Oa̍t Iok-hān pò.
Chióng-khoán sī pò-siúⁿ Tiong-o̍h ha̍k-seng ê gûn-hāng. Chit-ê gûn sī Só͘-kek-lân hōe-iú tôe-ê. In ài Tiong-kok ke-thiⁿ pún-tōe Thoân tō-lí ê lâng chiah koan-tôe chit ê gûn-hāng lâi pôe-ióng jîn-châi. Só͘ tôe-ê chāi-lāi ū kàu-gia̍h thang chióng-khoán chi̍t lâng, sī beh kì-liām khí-thâu kà Tiong-o̍h ê Sian-siⁿ Tī Hoat-le̍k, ǹg-bāng tùi Tiong-o̍h kàu-hōe ōe heng-khí chōe-chōe lâng chhin-chhiūⁿ i. Chiah ê gûn só͘ siu múi nî ê lī-sek sī chha-put-to $ 150, kàu-gia̍h thang siúⁿ 12 ha̍k-seng múi nî saⁿ lâng.
Ū-sî kàu-hōe lāi lâng ê kiáⁿ-jî sui-jiân ū chhang-miâ ê chu-chit, ài tha̍k-chheh ê sim-chì, nā-sī ke-sū chheng-tām bōe-ōe chiok-kiong, koh pún-tông ê hōe-iú, á-sī kong-hōe bô thang pang-chān, tùi án-ni bô thang ji̍p-o̍h. Taⁿ siat chit-ê chióng-khoán, chiū khah ū chhang-miâ khûn tha̍k ê ha̍k-seng thang ka-kī tit-tio̍h só͘-hùi bián tùi pē-bú, á-sī tùi kong-hōe the̍h. Tùi án-ni thang bián-lē ha̍k-seng ê sim-chì, ia̍h ǹg-bāng kàu-hōe nî-nî ōe heng-khí ū tōa tek-hēng ha̍k-būn ê lâng lâi chòe kà-o̍h ê Sian-siⁿ, Thoân-tō, Bo̍k-su.
1. Chióng-khoán ōe hō͘ 12 lâng tit-tio̍h múi nî saⁿ miâ. Tē-it, tē-jī nî só͘ siúⁿ·ê chiū-sī thâu-miâ 12 kho͘, jī miâ 11 kho͘, tē saⁿ miâ 10 kho͘. Tē saⁿ, tē sì nî ū khah-ke, chiū-sī thâu-miâ $ 15 kho͘, tē-jī $ 14, tē saⁿ $ 13.
Ū-sî ōe khah chōe á-sī khah chió, chiàu gûn kè.
2. Kìⁿ-nā ài tit thâu nî ê chióng-khoán tio̍h khó beh ji̍p Tiong-o̍h só͘ tiāⁿ-tio̍h ê tiâu-kiāⁿ. Tē-jī, tē-saⁿ, tē-sì nî só͘ tio̍h khó·ê sī chiàu Tiong-o̍h ê chiong-thêng.
3. Chit-ê chióng-khoán sui sī ūi-tio̍h khah bô chîⁿ ê lâng siat-ê, iáu-kú bô-lūn sím-mi̍h ōe kham-tit ji̍p Tiong-o̍h·ê thang lâi khó. Khó khah ū-ê chiah tit-tio̍h.
（越約翰報）
獎款是報賞中學學生的銀項。即个銀是蘇格蘭會友題的。𢙠愛中國加添本底傳道理的儂，㱏捐題即个銀項來培養人才。所題的在內有夠額通獎款一儂，是卜記念起頭教中學的先生鄭法力，眏望對中學教會會興起濟濟儂親像伊。遮个銀所收每年的利息是差不多$150，夠額通賞12學生每年三儂。
有時教會內儂的囝兒雖然有聰明的資質，愛讀冊的心志，但是家事清淡𣍐會足供，故本堂的會友，抑是公會無通幫贈，對按呢無通入學。當設即个獎款，就較有聰明、勤讀的學生通家己得著所費免對父母，抑是對公會摕。對按呢通勉勵學生的心志，亦眏望教會年年會興起有大德行、學問的儂來做教學的先生、傳道、牧師。
1、獎款會予12儂得著每年三名。第一、第二年所賞的就是頭名12箍，二名11箍，第三名10箍。第三、四年有較加就是頭名$15，第二$14，第三$13。
有時會較濟抑是較少，照銀題。
2、見若愛得著頭年的獎款著考卜入中學所定著的條件。第二，第三、四年所著考的是照中學的章程。
3、即个獎款雖是為著較無錢的儂設的，猶拘無論甚物會堪得入中學的通來考。考較有的㱏得著。