N̂g Te̍k-siān hoan-e̍k.
...Lûn-tun kiaⁿ-siâⁿ, ū chi̍t-ê...só͘ siat ê Sèng-keng hōe, sī choan-choan phài bat-jī chai tō-lí ê hū-jîn-lâng khì káng-lūn Sèng-keng ê tō-lí, ì-sù sī hō͘ bô-chîⁿ thang bóe Sèng-chheh ê lâng, kap m̄ bat-jī ê, thiaⁿ tō-lí lâi chòe hó-lâng, che sī thiⁿ-ē tē-it ū lī-ek ê hó-sū. Chit-ê hōe khí-thâu siat ê sî, ū chit ê m̄-bat i ê miâ-sìⁿ ê lâng, tiau-kò͘-ì kàu kàu só͘-chāi kìⁿ chit-ê hū-jîn-lâng, the̍h chi̍t-ê kim-pio-á, iok ta̍t gō͘-pah kho͘ tôe tī Sèng-keng hōe chòe só͘-hùi. Chit-ê hū-jîn-lâng mn̄g i ê miâ-sìⁿ, i m̄ kóng chòe i khì, Sèng-keng hōe-tiong ê lâng lóng kî-koài. Kè pòaⁿ nî kú, hit-ê lâng koh lâi tôe, liân-liân kúi-nā nî lóng lâi tôe, ta̍k-nî ū tôe khah chōe, kàu āu-lâi ta̍k-nî ū tôe chi̍t-bān go͘-chheng kho͘. Chá chit-ê Sèng-keng hōe siat tī saⁿ-cha̍p nî chêng, kàu kū-nî chit-ê lâng chiah sí. Chit-ê lâng tī chí saⁿ-cha̍p nî ê tiong-kan, kiōng tôe saⁿ-cha̍p bān gōa kho͘, kàu kin-á-ji̍t iáu-bē chai i ê miâ-sìⁿ, in-ūi chit-ê lâng kià gûn lâi tôe sī ēng i ê pa̍t-hō, chiah bô lâng chai. Koh chit ê lâng beh sí ê sî koh tôe go͘-chheng kho͘, chòe Sèng-keng hōe ê lō͘-ēng. Taⁿ ǹg-bāng pa̍t-lâng iā chiàu iūⁿ chhut-la̍t tôe hō͘ Sèng-keng hōe tit-tio̍h kú-tn̂g.
Lūn chit ê lâng sêng-si̍t sim ài hó, bô kiû lâng chai, chiah sè-kan ê lâng bōe chai i ê miâ-sìⁿ, chiàu lí lâi lūn, Siōng-tè tek-khak bô bōe-kì i ê miâ-sìⁿ.
Koh Lûn-tun hit só͘-chāi, sòng-hiong kap m̄ bat-jī ê lâng chōe-chōe lâng siū chit lâng ê un-hūi, in-ūi chīn chōe lâng tùi thiaⁿ hok-im lâi sìn, chiū kiâⁿ hó-sū chòe hó-lâng.
黃擇善翻譯
...倫敦京城，有一个......所設的聖經會，是專專派捌字、知道理的婦人儂去講論聖經的道理，意思是予無錢通買聖冊的儂，佮毋捌字的，聽道理來做好儂，這是天下第一有利益的好事。即个會起頭設的時，有一个毋捌伊的名姓的儂，刁故意到所在見即个婦人儂，摕一个金錶仔，約值五百箍，題佇聖經會做所費。即个婦人儂問伊的名姓，伊毋講做伊去，聖經會中的儂攏奇怪。過半年久，彼个儂故來題，連連幾若年攏來題，逐年有題較濟，到後來逐年有題一萬五千箍。早即个聖經會設佇三十年前，到舊年即个儂㱏死。即个儂佇此三十年的中間，共題三十萬外箍，到今仔日猶未知伊的名姓，因為即个儂寄銀來題是用伊的別號，㱏無儂知。故一个儂卜死的時故題五千箍，做聖經會的路用。當眏望別儂也照樣出力題予聖經會得著久長。
論即个儂誠實心愛好，無求儂知，㱏世間的儂𣍐知伊的名姓，照理來論，上帝的確無𣍐記伊的名姓。
故倫敦彼所在，喪兇佮毋捌字的儂濟濟儂受即儂的恩惠，因為盡濟儂對聽福音來信，就行好事做好儂。