...Bí kok ê sai-sì, só͘...hōe. Bí-kok tang·....kìⁿ ū kim-soaⁿ... hit-sî lâng ê sim....lâng bô siūⁿ... châi. Lāi-tiong ū ... ê bó͘ kiáⁿ tī ke·... Kū Kim-soaⁿ ku̍t-...ê sî kap i ê bó͘ iok, ....chîⁿ liáu chiū beh siá ....bó͘-kiáⁿ khì; bô phah-sǹg khì lōa-kú lóng bô siau-sit. I ê bó͘ tī ke·ni̍h bān-hūn tio̍h-kip bô tè thang thàm-thiaⁿ i sí-oa̍h. Āu-lâi ū chi̍t ji̍t chih-tio̍h in tiōng-hu ê phoe chiàu i kóng í-keng hoat-châi, chhiáⁿ i ê bó͘ chhōa kiáⁿ kóaⁿ-kín khì. I ê bó͘ chih-tio̍h phoe liáu chin hoaⁿ-hí, kóaⁿ-kín chhōa kiáⁿ kàu Niú-iok thiah-toaⁿ tah hé-hun-chûn beh khì Kū Kim-soaⁿ chhē i ê tiōng-hu. Hit chiah chûn khui kàu tōa-hái, hut-jiân khòaⁿ-kìⁿ chûn tiong hé-sio, thong chûn ê lâng kiaⁿ kàu bōe kò͘-tit. Chai chûn-lāi ū chài chōe-chōe hé-io̍h, kiaⁿ-liáu chòe chi̍t-ē to̍h khí·lâi, thong chûn chhùi-chhùi tāi-ke bô sìⁿ-miā.
Chûn-chú kín kiò chúi-siú pàng sam-pán lo̍h hái kiù lâng. Khó-sioh lâng chōe chûn sòe, loān-loān tô-miā saⁿ-chiⁿ lo̍h chûn, tia̍p-á-kú tīⁿ-tīⁿ beh khui chûn khì. Nā ū lâu chi̍t-ê hū-jîn-lâng kap i ê kiáⁿ iáu tī gûi-hiám tiong, i kóaⁿ-kín kiò sam-pán ê lâng lâi kiù in bú-kiáⁿ n̄g tiâu sìⁿ-miā. Sam-pán ê lâng ìn kóng, "Koh ke chi̍t lâng chiū tîm lo̍h-khì, si̍t-chāi bōe chài·tit," nā-sī bōe kham-tit hit-ê hū-jîn-lâng ti̍t-ti̍t kiû. Sam-pán ê lâng khòaⁿ-kìⁿ i ê kan-khó͘ chin thang khó-lîn, ko͘-put-chiong ín i, chún chi̍t lâng lo̍h-chûn, bú-kiáⁿ bōe-tit-thang chòe chi̍t-ē lo̍h.
Hit-ê hū-jîn-lâng tī gûi-hiám ê sî bô kò͘ ka-kī ê seng-khu, nā ū ài i ê kiáⁿ tit-tio̍h kiù chiū hó, chiah chiong i ê kiáⁿ hō͘ i lo̍h sam-pán, lâu ba̍k-sái hoan-hù i kóng, Nā-sī Siōng-tè kiù lí, kiⁿ-tio̍h lín pē ê sî tio̍h kā i kóng, goán lāu-bú in-ūi kiù kiáⁿ kam-sim sàng liáu sìⁿ-miā.
Khòaⁿ chit ê tāi-chì bú chin thiàⁿ kiáⁿ ê sim. Án-ni ia̍h thang piáu-bêng lán ê Chú Iâ-so͘ tùi thiⁿ-téng lo̍h-lâi sè-kan thòe lán pàng-sak sìⁿ-miā kiù lán ê sim.
......大美國的西勢，所......會。美國東......見有金山......彼時儂的心......儂無想......財。內中有......伊的姥囝佇家裡......舊金山掘......的時佮伊的姥約，錢了就卜寫......姥囝去，無拍算去偌久攏無消息。伊的姥佇家裡萬分著急，無帶通探聽伊死活。後來有一日接著𢙠丈夫的批，照伊講已經發財，請伊的姥抴囝趕緊去。伊的姥接著批了真歡喜，趕緊抴囝到紐約拆單[1]搭火熏船卜去舊金山揣伊的丈夫。彼隻船開到大海，忽然看見船中火燒，通船的儂驚到𣍐顧得。知船內有載濟濟火藥，驚了做一下著起來，通船碎碎，大家無性命。
船主緊叫水手放舢舨落海救儂。可惜儂濟船細，亂亂逃命，相爭落船，疊仔久㶘㶘[2]卜開船去。但有一个婦人儂佮伊的囝猶佇危險中，伊趕緊叫舢舨的儂來救𢙠母囝兩條性命。舢舨的儂應講，「故加一儂就沉落去，實在𣍐載得。」但是𣍐堪得彼个婦人儂直直求，舢舨的儂看見伊的艱苦真重可憐，姑不將允伊，准一儂落船，母囝𣍐得通做一下落。
彼个婦人儂佇危險的時無顧家己的身軀，但有愛伊的囝得著救就好，㱏將伊的囝予伊落舢舨，流目屎吩咐伊講，若是上帝救汝，見著恁父的時著共伊講，阮老母因為救囝甘心送了性命。
看即个事誌，母真疼囝的心，按呢亦通表明咱的主耶穌對天頂落來世間，替咱放摔性命救咱的心。