Hù-kùi ê ke, chhù sui sī súi, ia̍h kng bô kàu-gia̍h. Nā chiong siâⁿ-lāi pù-lâng kap hiuⁿ-lí choh-chhân lâng lâi pí-phēng, á-sī chiong hù-kùi ê cha-bó͘ gín-á kap chhī-gû ê cha-bó͘ gín-á saⁿ pí, chiu chai chi̍t-ê bīn pe̍h sin-khu lám, chi̍t-ê bīn âng-gê sin-khu ióng. Nā-sī hù-kùi ke, khiā-khí lim-chia̍h, ta̍k-hāng khah iâⁿ choh-chhân ke, sī bōe-ōe tit-tio̍h chheng ê khì, kap chōe-chōe kiⁿ-tio̍h ji̍t-kng. Kūn-lâi siâⁿ-chhī lâng ná chōe, m̄-thang m̄ siat-hoat lâi bián-tit hit-ê mâu-pēng, lâi hō͘ i ióng-kiāⁿ chhin-chhiūⁿ hiuⁿ-kan lâng.
Siâⁿ-chhī ê lâng ài tit-tio̍h hiuⁿ-kan lâng só͘ ū ê lī-ek, hit-ê tāi-chì thái-thó ōe tit-tio̍h? Chi̍t hāng m̄-thang siông tòa tī chhù-lāi, nā bōe-ōe chhut gōa-bīn, tio̍h chiong thang-á khui lâi tit-tio̍h chheng ê khì, chit-hō sī kōe ê sū. Koh chi̍t hāng tio̍h chōe-chōe tit-tio̍h ji̍t-kng. Lâng siông-siông tit-tio̍h ji̍t-kng, chiah ū ha̍p, tùi ji̍t-chhut kàu ji̍t-lo̍h m̄-thang khiàm-kheh kng. Lâng nā bōe-ōe ta̍uh-ta̍uh tiàm tī gōa-bīn, tio̍h hō͘ ji̍t-kng thàu tī chhù-lāi sī iàu-kín. Kūi-lāi ê lâng siáⁿ-sū m̄-bêng chit-ê lí, iā bô beh kóe? Chiū ū bêng-lí ê lâng iā chhiáⁿ bóng thàn sè-sio̍k.
Siâⁿ-chhī ê lâng, tn̂g hè-siū·ê chió, iau-siū·ê chōe, hiuⁿ-kan ê lâng ióng·ê chōe, lám·ê chió. Siâⁿ-chhī ê lâng thiⁿ-kng bē khí, kiaⁿ kng chiò ji̍p-khì, hō͘ i bōe khùn·tit, chit-sî choh-chhân lâng teh chhiùⁿ-koa choh-chhân kúi-nā khu. Siâⁿ-chhī ê lâng tī lāu-lia̍t ê só͘-chāi hì-pîⁿ-kha teh khòaⁿ-hì, siū tio̍h hé-ian teng-kng, á-sī tiám-hé tha̍k chheh, lô-sim lô-sîn, chit-sî choh-chhân lâng khùn lōa-kú·lah. Siâⁿ-chhī ê lâng lóng ke̍h thiⁿ-sî lâi kiâⁿ, kiám m̄ kōe phòa-pīⁿ oh-tit tn̂g-hè-siū mah? Kó͘-chá lâng kóng, Chá-khí chá-khùn hok-khì hè-siū tn̂g-tn̂g. Tng lán chit sè-tāi lâi chiàu kó͘-chá sio̍k-gú ê lí, chòe lâng tit-tio̍h hù-kùi sī oh, ōe hō͘ sin-khu ióng-kiāⁿ bô pīⁿ chiū-sī hok-khì.
Āu koàn beh koh ìn.
富貴的家，厝雖是水，亦光無夠額。若將城內富儂佮鄉里作畻儂來比並，抑是將富貴的諸姥囡仔，佮飼牛諸姥囡仔相比，就知一个面白身軀荏，一个面紅鮭[1]身軀勇。但是富貴家，徛起、啉食逐項較贏作畻家，是𣍐會得著清的氣，佮濟濟見著日光。近來城市儂乃濟，毋通毋設法來免得彼个毛病[2]，來予伊勇健親像鄉間儂。
城市的儂愛得著鄉間儂所有的利益，彼个事誌汰討會得著？一項毋通常蹛佇厝內，若𣍐會出外面，著將窗仔開來得著清的氣，即號是噲的事，故一項著濟濟得著日光。儂常常得著日光，㱏有合，對日光到日落毋通欠缺光。儂若𣍐會沓沓坫佇外面，著予日光透佇厝內是要緊。近來的儂啥事毋明即个理，也無卜改？就有明理的儂也請罔趁世俗。
城市的儂，長歲壽的少，夭壽的濟，鄉間的儂勇的濟，荏的少。城市的儂天光未起，驚光照入去，予伊𣍐睏得；即時作畻儂咧唱歌作畻幾若坵。城市的儂佇鬧熱的所在戲棚骹咧看戲，受著火煙燈光，抑是點火讀冊，勞心勞神；即時作畻儂睏偌久啦。城市的儂攏逆天時來行，敢毋噲破病僫得長歲壽嘛？古早儂講，「早起早睏，福氣歲壽長長」。當咱即世代來照古早俗語的理，做儂得著富貴是僫，會予身軀勇健無病就是福氣。
（後卷故印）