）
我有兩擺寄批去大英國予越牧師，有請伊若有機會㱏寫幾若句好話來印佇《聖會報》，因為濟濟儂無看見先生的面，拍算的確愛聽見伊的消息。當得著伊回批，批中所講的，毋是乾焦對我講，也是對眾儂講，且印佇《聖會報》，眏望看佮聽的儂會得著利益。
伊的批的大略講，「我沓沓數念恁牧師佮眾傳道理遮个儂，故求聖神感恁的心，予恁時時傳釘十字架的道理來救儂（看《Ⅰ哥》1:23；《約》12:28）。即幾日我想專務祈禱傳道理，即句有感激我的心，愛託仗無路用的奴僕，將即句來通知月會遮个儂，著同心祈禱，予咱大家常常按呢行。有時我得著有機會通聽道理，得著教示，心就感激。我見若受甚物勉勵抑是較明白甚物道理就愛中國的兄弟相合得著。幾若擺揭筆卜寫所有感激我的心肝的話，寄來印佇《聖會報》，可惜有時寫𣍐來，有時寫了毋敢寄，是看心所囥的是活活燒燒，親像靈物，但是所寫出來，就是冷冷死死，親像柴頭，寄來無甚物路用，乾焦鎮位但但。」
「近來我有去巡教會，將中國的興衰講明，予阮即爿同得著恩典的儂聽，濟濟兄弟姊妹真歡喜聽。捌講中國年年有較濟儂來做救主的學生。故內中也有儂甘願為著救主的名來受艱苦，甘願著磨來救同伴的儂。我較愛講興，毋愛講衰，不過親像本國的教會入教的儂無甚物誠實，中國的聖會也有。但是咱著看彼个熱心的，結好果子的，就較會歡喜呵咾咱的救主。」
「近來我勇勇，眏望無久會見著恁的面，相合做主的工，同心祈禱，講究聖冊，相勉勵，相照顧。眏望會乃聖，乃學主，乃歡喜做主的工。（《約翰》17:18、20：21）」
詳細看越先生的批，通知伊無一時，無一所在，無毋為著主著磨，來盡伊的職份。故知伊滿心疼惜咱，常常祈禱，早暗數念咱。身軀雖然遠，但是心實在是近。先生的學問佮才調佮德行，咱大家大概知，但是猶故家己講僫得寫，所囥的毋敢印佇聖會報，這是謙遜的話，因為咱的道理對重謙卑。雖然不止出力的儂，也無家己掠做夠額的心，咱設使會寫淡薄，抑是議論幾若篇，敢通戇戇拍算是第一𠢕的嘛？