Taⁿ Chiang-Choân Sèng-hōe pò m̄-nā liû-thoân tī Chiang-Choân nā-tiāⁿ, ū thoân kàu Tâi-oân ê Tâi-lâm Tâi-pak hú, koh ia̍h thoân kàu Si̍t-la̍t Pin-nn̂g-sū. Ta̍k só͘-chāi í-keng siat-li̍p kî-tó hōe, taⁿ chhiáⁿ kok kàu-hōe nā ū thang o-ló kám-un Siōng-tè ê sū , kià lâi chiūⁿ Sèng-hōe pò, thang tī kî-tó hōe ê sîⁿ saⁿ-kap o-ló kám-un, á-sī ū tú-tio̍h iu-būn khún-tio̍k ê sū , ia̍h chhiáⁿ kià lâi chiūⁿ Sèng-hōe pò, thang tī kî-tó hōe ê sî saⁿ-thòe kî-tó, hián-bêng kàu-hōe kiat-liân chòe chi̍t-thé. In-ūi tī kî-tó hōe ê sî thang chiong i chiàu chhù-sū kóng bêng hō͘ hōe-chiòng thiaⁿ lâi kî-tó, chóng-sī nā ōe siá kán koh bêng bián-tit tìn Sèng-hōe pò ê só͘-chāi sī khah hó.
Chí saⁿ ge̍h chhoe-chhit Ia̍p Bo̍k-su ū kàu Póaⁿ-á siat Boán-chhan, sòa kap tāi-ke gī-lūn Thiⁿ-pē í-keng si-un tī Póaⁿ-á, kàu-hōe ū án-ni tōa, taⁿ tio̍h ka-kī chhiáⁿ. Bo̍k-su Tāi-ke hoaⁿ-hí, chiū koan-tôe, í-keng ū chi̍t-pah jī-cha̍p gōa kho͘, nā lóng chiâu tôe, káⁿ ū 130 khah ke, koh kàu-hōe ū kiàn-tì chhân-gia̍p, ta̍k tang só͘ siu ê bí-chhek lâi saⁿ-thiⁿ káⁿ ū kàu-gia̍h chòe Bo̍k-su ê sok-kim, kî-û ê gêng-chio kap ge̍h-chîⁿ thang chòe cha̍p-hùi kap í-gōa ê lō͘-ēng. Tāi-ke gī-lūn tiāⁿ-tio̍h nā ha̍p Siōng-tè ê chí-ì, chiū tī chhiu-hōe kū-pín hō͘ Tāi-hōe, kap Sió-khe pún tông-hōe lâi chhiáⁿ Bo̍k-su.
Taⁿ ǹg-bāng lia̍t-ūi chhiat-chhiat thòe Póaⁿ-á kî-tó, ǹg-bāng Thiⁿ-pē ê pang-chān, hō͘ chit-ê tāi-tsì ōe chiâⁿ.
Ông Kî-sióng siá ê.
Tī Lêng-nâ, tī Phó͘-lâm, koh tī Hūi-sio̍k kúi-nā só͘-chāi, ū khún-tio̍k ê tāi-chì. Chhiáⁿ chèng hiaⁿ-tī chí-bē ti̍t-ti̍t kiû Siōng-tè pó-pì i ê peh-sìⁿ, hō͘ in ê tek-hēng kian-kò͘. Tng-chit ê lâng ū ê bô chīn pún-hūn, kiû Siōng-tè hō͘ in chai koan-hē.
O-ló Siōng-tè khui Theng-chiu-hú ê mn̂g. Nā-sī kan-lân chōe-chōe, kiû Thiⁿ-pē hû-chhî i ê lô͘-po̍k.
Chiàu lán ê sìn ōe tit-tio̍h.
Chhiáⁿ lia̍t-ūi thòe nn̄g keng Tōa-o̍h ê ha̍k-seng kî-tó; koh kiû Siōng-tè ín-chhōa khah chōe ha̍k-seng ji̍p Tōa-o̍h káng-kiù chin-lí thang lī-ek lâng.
Koh chhiáⁿ thòe Soan-tō-hōe kî-tó.
Ài thòe saⁿ-sì ê chhut-o̍h ê lú ha̍k-seng kî-tó. Ū ê tú-tio̍h tōa chhì-liān chiū bô siú lé-pài, chi̍t lâng iā ū chhap pài ngó͘-siōng ê sū. Chhiáⁿ hiaⁿ-tī chí-bē thòe lóng-chóng chhut-o̍h ê ha̍k-seng kî-tó hō͘ in ōe jia̍t-sim kan-chèng tō-lí.
Ū nn̄g-ê hū-jîn-lâng phòa-pīⁿ, tī i-seng-koán thiaⁿ-kìⁿ tō-lí, khoán-sit ná chhin-chhiūⁿ ài sêng-siū. Chhiáⁿ khòaⁿ Sèng-hōe pò ê lâng thòe in kî-tó.
Tī Siông-si gō͘-ge̍h beh siat-li̍p Bo̍k-su chhiáⁿ lia̍t-ūi thòe in kî-tó.
當《漳泉聖會報》毋但流傳佇漳泉但但，有傳到台灣的台南、台北府，故亦傳到實叻、檳榔嶼[^305]。逐所在已經設立祈禱會，當請各教會若有通呵咾、感恩上帝的事，寄來上聖會報，通佇祈禱會的時相合呵咾感恩，抑是有拄著憂悶、窘逐的事，亦請寄來上聖會報，通佇祈禱會的時相替祈禱，顯明教會結連做一體。因為佇祈禱會的時通將伊照次序講明予會眾聽來祈禱，總是若會寫簡故明，免得鎮聖會報的所在是較好。
此三月初七，葉牧師有到坂仔設晚餐，紲佮大家議論天父已經施恩佇坂仔，教會有按呢大，當著家己請。牧師、大家歡喜，就捐題，已經有一百二十外箍，若攏褿題，敢有130較加，故教會有建置畻業，逐冬[^306]所收的米粟來相添敢有夠額做牧師的束金，其餘的弓蕉佮月錢通做雜費佮以外的路用。大家議論定著，若合上帝的旨意，就佇秋會具稟予大會，佮小溪本堂會來請牧師。
當眏望列位切切替坂仔祈禱，眏望天父的幫贈，予即个事誌會成。
（王奇賞寫的）
佇龍巖，佇浦南，故佇惠屬[^307]幾若所在，有窘逐的事誌。請眾兄弟姊妹直直求上帝保庇伊的百姓，予𢙠的德行堅固。當職的儂有的無盡本份，求上帝予𢙠知關係。
呵咾上帝開汀州府的門。但是艱難濟濟，求天父扶持伊的奴僕。
照咱的信會得著。
請列位替兩間大學的學生祈禱，故求上帝引抴較濟學生入大學講究真理通利益儂。
故請替宣道會祈禱。
愛替三四个出學的女學生祈禱。有的拄著試煉就無守祈禱，一儂也有插拜偶像的事。請兄弟姊妹替攏總出學的學生祈禱，予𢙠會熱心干證道理。
有兩个婦人儂破病，佇醫生館聽見道理，款式若親像愛承受。請看聖會報的儂替𢙠祈禱。
佇祥芝五月卜設立牧師，請列位替𢙠祈禱。