Lîm Khiok siá-ê.
Lé-pài-tn̂g siat tī Hái-têng koāiⁿ-siâⁿ, kàu chit-tia̍p ū saⁿ-nî ê kú. Khí-thâu ki-hōe sīm-jiân hó; thoân tō-lí kiám-chhái tī lé-pài-tn̂g, kiám-chhái tī hiuⁿ-siā, chōe-chōe lâng lâi thiaⁿ, hoaⁿ-hí saⁿ chiap-la̍p, ū lâng bóe chheh khì khòaⁿ, ū lâng hoaⁿ-hí lâi tâm-lūn. Góa khòaⁿ-kìⁿ án-ni put-chí hoaⁿ-hí, ka-kī phah-sǹg sī Siōng-tè beh si-un tī chit-ê siâⁿ, kiù chit-ê siâⁿ ê peh-sìⁿ hit-ê sî kàu lah; só͘-í Chio̍h-bé ê hiaⁿ-tī chí-bē hia̍p-le̍k kî-tó, koh hiaⁿ-tī lûn-liû tī ta̍k-ê lé-pài-ji̍t, nn̄g-saⁿ lâng á-sī sì-gō͘ lâng, khì Hái-têng tàu pang-chān tō-lí, kàu chit-tia̍p í-keng ū saⁿ-nî ê kú, iáu-kú bē tit-tio̍h hāu-giām. Hiān-sî chāi Hái-têng lâi siú lé-pài·ê, ū gō͘ la̍k lâng; ū ê sī pún sio̍k tī Chio̍h-bé·ê, ū-ê sī sìn Chú ê lâng ê hé-kì, ū-ê sī sín Chú ê lâng ê kiáⁿ-jî. Lé-pài-tn̂g siat, chiah lâi lé-pài·ê, tī kū-nî chí-ū nn̄g lâng tit-tio̍h chiap-la̍p ji̍p-kàu nā-tiāⁿ; só͘-í kap Se-kok ê Bo̍k-su chham-siông, tī hia tō-lí bô sím-mi̍h heng-khí, bô put-chí lī-ek, siūⁿ beh siu lé-pài-tn̂g hō͘ i tó.
Nā-sī Chio̍h-bé chí-bē thiaⁿ-kìⁿ chit-ê tāi-chì, put-chí iu-būn, siūⁿ-khí cha̍p-nî chêng tī Hái-têng í-keng chi̍t-pái siat lé-pài-tn̂g, āu-lâi siu, hō͘ lâng thí-chhiò; taⁿ chit-ê tē-jī pái siat nā koh siu, sī koh-khah hō͘ lâng thí-chhiò. Só͘-í hiaⁿ-tī chí-bē tâng-sim kî-kiû Siōng-tè ê un, saⁿ-kap gī-lūn tiāⁿ-tio̍h kin-nî tī Hái-têng ê lé-pài-tn̂g iû-goân koh khui. Hiaⁿ-tī kam-goān tàu pang-chān thoân tō-lí kiù hit-ê siâⁿ ê peh-sìⁿ.
Taⁿ chhiáⁿ Chiang-choân ê hiaⁿ-tī chí-bē liām-tio̍h kàu-hōe it-thé, pîⁿ-pîⁿ sio̍k tī chi̍t-ê Chú, chiū chhiat-chhiat thòe Hái-têng kî-tó, ǹg-bāng Siōng-tè siúⁿ-sù Sèng-sîn piàn-ōaⁿ in ê ngī-sim, hō͘ in hóe-chōe sìn Chú tit-tio̍h kiù, sī sim só͘ goān.
（林曲寫的）
禮拜堂設佇海澄縣城，到即疊有三年的久。起頭機會甚然[1]好，傳道理敢彩佇禮拜堂，敢彩去鄉社，濟濟儂來聽，歡喜相接納，有儂買冊去看，有儂歡喜來談論。我看見按呢不止歡喜，家己拍算是上帝卜施恩佇即个城，救即个城的百姓彼个時到啦，所以石碼的兄弟姊妹協力祈禱，故兄弟輪流佇逐个禮拜日，兩三儂抑是四五儂，去海澄到幫贈道理，到即疊已經有三年的久，猶故未得著效驗。現時在海澄來守禮拜的，有五六儂，有的是本屬佇石碼的，有的是信主的儂的夥計，有的是信主的儂的囝兒。禮拜堂設，㱏來禮拜的，佇舊年只有兩儂得著接納入教但但，所以佮西國的牧師參詳，佇遐道理無甚物興起，無不止利益，想卜收禮拜堂予伊倒。
但是石碼的兄弟姊妹聽見即个事誌，不止憂悶，想起十年前佇海澄已經一擺設禮拜堂，後來收，予儂恥笑，當即个第二擺設，若故收，是故較予儂恥笑。所以兄弟姊妹同心祈求上帝的恩，相合議論定著今年佇海澄的禮拜堂猶原故開。兄弟甘願鬥幫贈傳道理，救彼个城的百姓。
當請漳泉的兄弟姊妹念著教會一體，平平屬佇一个主，就切切替海澄祈禱，眏望上帝賞賜聖神變換[2]𢙠的硬心，予𢙠悔罪信主，得著救，是心所願。