Chêng ū chi̍t chiah tōa-chûn, sái chhut káng kú-kú. Iáu-bē kàu beh khì ê só͘-chāi, tú-tio̍h hong-thai khì i phah bê-lō͘. Āu-lâi phah kàu chi̍t ê sian-kéng ê hái-sū, hong chiah chīⁿ, tāi-kong chiū pha-tiàⁿ.
Chit ê hái-sū chhut chōe-chōe chin súi ê hoe, iā chin chōe hó-chia̍h ê ké-chí, chûn·ni̍h ê tah-kheh khòaⁿ-kìⁿ, chiū liâm-piⁿ ài chiūⁿ soaⁿ.
Hiah ê kheh chiū pun chòe gō͘ téng-hō ê lâng. It-téng bô beh lī-khui chûn, kóng, Kiám-chhái bô lōa-kú ū sūn-hong tāi-kong chiū beh khí-tiàⁿ sái chûn khì, lī-khui goán. Goán m̄-kam ūi-tio̍h chit-ê hái-sū chiām-sî ê an-lo̍k sit-lo̍h ki-hōe khì goán só͘ beh khì ê só͘-chāi.
Jī-téng·ê chiām-sî chiūⁿ soaⁿ, phīⁿ kìⁿ hoe phang-phang, chia̍h ké-chí lī-kháu, chiū koh tò-lâi chûn·ni̍h tit-tio̍h seng-khu sóng-khoài khin-sang. In só͘ tòa ê kheh-ūi iû-goân tit-tio̍h tòa.
Saⁿ-téng·ê in iā chiūⁿ soaⁿ thèng-hāu kàu sūn-hong khí, chiū kóaⁿ-kín lo̍h-chûn. Hit-sî chúi-siú teh khioh tiàⁿ, lóng bâng-loān. Hiah-ê kheh chiū bōe-tit-thang tit-tio̍h iû-goân ê hó kheh-ūi, bōe-tit-thang chhin-chhiūⁿ tāi-seng hiah chū-chāi ê hoaⁿ-hí.
Sì-téng·ê in khí khì tòa tī soaⁿ-téng, sui-jiân thiaⁿ-kìⁿ chûn·ni̍h ê lâng kòng-cheng beh kiâⁿ chûn, in lia̍h-chòe bô iàu-kín, kóng, "In iáu-bē khí-phâng, m̄-sái hiah kóaⁿ-kín, koh tiap-á chiah lâi-khì." Chûn·ni̍h ê lâng koh kòng-cheng, hiah ê lâng kóng, "In bô kā lán pàng hē·teh chòe in khì." Iû-goân chòe in tiàm soaⁿ-téng, kàu khòaⁿ-kìⁿ chûn teh kiâⁿ, chiū kin-meh cháu lo̍h hái siû óa chûn peh chiūⁿ-khì, sòa kha̍p tio̍h-siong á-bē kàu in tau ê sî bô hó.
Gō͘-téng·ê hiah ê lâng chīn khó-lîn·ah, chīn khó-lîn·ah! In in-ūi tham-chia̍h tì-kàu bô thiaⁿ-kìⁿ chûn kòng-cheng ê siaⁿ. Chûn chòe i khì, in iáu-kú m̄-chai; sòa hō͘ iá-siù tùi chhiū-nâ chhut-lâi kā in khì chia̍h. Ū ê sui-jiân bô hō͘ iá-siù kā khì nā-sī ūi-tio̍h tham-chia̍h kàu siuⁿ-pá tì-kàu tiùⁿ-sí.
Taⁿ hit chiah chûn sī chí kiù lâng kàu thian-tông. Hit ê hái-sū sī chí sè-kan ê khoài-lo̍k.
Hiah ê tē-it téng·ê, só͘ m̄-ài hióng-siū·ê. Chóng-sī lâng nā chhin-chhiūⁿ hiah ê tē-jī téng·ê chún-chat ēng, m̄-nā bô siong-hāi, hoán-tńg ū tit-tio̍h khah lī-ek.
Lán nā o̍h tē-saⁿ téng ê khoán, chòe lán iân-chhiân chiah hoán-hóe, kiám-chhái bô siū hāi put-chí siong-tiōng, chóng-sī ū chhong-chhong hông-hông ê tio̍h-kip.
Nā o̍h tē-sì téng iân-chhiân kàu liâm-sî khiám-chhái ōe tit-tio̍h kiù, bōe bián-tit tio̍h siū siong. Siat-sú lâng kóng, Góa nā o̍h hit ê sì-téng ê khoán chiū hó, m̄-kú lâng éng bōe chún-chat kàu tú-tú hó, khah ōe hō͘ i siuⁿ kè-sî, tì-kàu chhin-chhiūⁿ tē-gō͘ téng·ê siū chhiⁿ-chhám ê kan-khó͘.
―――
Kó͘-chá Chhó͘ Hàn siong-cheng ê sî, Hoâi-im ū chi̍t ê lâng, sìⁿ Hân miâ Sìn. I ê pē-bú chá kè-óng, só͘-í i put-chí sòng-hiong, nā-sī i m̄-kiaⁿ kan-khó͘ ji̍t·sî siông-siông khì thó-hî lâi koe·ni̍h bōe, mî·sî khûn-khûn tha̍k-chheh, káng-kiù peng-chu, sim ū tōa chì-khì, i ia̍h put-chí khiam-pi. I chhut-mn̂g bōe hî siông-siông pē kiàm.
Ū chi̍t ji̍t i chiūⁿ-koe bōe hî, ū tú-tio̍h chi̍t ê ok-lâng, khòaⁿ-kìⁿ Hân-sìn sin pē-kiàm chiū mn̄g kóng, "Lí sin pē-kiàm kiám-sī beh thâi lâng mah? Nā beh thâi góa hō͘ lí thâi, nā m̄-káⁿ thâi, tio̍h ǹg tùi góa khò͘-kha tóe kè·khì." Hân-sìn khòaⁿ-kìⁿ hit ê lâng hiong-ok, chiah nǹg tùi i khò͘-kha kè·khì, in-ūi i ōe thun-lún tit lêng-lio̍k, bián-tit bōe hî ê iân-chhiân.
Kàu āu-lâi ū hō͘ Hàn-ông pài chòe Goân-sòe tit-tio̍h sè-kan tōa ê êng-hián.
Taⁿ lán beh thian-tông ê êng-hián, ia̍h tio̍h khiam-pi, jím-jio̍k. Chiah ū tōa ê hok-khì.
前，有一隻大船，駛出港久久。猶未到卜去的所在，拄著風颱去伊拍迷路。後來拍到一个仙境的海嶼，風㱏靜，軑公就拋錠。即个海嶼出濟濟真水的花，也真濟好食的果子，船裡的搭客看見，就連鞭愛上山。
遐个客就分做五等號的儂。一等無卜離開船，講敢彩無偌久有順風，軑公就卜起錠駛船去，離開阮，阮毋甘為著即个海嶼暫時的安樂，失落機會去阮所卜去的所在。
二等的暫時上山，鼻見花芳芳，食果子利口[1]，就故倒來船裡得著身軀爽快輕鬆。𢙠所蹛的客位猶原得著蹛。
三等的，𢙠也上山聽候到順風起，就趕緊落船[2]。彼時水手咧抾錠，攏忙亂。遐个客就𣍐得通得著猶原的好客位，𣍐得通親像事先遐自在的歡喜。
四等的，𢙠起去蹛佇山頂，雖然聽見船裡的儂摃鐘卜行船，𢙠掠做無要緊，講「𢙠猶未起篷，毋使遐趕緊，故疊仔㱏來去。」船裡的儂故摃鐘，遐个儂講，「𢙠無共咱放下咧做𢙠去。」猶原做𢙠坫山頂，到看見船咧行，就緊猛走落海，泅倚船撆上去，紲磕著傷，抑未到𢙠兜的時無好。
五等的遐个儂真可怜啊，真可憐啊！𢙠因為貪食致到無聽見船摃鐘的聲。船做伊去，𢙠猶故毋知，紲予野獸對樹林出來咬𢙠去食。有的雖然無予野獸咬去，但是為著貪食到傷飽脹死。
當彼隻船是指救儂到天堂，彼个海嶼是指世間的快樂。
遐个第一等的，所毋愛享受的，總是儂若親像遐个第二等的準節用，毋但無傷害，反轉有得著較利益。
咱若學第三等的款，做咱延延㱏反悔，敢彩無受害不止嵩重，總是有倉倉惶惶的著急。
若學第四等延延到臨時敢彩會得著救，𣍐免得著受傷。設使儂講，我若學彼个四等的款就好，毋拘，儂永𣍐準節到拄拄好，較會予伊傷過時，致到親像第五等的受凄慘的艱苦。
古早楚、漢相爭的時，淮陰[3]有一个儂，姓韓名信[4]。伊的父母早過往，所以伊不止喪兇，但是伊毋驚艱苦，日時常常去討魚來街裡賣；暝時勤勤讀冊，講究兵書，心有大志氣，伊亦不止謙卑。伊出門賣魚常常背劍。
有一日伊上街賣魚，有拄著一个惡儂，看見韓信身背劍，就問講，「汝身背劍敢是卜刣儂嘛？若卜刣，我予汝刣，若毋敢刣，著軁[5]對我褲骹底過去。」韓信看見彼个儂兇惡，㱏軁對伊褲骹過去。因為伊會吞忍得凌辱，免得賣魚的延延。
到後來有予漢王派做元帥，得著世間大的榮顯。
當咱卜天堂的榮顯，亦著謙卑、忍辱，㱏有大的福氣。