Tè Bo̍k-su hêng-su̍t.

Chiu Chi-tek siá·ê.

Tè Bo̍k-su kè-óng put-chí kú, góa ǹg-bāng ū lâng khah siông-sè chai i ê sū, beh siá lâi ìn tī Sèng-hōe pò. Nā-sī kàu taⁿ iáu-bē ū khòaⁿ-kìⁿ. Só͘-í chiàu góa só͘ chai siá tām-po̍h tī ē-tóe.

Sian-siⁿ sìⁿ Tè, chū siu-bûn, chiū-sī Chiang-chiu-hú Tiô-thòa koāiⁿ lâng, tùi sòe-hàn tha̍k-chheh, kàu tōa-hàn kà-o̍h, sò͘-seng un-sûn, hoân-sū tiong-ti̍t. Tng i bē sìn tō-lí ê tāi-seng, ū chia̍h a-phiàn chin tōa, lī-khui i ê ke khì Liông-khe koāiⁿ sio̍k ê Ûn-á siā kà siáu-ha̍k, sò͘ thàn ê sok-kim, lím-lím-á thang chia̍h a-phiàn, bōe kò͘-tit i ê pē-bú bó͘-kiáⁿ, put-kò toaⁿ-sin tī gōa-bīn lìn nā-tiāⁿ, chhám ia̍h sǹg ke̍k·lah!

Hit-tia̍p tī O͘-sū kiô tú-tú ū siat lé-pài-tn̂g. Chi̍t ji̍t sian-siⁿ ū khì thiaⁿ tō-lí, sim siū kám-tōng, chai chia̍h a-phiàn sī tek-chōe Siōng-tè, chiū oàn-hūn i ê pháiⁿ, kàu tò-khì ê sî, liâm-piⁿ tû i ê a-phiàn ke-si, koat-toàn bô beh koh chia̍h, iā bô ēng io̍h lâi kóe, tó-teh kù i giàn, lêng-khó͘ sí iā m̄ koh ēng a-phiàn lâi chí giàn. Chha-put-to chi̍t lé-pài ê tiong-kan, hun-giàn lóng bô khì·lah. Seng-khu chiām-chiām ióng-kiāⁿ, sìn-tek ná khah chhim. Káng-kiù Sèng-keng sim iā ná siⁿ-khí kèng-khiân. Kàu-hōe khòaⁿ i ū têng-thâu-siⁿ sìn Chú ê pîn-kù, chiū chiap-la̍p i ji̍p kàu.

Āu-lâi kàu-hōe khòaⁿ i ū sêng-si̍t, chiū chhiáⁿ i kà Koàn-kháu ê gī-o̍h. Ū un-khûn chīn-chit, ia̍h sòa ná pang-chān tō-lí. Jiân-āu Bo̍k-su chiū phài i khì Ē-tàiⁿ thoân tō-lí, āu-lâi koh chhe i khì Hūi-oaⁿ ê Lo̍h-iûⁿ sin siat lé-pài-tn̂g. I ê kang ná chiâⁿ, kàu-hōe ná heng-khí, chiū ka-kī tôe-iân kiong-kip in ê sian-siⁿ. Khòaⁿ kàu-hōe ū jia̍t-sim, chiū bián-lē in tio̍h chiâⁿ khoán, chhiáⁿ pún-tōe bo̍k-su thang chiàu-kò͘ in ê kàu-hōe. In chiū gī-lūn tiāⁿ-tio̍h, chhiáⁿ sian-siⁿ chòe in ê bo̍k-su, tī 1883·nî chiū-sī Kong-sū 9·nî saⁿ ge̍h kan, siat-li̍p i tī Ē-mn̂g Hô-hōe ê sî. Tùi hit-tia̍p koh-khah keng sim chīn chit, ài kui êng-kng Thiⁿ-pē.

Khó-sioh kè chōe-chōe nî, kàu-hōe ū ê sí-sit, ū ê léng-sim, só͘ siu ê iân-chîⁿ sòa bô-kàu thang kiong-kip bo̍k-su ê sok-kim, ko͘-put-chiong tio̍h lī-khui lâi Ē-mn̂g kà Tōa-o̍h. Sûi-sī nî-hè ná chōe iáu sī un-khûn chīn-la̍t, chhōa ha̍k-seng chhut-mn̂g kóng tō-lí, ū-sî gâu an-ùi, bián-lē, khó͘-khǹg, ài ha̍k-seng ta̍k ê chiâⁿ chòe tōa tek-hēng, thang chòe Kiù-chú ē lō͘-ēng ê lô͘-po̍k. Che sī sian-siⁿ chá-àm só͘ chòe ê kang.

Bô phah-sǹg tùi kū-nî chhun-thâu, jiám tio̍h pīⁿ-chèng. Chi̍t ji̍t kè chi̍t ji̍t khah lám, sui-bóng mn̄g i-seng chia̍h-io̍h, bô-hoat-tit i ê pīⁿ-chèng siong-tiōng tâ-ôa, chiām-chiām ji̍p chhim, kàu kū-nî 10 ge̍h kéng-jiân hō͘ Chú tiàu tò-khì thian-tông hióng-siū tōa ê hok-khì.

Chá tiâu ū chi̍t-ê lô͘-po̍k, sìⁿ Hí miâ Kim, kap i ê chú-lâng chiūⁿ kiaⁿ hù-sì. Kàu pòaⁿ-lō͘ ū gū-tio̍h kiông-chha̍t, Hí Kim chiū chhut-la̍t kap i kau-chiàn, só͘-í hit-ê chha̍t bōe-tit-thang lâi thâi-sí i ê chú-lâng, āu-lâi khòaⁿ-kìⁿ chú-lâng cháu hn̄g, chiū hoaⁿ-hí bô tî-hông, sòa hō͘ chha̍t thâi·sí.

Taⁿ lán sìn Chú ê lâng, nā ū tú-tio̍h tùi-te̍k, ia̍h tio̍h chhin-chhiūⁿ hit ê lô͘-po̍k e khoán-sit, hó-táⁿ bô kiaⁿ.

戴牧師行述

（周之德^[2]寫的）

戴牧師過往不止久，我眏望有儂較詳細知伊的事，卜寫來印佇《聖會報》。但是到當猶未有看見。所以照我所知寫淡薄佇下底。

先生姓「戴」，字「修文^[3]」，就是漳州府長泰縣^[4]儂，對細漢讀冊，到大漢教學，素生溫純，凡事忠直。當伊未信道理的事先，有食鴉片真大，離開伊的家去龍溪縣^[5]屬的坛仔社^[6]教小學，所趁的束金，斂斂仔通食鴉片，𣍐顧得伊的父母、姥囝，不過單身佇外面輾但但，慘亦算極啦！

彼疊佇烏嶼橋^[7]拄拄有設禮拜堂。一日，先生有去聽道理，心受感動，知食鴉片是得罪上帝。就怨恨伊的否，到倒去的時，連鞭除伊的鴉片的傢俬，決斷無卜故食，也無用藥來改，倒咧據伊憖，寧可死也毋故用鴉片來止憖。差不多一禮拜的中間，薰憖攏無去啦，身軀漸漸勇健，信德乃較深。講究聖經，心也乃生起敬虔。教會看伊有重頭生、信主的憑據，就接納伊入教。

後來，教會看伊有誠實，就請伊教灌口^[8]的義學。有殷勤盡職，亦紲乃幫贈道理。然後牧師就派伊去下店^[9]傳道理，後來故差伊去惠安洛陽^[10]新設的禮拜堂。伊的工乃成，教會乃興起，就家己題捐供給𢙠的先生。看教會的熱心，就勉勵𢙠著成款，請本地牧師通照顧𢙠的教會。𢙠就議論定著，請先生做𢙠的牧師，佇1883年就是光緒9年3月間，設立伊佇廈門和會的時。對彼疊，故較經心盡職，愛歸榮光天父。

可惜過濟濟年，教會有的死失，有的冷淡，所收的捐錢^[11]紲無夠通供給牧師的束金，姑不將著離開來廈門教中學。雖是年歲乃濟，猶是殷勤盡力，抴學生出門講道理，有時𠢕安慰、勉勵、苦勸，愛學生逐个成做大德行，通做救主有路用的奴僕。這是先生早暗所做的工。

無拍算，對舊年春頭，染著病症。一日過一日較荏，雖然問醫生食藥，無法得伊的病症嵩重奈何^[12]，漸漸入深，到舊年10月竟然予主召倒去天堂享受大的福氣。

早朝有一个奴僕，姓「喜」名「金」，佮伊的主儂上京赴試。到半路有遇著強賊，喜金就出力佮伊交戰，所以彼个賊𣍐得通來刣伊的主儂，後來看見主儂走遠，就歡喜無提防，紲予賊刣死。

當咱信主的儂，若有拄著對敵，亦著親像彼个奴僕的款式，好膽無驚。

尾註