Chú-ji̍t sîn-liông.

Sū-su-kì 15:1-2.

Chham-sun kàu in tiūⁿ-lâng ê chhù, ū mi̍h sàng i, sī chiàu-lé; chá-ji̍t bat siū-khì i ê bó͘, chit-sî ēng mi̍h sàng·i, sī hián-bêng bô khǹg siū-khì ê ì-sù. Lūn kàu i ê tiūⁿ-lâng só͘ kóng, i bêng-bêng chai Í-sek-lia̍t tiong, pún-goân bô ēng î-á kè hō͘ chí-hu ê lē. Siōng-tè ēng chi̍t-hāng ê tāi-chì khó͘-chhó͘ Chham-sun, sī in-ūi i tī Í-sek-lia̍t cho̍k lâi chhōa īⁿ-pang lâng ê cha-bó͘-kiáⁿ, m̄ ha̍p-gî.

15:3-8. Tùi án-ni Chham-sun siū-khì, chiū siūⁿ beh lâi siau i ê siū-khì. Hit-sî chiong-kūn saⁿ-sì ge̍h, tiū tú-á se̍k ê sî, tōe ta-sò, chháu ta, chiū lia̍h hô͘-lî ta̍k chiah chiong i ê bé pa̍k saⁿ-óa, tiám hé-pé tī nn̄g pha bé, kóaⁿ-ji̍p Hui-lī-sū lâng ê gō͘-kak tiûⁿ, it-chīn sio·khì. Che thang chai Chham-sun bêng-bêng ū tit-tio̍h Siōng-tè ê pang-chān, nā m̄-sī án-ni, thái-thó ōe tit-tio̍h saⁿ-pah chiah ê hô͘-lî·ah! Hui-lī-sū lâng lia̍h-chòe ōe tú-tio̍h chit-ê chai-ē sī tùi i ê tiūⁿ-lâng, chiū sio i ê tiūⁿ-lâng kap cha-bó͘-kiáⁿ. Siōng-tè ēng chit-ê hoat-tō͘, m̄-nā sī chek-pī Hui-lī-sū lâng, ia̍h-sī chek-pī Chham-sun ê bó͘, in-ūi í-keng chòe i ê bó͘, chū-jiân m̄ eng-kai chiong in tiōng-hu ê chhai kā pa̍t-lâng kóng, sui-jiân tāi-chì chhut tī bô-ta-tit-ôa, nā-sī si̍t-chāi sī chòe i ê tiōng-hu ê kiû-siû tùi-te̍k. Thang khòaⁿ tùi-te̍k kong-kek Siōng-tè ê peh-sìⁿ, Siōng-tè tek-khak hêng-hoa̍t·i.

Hui-lī-sū lâng kiâⁿ án-ni, Chham-sun chin-chiàⁿ tio̍h kong-kek in, in-ūi in sio i ê bó͘ ê iân-kò͘.

15:9-20. Āu-lâi Hui-lī-sū lâng beh kong-kek Í-sek-lia̍t, sī in-ūi Chham-sun ê iân-kò͘. Chham-sun kam-goān ka-kī pa̍k lâi kau tī in ê chhiú; kau Hui-lī-sū chèng-lâng ê tiong-kan, Chham-sun hō͘ Sèng-sîn kám-tōng, chhoah tn̄g pa̍k tī chhiú ê soh, khòaⁿ-kìⁿ ū sin ê lû ê chhùi-phóe kut, the̍h khí-lâi phah sí Hui-lī-sū lâng káng chheng. Siat-sú m̄-sī tit-tio̍h Siōng-tè ê pang-chān, thái-thó ōe phah-sí hiah-ê lâng kàu hiah chōe! Tio̍h khòaⁿ Iok-su-a 23:10.

Sū-su-kì 16:1-3.

Chham-sun bat khì Ka-sat siâⁿ. Ka-sat ê lâng ài lia̍h·i, chiū koaiⁿ in ê siâⁿ-mn̂g. Chham-sun sui-bóng kiâⁿ m̄-tio̍h, chóng-sī Siōng-tè put-jím khì-choa̍t·i, hō͘ i pòaⁿ-mî khí-lâi, ēng keng-thâu giâ siâⁿ-mn̂g kap nn̄g ki thiāu kap mn̂g-kông, tô-cháu kàu soaⁿ-bé, lī Ka-sat siâⁿ iok-lio̍k ū saⁿ-khek kú. Taⁿ thàn pòaⁿ-mî lâi tô-cháu tī soaⁿ-tōe, peh hiám-iàu ê tōe, siōng-chhiáⁿ hoân-ló sī o͘h, hô-hòng koh pē tāng ê mi̍h kàu án-ni. Siat-sú na m̄-sī tit-tio̍h Siōng-tè ê pang-chān beh thái-thó ōe. Thang khòaⁿ Siōng-tè gâu chiàu-kò͘ i ê peh-sìⁿ, hō͘ in ōe-tit-thang thoat-lī tùi-te̍k só͘ pī-pān ê kan-khó͘.

16:4-20. Chham-sun koh bô sòe-jī, khòaⁿ-kìⁿ īⁿ-pang ū chhiong-ki, miâ Tāi-lī-lia̍p, chiū loân-ài·i. Hui-lī-sū lâng chiū kap Tāi-lī-lia̍p kè-bô͘, mn̄g i tùi cháiⁿ-iūⁿ tit-tio̍h chit-hō tōa khùi-la̍t, tio̍h ēng sím-mi̍h hoat-tō͘ chiah ōe chè-ap·i.

Tāi-lī-lia̍p chiū ēng oán-choán ê ōe lâi mn̄g·i. Chham-sun kúi-nā pái bô kóng hit-ê si̍t-chêng, sī ēng hong-hoat phiàn·i. Kiù-kèng to m̄-sái phiàn·i, ia̍h m̄-sái kā i kóng; nā-sī tàu-tí Tāi-lī-lia̍p chhut-la̍t pek i, Chham-sun bô kín-sīn, kéng-jiân chiàu-si̍t kóng. Hū-jîn-lâng chiū ēng chit-ê chêng-iû thong-ti Hui-lī-sū lâng, hō͘ Chham-sun khùn tī i ê sim-hoa̍t, kiò lâng thì i ê thâu-mn̂g, i ê khùi-la̍t kó-jiân bô·khì. Thang khòaⁿ, lán tio̍h kín-sīn, nā bô, teh khùn ê sî, lán ê tùi-te̍k ōe hām-hāi lán.

16:21-21. Siōng-tè in-ūi Chham-sun ta̍uh-ta̍uh kiâⁿ put-gī, ài khián-chek i, chiū hō͘ Hui-lī-sū lâng lia̍h·i, iah i ê ba̍k-chiu, hō͘ i chòe hā-chiān ê chhe-ēng. Kàu chit-sî Chham-sun ha̍p-gî ū hoán-hóe. Hui-lī-sū lâng ū ngó͘-siōng, miâ chòe Tāi-kong, sī lâng ê bīn, hî ê sin. Kok-lāi ê lâng phah-sǹg chit sian ngó͘-siōng ōe pang-chān in khah iâⁿ tùi-te̍k. Hit-sî tú-á teh ho̍k-sāi·i, kui kûn hiàn chè-mi̍h, chhù-lāi ê ta-po͘, hū-jîn kàu móa-móa, khoán-sit put-chí lāu-jia̍t, chiū hō͘ Chham-sun tòa tī nn̄g ki thiāu ê só͘-chāi, lâi hō͘ chèng-lâng khòaⁿ. Chham-sun tī chit-sî, sim-lāi chēng-chēng teh kî-tó Siōng-tè,hō͘ i koh ū tōa ê khùi-la̍t. Chiū ēng chhiú pian thiāu, thiāu chi̍h chhù tó, hō͘ i teh-sí ê put-chí chōe. Che kiám ta̍t-nā hián-bêng ka-kī ê khùi-la̍t, ia̍h-sī lâi kui êng-kng tī Siōng-tè.

Lán lâng hoán-hóe kóe lán ê pháiⁿ, Siōng-tè beh sià-bián lán ê chōe, pang-chān lán khah iâⁿ lán ê tùi-te̍k. Lâng nā chòe Siōng-tè ê tùi-te̍k, tio̍h chai kàu sî Siōng-tè beh hoa̍t·i.

Sū-su-kì 17:1-6.

Bí-ka sī Í-hoat-liân soaⁿ ê lâng. Ū thau-the̍h lāu-bú ê gûn chheng-it kho͘; āu-lâi hoán-hóe chiū koh hêng i ê lāu-bú; lāu-bú hoaⁿ-hí, kam-goān chiong chiah-ê gûn hiàn hō͘ Iâ-hô-hoa, chiū tùi tiong-kan thiu-chhut nn̄g-pah kho͘ khì chù siōng. Taⁿ kì-jiân ài hiàn hō͘ Iâ-hô-hoa, sī tio̍h chīn hit-ê siàu-gia̍h lâi hiàn, cháiⁿ-iūⁿ koh lâu tām-po̍h chòe bô lī-ek ê sū, in-ūi chù-siōng goân sī sio̍k tī m̄-tio̍h, tú-tú sī tek-chōe Siōng-tè nā-tiāⁿ. Phah-sǹg i ê lāu-bú tek-khak sī hō͘ Ai-ki̍p ê hong-sio̍k só͘ pé-pa̍k, só͘-í ū ēng gûn chù-siōng, in-ūi i bat khòaⁿ-kìⁿ Ai-ki̍p pài ngó͘-siōng ê hong-sio̍k, kéng-jiân bōe-kì-tit Siōng-tè ê cha̍p-tiâu-kài. Koh Bí-ka siat-li̍p i ê kiáⁿ chòe chè-si, iā-sī hoān-tio̍h Mô͘-se ê lu̍t-lē. Nā ū beh hiàn hō͘ Siōng-tè, tio̍h kàu Sī-lô Siōng-tè ê tiān, kau hō͘ Lī-bī lâng ê chhiú chiah ha̍p-gî, thái-thó thang chhut-chāi i ka-kī ê ì-sù lâi chòe ah? Thang chai, lâng ài hiàn mi̍h hō͘ Siōng-tè, tio̍h chun-thàn Siōng-tè só͘ siat-li̍p ê hoat-tō͘, koat-toàn m̄-thang sūn-thàn ka-kī ê ì-sù.

17:7-13. Ū Lī-bī cho̍k ê siàu-liân lâng, i ê sèng ài kiâⁿ-iû, in-ūi kéng só͘-chāi lâi khiā-khí ê iân-kò͘, tio̍h tùi Bí-ka ê chhù keng-kè. Bí-ka phah-sǹg tit-tio̍h Lī-bī lâng chòe chè-si, pí i ê kiáⁿ khah ha̍p-gî, ài chhiáⁿ i tam-tng chè-si ê chit, iā kiong-kip i chia̍h, chhēng, sok-siu, tùi hit lâng chham-siông, sòa lâu i tiàm-teh.

Bí-ka chiū siat-li̍p i chòe chè-si. Taⁿ chè-si kiám ū iông-ún lâng chū-choan siat-li̍p. Bí-ka chòe chit-ê, si̍t-chāi m̄-tio̍h, chiū Lī-bī lâng iā ū m̄-tio̍h. In-ūi i bêng-pe̍k cha̍p-tiâu-kài ê ì-sù, kéng-jiân chhut-chāi i chhāi ngó͘-siōng lâi kèng-pài. Bí-ka ê chhāi siōng, sui sī ài chioh chit-ê lâi ho̍k-sāi Siōng-tè, iā-sī bô ha̍p ho̍k-sāi Siōng-tè ê hoat-tō͘, sī tōa m̄-tio̍h; chiah-ê lóng-sī tùi i bô jia̍t-sim chiah ū án-ni, i nā chin-chiàⁿ jia̍t-sim ho̍k-sāi Siōng-tè, siáⁿ-sū m̄-khì Sī-lô chhâ-mn̄g só͘ tiāⁿ-tio̍h ê lē, chiū só͘ chòe thang bô ū mâu-pēng?

Sū-su-kì 18:1-6.

Tàn ê chi-phài, ki-gia̍p bē it-chīn tit-tio̍h, sī tùi in bô chhut-la̍t ê iân-kò͘. Ū chi̍t ji̍t kéng in ê cho̍k-tiong eng-bú ê gō͘ lâng, kah in khì thau-khòaⁿ thó͘-tōe. Chí gō͘ lâng sûi-sî khì, hit tiâu lō͘ tio̍h tùi Bí-ka ê chhù kè. Sòa tiàm hia hioh. Ū thiaⁿ-kìⁿ chè-si ê siaⁿ, jīn-ti̍t sī kap in saⁿ-bat·ê. In chiū mn̄g i tī hia chòe sím-mi̍h tāi-chì. Chè-si chiū ēng hit-ê iân-kò͘ kā in kóng. Gō͘ lâng chiū chhiáⁿ i mn̄g Siōng-tè, chit pái khí-sin ōe tit-tio̍h pîⁿ-tháⁿ ê lō͘ á bōe. Chit-hō ê mn̄g, sī thang khòaⁿ-chhut chí gō͘ lâng ê m̄-tio̍h, in-ūi beh mn̄g chè-si, chiū tio̍h khì Sī-lô, chū-jiân ū Siōng-tè só͘ siat-li̍p ê chè-si thang mn̄g. Chiū tī chia lâi mn̄g cháiⁿ-iūⁿ in bōe bêng Í-sek-lia̍t ê lu̍t-lē? Koh chè-si só͘ ìn ê ōe iā-sī lióng-khó, bô it-tēng ê ōe.

18:7-10. Hōng-chhe ê lâng, tò-lâi pò hó ê siau-sit.

18:11-26. Tàn ê cho̍k tit-tio̍h chit-ê hó ê siau-sit, sûi-sî khí-sin. Sǹg ōe kia̍h ke-si-ê ū la̍k-pah lâng, ti̍t-ti̍t kàu Bí-ka ê chhù, chá lâi thau-khòaⁿ thó͘-tōe ê lâng, kā in ê cho̍k kóng Bí-ka ê chhù kong-ho̍k ngó͘-siōng, sûi-sî ji̍p-khì thau-the̍h khì, kā chè-si kóng, Kap goán saⁿ-kap lâi-khì, chòe goán ê chè-si, chun-kùi, chhin-chhiūⁿ goán lāu-pē. Chè-si chiū hoaⁿ-hí, tùi án-ni chè-si chham ngó͘-siōng tī chèng-lâng ê tiong-ng lâi kiâⁿ. Che ū saⁿ-hāng ì-sù. Chá tī khòng-iá ê sî, chè-si kap hoat-kūi bat kiâⁿ tī chèng-lâng ê tiong-kan, sī ia̍h o̍h chit-ê. Koh, sī kiaⁿ-liáu chè-si pòaⁿ-lō͘ thè-hóe, koh tò-khì Bí-ka ê chhù. Koh, sī kiaⁿ-liáu Bí-ka chhe lâng lâi tui. Bô lōa-kú Bí-ka khòaⁿ bô tī-teh, kó-jiân iok i ê tâng-phōaⁿ khì tui Chú ê lâng, chhiáⁿ in hêng i ê ngó͘-siōng, Tàn ê lâng m̄-khéng hêng·i, hoán-tńg ēng pháiⁿ-ōe ìn·i. Taⁿ thang khòaⁿ, chit-ê chè-si ū tōa m̄-tio̍h. I khòaⁿ Tàn ê lâng thau-the̍h i ê tang-ka ê ngó͘-siōng lóng bô chó͘-tòng, koh kú-kú tit-tio̍h i tang-ka ê hó khoán-thāi, kéng-jiân pàng-sak i, lâi tô-cháu. Thang chai i m̄-sī sêng-si̍t thò-tòng ê lâng, thái-thó ōe kham-tit tam-tng Siōng-tè ê chè-si ê chit. Chiū Tàn ê lâng ia̍h ū m̄-tio̍h, in chai chit-ê lâng m̄-sī chiàu Siōng-tè ê hoat-tō͘ só͘ siat-li̍p ê chè-si, kéng-jiân ài ēng i. Koh só͘ thau-the̍h ê ngó͘-siōng nā ū lêng-siàⁿ, chiū bô tì-kàu hō͘ lâng thau chhiáⁿ khì, kì-jiân bōe-ōe ka-kī pó-hō͘, koh thái-thó ōe pó-pì lâng? Chiū in thau-the̍h chit-ê beh chhòng sím-mi̍h? Hô-hòng ngó͘-siōng sī Bí-ka ê, thau-the̍h sī m̄-tio̍h, chiū Bí-ka tui-kàu, koh khǹg-teh iā m̄-khéng hêng·i, chiū kap kiông-kòng ū sím-mi̍h koh-iūⁿ? Án-ni, Tàn ê lâng ū hoān-tio̍h Siōng-tè cha̍p-kài tiong kúi-nā tiâu.

Lán siat-sú m̄ chun-thàn Siōng-tè ê bēng-lēng lâi kiâⁿ, m̄-khéng kóe-pìⁿ, kàu Siōng-tè só͘ tiāⁿ-tio̍h ê sî kàu, tek-khak chek-pī in.

Tùi hit-sî ū siat ngó͘-siōng ê tāi-chì, in liân-lūi āu sè-tāi ê lâng m̄-sī sió-khóa.

Le̍k Bo̍k-su siá.

主日神糧

《士師記》15:1-2

參孫到𢙠丈儂的厝，有物送伊，是照禮^[1]。早日捌受氣伊的姥，即時用物送伊，是顯明無囥受氣的意思。論到伊的丈儂所講，伊明明知以色列中，本原無用姨仔嫁予姊夫的例。上帝用一項的事誌苦楚參孫，是因為伊佇以色列族來抴異邦儂的諸姥囝，毋合宜。

15:3-8.對按呢參孫受氣，就想卜來消伊的受氣。彼時將近三四月，秞拄仔熟的時，地焦燥，草焦，就掠狐狸逐隻將伊的尾縛相倚，點火把佇兩葩尾，趕入非利士儂的五穀場，一盡燒去。這通知參孫明明有得著上帝的幫贈，若毋是按呢，汰討會得著三百隻的狐狸啊！非利士儂掠做會拄著即个災禍是對伊的丈儂，就燒伊的丈儂佮諸姥囝。上帝用即號的法度，毋但是責備非利士儂，亦是責備參孫的姥，因為已經做伊的姥，自然毋應該將𢙠丈夫的猜^[2]共別儂講，雖然事誌出佇無奈得何，但是實在是做伊的丈夫的仇讎^[3]對敵。通看對敵攻擊上帝的百姓，上帝的確刑罰伊。

非利士儂行按呢，參孫真正著攻擊𢙠，因為𢙠燒伊的姥的緣故。

15:9-20.後來非利士儂卜攻擊以色列，是因為參孫的緣故。參孫甘願家己縛來交佇𢙠的手，交非利士眾儂的中間，參孫予聖神感動，撮斷^[4]縛佇手的索，看見有新的驢的喙䫌骨，摕起來拍死非利士儂港千。設使毋是得著上帝的幫贈，汰討會拍死遐个儂到遐濟。著看《約書亞》23:10。

《士師記》16:1-3

參孫捌去迦薩城^[5]。迦薩的儂愛掠伊，就關𢙠的城門。參孫雖罔行毋著，總是上帝不忍棄絕^[6]伊，予伊半暝起來，用肩頭揭城門佮兩支柱佮門橫^[7]，逃走到山尾，離迦薩城約略有三刻久。當趁半暝來逃走佇山地，撆險要的地，尚且煩惱是僫，何況故背重的物到按呢。設使若毋是得著上帝的幫贈卜汰討會。通看上帝𠢕照顧伊的百姓，予𢙠會得通脫離對敵所備辦的艱苦。

16:4-20.參孫故無細膩，看見異邦有娼妓，名大利拉，就是戀愛伊。非利士儂就佮大利拉計謀，問伊對怎樣得著即號大氣力，著用甚物法度㱏會制壓伊。

大利拉就用宛轉的話來問伊。參孫幾若擺無講彼个實情，是用方法騙伊。究竟都毋使騙伊，亦毋使共伊講。但是到底大利拉出力迫伊，參孫無謹慎，竟然照實講。婦人儂就用即个實情通知非利士儂，予參孫睏佇伊的心閥^[8]，叫儂剃伊的頭毛，伊的氣力果然無去。通看，咱著謹慎，若無，咧睏的時，咱的對敵會陷害咱。

16:21-31.上帝因為參孫沓沓行不義，愛譴責伊，就予非利士儂掠伊，挖伊的目睭，予伊做下賤的差用。到即時參孫合宜有反悔。非利士儂有偶像，名做大光，是儂的面，魚的身。國內的儂拍算即身偶像會幫贈𢙠較贏對敵。彼時拄仔咧服侍伊，規群獻祭物，厝內的諸夫、婦人到滿滿，款式不止鬧熱，就予參孫蹛佇兩支柱的所在，來予眾儂看。參孫佇即時，心內靜靜咧祈禱上帝，予伊故有大的氣力。就用手扳^[9]柱，柱折厝倒，予伊硩死的不止濟。這敢但但^[10]（ta̍t-nā）顯明家己的氣力，亦是來歸榮光佇上帝。

咱儂反悔改咱的否，上帝卜赦免咱的罪，幫贈咱較贏咱的對敵。儂若做上帝的對敵，著知到時上帝卜罰伊。

《士師記》17:1-6

米迦是以法蓮山^[11]的儂。有偷摕老母的銀千一箍，後來反悔就故還伊的老母。老母歡喜，甘願將遐个銀獻予耶和華，就對中間抽出兩百箍去鑄像。當既然愛獻予耶和華，是著盡彼个數額來獻，怎樣故留淡薄做無利益的事，因為鑄像原是屬佇毋著，拄拄是得罪上帝但但。拍算伊的老母的確是予埃及的風俗所把縛^[12]，所以有用銀鑄像，因為伊捌看見埃及拜偶像的風俗。竟然𣍐記得上帝的十條戒。故米迦設立伊的囝做祭司，也是猶著摩西的律例。若有卜獻予上帝，著到示羅^[13]上帝的殿，交予利未儂的手㱏合宜，汰討通出在伊家己的意思來做啊？通知，儂愛獻物予上帝，著遵趁上帝所設立的法度，決斷毋通順趁家己的意思。

17:7-13.有利未族的少年儂，伊的性愛行遊，因為揀所在來徛起的緣故，著對米迦的厝經過。米迦拍算得著利未儂做祭司，比伊的囝較合宜，愛請伊擔當祭司的職，也供給伊食、穿、束脩^[14]，對彼儂參詳，紲留伊坫咧。

米迦就設立伊做祭司。當祭司敢有容允儂自專^[15]設立？米迦做即个實在毋著，就利未儂也有毋著。因為伊明白十條戒的意思，竟然出在伊祀偶像來敬拜。米迦的祀像，雖是愛藉即个來服侍上帝，也是無合服侍上帝的法度，是大毋著，遮个攏是對伊無熱心㱏有按呢。伊若真正熱心服侍上帝，啥事毋去示羅查問所定著的例，就所做通無有毛病？

《士師記》18:1-6

但的支派，基業未一盡得著，是對𢙠無出力的緣故。有一日揀𢙠的族中英武的五儂，教𢙠去偷看土地。此五儂隨時去，彼條路著對米迦的厝過。紲坫遐歇。有聽見祭司的聲，認得是佮𢙠相捌的。𢙠就問伊佇遐做甚物事誌。祭司就用彼个緣故共𢙠講。五儂就請伊問上帝，即擺起身會得著平坦的路抑𣍐。即號的問，是通看出此五儂的毋著，因為卜問祭司，就著去示羅，自然有上帝所設立的祭司通問。就佇遮來問怎樣𢙠𣍐明以色列的律例？故祭司所應的話也是兩可，無一定的話。

18:7-10.奉差^[16]的儂，倒來報好的消息。

18:11-26.但的族得著即个好的消息，隨時謹慎。算會揭傢俬的有六百儂，直直到米迦的厝，早來偷看土地的儂，共𢙠的族講米迦有供服偶像，隨時入去偷摕去，共祭司講，佮阮相合來去，做阮的祭司，尊貴，親像阮老父。祭司就歡喜，對按呢祭司摻偶像佇眾儂的中間來行。這有三項的意思。早佇曠野的時，祭司佮法櫃^[17]捌行佇眾儂的中間，是亦學即个。故，是驚了祭司半路退悔，故倒去米迦的厝。故，是驚了米迦差儂來追。無偌久米迦看見無佇咧，果然約伊的同伴去追主的儂，請𢙠還伊的偶像。但的儂毋肯還伊，反轉用否話應伊。當通看，即个祭司有大毋著。伊看但的儂偷摕伊的東家^[18]的偶像攏無阻擋，故久久得著伊的東家的好款待，竟然放摔伊，來逃走。通知伊毋是誠實妥當的儂，汰討會堪得擔當上帝的祭司的職。就但的儂亦有毋著，𢙠知即个儂毋是照上帝的法度所設立的祭司，竟然愛用伊。故，所偷摕的偶像若有靈聖，就無致到予儂偷請去，既然𣍐會家己保護，故汰討會保庇儂？就𢙠偷摕即个卜創甚物？何況偶像是米迦的，偷摕是毋著，就米迦追到，故囥咧，也毋肯還伊，就佮強摃^[19]有甚物各樣？按呢，但的儂有犯著上帝十戒中幾若條。

儂設使毋遵趁上帝的命令來行，毋肯改變，到上帝所定著的時到，的確責備𢙠。

對彼時有設偶像的事誌，𢙠連累後世代的儂毋是小可。

（栗牧師寫）

尾註