Kūn-ji̍t San Bo̍k-su ū chih-tio̍h Pak-kiaⁿ lâm-bīn Bo̍k-su ê phoe, kóng hit só͘-chāi chhun-thiⁿ ū khòng-hān bô thang siu-sêng, kàu chhiu-thiⁿ ū tōa-chúi koh bô thang siu-sêng, chīn kan-khó͘. Tī hia ê Bo̍k-su ū siat-hoat bóe chéng-chí hō͘ in iā, nā-sī tio̍h kàu mê-nî chhun-thiⁿ chiah ǹg-bāng ū thang siu-sêng, m̄-kú chit-tia̍p kàu hit-tia̍p iáu ū kúi ge̍h-ji̍t ê kú, in bô thang chia̍h, kôaⁿ bô thang chhēng. Tī hia hiaⁿ-tī chí-bē tōa-lâng gín-á ū 150 ê, hiān-sî teh kan-khó͘. Bo̍k-su ū tāi-lio̍k lâi sǹg káⁿ tio̍h ū 550 kho͘, chiah ōe kiù chiah-ê lâng ê sìⁿ-miā kàu tī ū siu-sêng ê ji̍t.
Kàu-hōe gōa ê lâng ū kúi-nā bān hiān-sî ia̍h chīn kan-khó͘. Koaⁿ-hú ū lio̍h-á chān in, chóng-sī tī 150 hiuⁿ-lí ū chān 40 ê. Só͘ chān·ê ia̍h sī sió-khóa, iok cha̍p-ji̍t kú múi lâng chi̍t chin, chi̍t-ke cha̍p lâng chiū hō͘ i chhit chin, la̍k lâng hō͘ i sì chin. Án-ni chin-chiàⁿ sī kan-khó͘.
Taⁿ tī hia ê Bo̍k-su ài chiàu-kò͘ hí pah-gō͘ ê sìn Chú·ê, chóng-sī i bô khùi-la̍t, chiah siá phoe chhiáⁿ pa̍t só͘-chāi ê kàu-hōe tàu pang-chān lâi kiù hiah-ê lâng. Nā ōe tit-tio̍h chōe-chōe gûn chiū ia̍h thang chān m̄-sìn ê lâng.
Taⁿ lán Tāi-hōe Hô-hōe, kok Tông-hōe, káⁿ tio̍h hoaⁿ-hí lâi chān in. In-ūi lán ê Tông-hōe iok ū jī-cha̍p gōa keng, khah sió ê Tông-hōe chhut chi̍t nn̄g saⁿ kho͘, khah tōa ê Tông-hōe chhut gō͘ la̍k chhit kho͘, koh gōa-kok lâng tôe thiⁿ·teh liân pa̍t tōe-hng ê kàu-hōe tôe, chham chòe chi̍t-ē, tek-khak ōe kàu-gia̍h thang kiù hiah-ê lâng ê sìⁿ-miā. Chhiáⁿ kok Tông-hōe bô-lūn chōe-chió tio̍h tôe lâi khì chān·i, só͘ tôe·ê m̄-thang iân-chhiân tio̍h khah-kín kài kau Le̍k, Lô͘, Tong Bo̍k-su hō͘ in thang kià khì kau hit-ni̍h ê Bo̍k-su kiù hiah-ê lâng.
Tong Hián-lí siá.
Kè-óng. 8 ge̍h 11 ji̍t, Lîm Léng-lī tī Kó͘-lōng-sū kè-óng.
近日山牧師有接著北京南面牧師的批，講彼所在春天有亢旱[1]無通收成，到秋天有大水故無通收成，盡艱苦。佇遐的牧師有設法買種子予𢙠移，但是著到明年春天㱏眏望有通收成，毋拘即疊到彼疊猶有幾月日的久，𢙠無通食，寒無通穿。佇遐兄弟姊妹、大儂囡仔有150个。現時咧艱苦。牧師有大略來算敢著有500箍，㱏會救遮个儂的性命到佇有收成的日。
教會外的儂有幾若萬現時亦盡艱苦。官府有略仔贈𢙠，總是佇150鄉里有贈40个。所贈的亦是小可，約十日久每儂一升，一家十儂就予伊七升，六儂予伊四升。按呢真正是艱苦。
當佇遐的牧師愛照顧許百外个信主的，總是伊無氣力，㱏寫批請別所在的教會鬥幫贈來救遐个儂。若會得著濟濟銀就亦通贈毋信的儂。
當咱大會、和會、各堂會，敢著歡喜來贈𢙠。因為咱的堂會約有二十外間，較小的堂會出一兩三箍，較大的堂會出五六七箍，故外國儂題添咧，連別地方的教會題，摻做一下，的確會夠額通救遐个儂的性命。請各堂會無論濟少著題來去贈伊，所題的毋通延延著較緊寄交栗、盧、佟[2]牧師，予𢙠通寄去交彼裡的牧師救遐个儂。
（佟顯理寫）
過往。8月11日，林伶俐（音）佇鼓浪嶼過往。