Teh bōng-chóa.

(N̂g Te̍k-siān siá.)

Taⁿ Chiang-Choân ê lâng, tī chhiⁿ-miâ ta̍k lâng teh bōng-chóa, hit-ê bōng-chóa chiū-sī chām chîⁿ ê khoán, saⁿ-chōa, chi̍t-chōa chhit-ê chîⁿ, án-ni hit-ê ì-sù sī sam-hûn chhit-phek, nā-sī án-ni sī sio̍k tī khiàn-sńg. Taⁿ lán thàn tō-lí ê lâng lâi ēng i sī bô ha̍p, m̄-kú hong-sio̍k nā bô teh chóa, tī soaⁿ·ni̍h ū chi̍t hō pháiⁿ-lâng (lâng hō i chòe soaⁿ-kúi) tī soaⁿ·ni̍h teh khòaⁿ, nā khòaⁿ-kìⁿ bōng bô teh chóa, chiū kóng, 'Chit-ê sī bô lâng koán·ê', chiū bōe hō͘ lâng tâi, á-sī chiong bōng iah khì, chiong bōng bōe lâng tâi. Án-ni lán thàn tō-lí ê lâng, nā m̄ teh bōng-chóa ū chōe-chōe kan-khó͘, nā beh siá i, siá bōe liáu.

Chiàu góa gû-gōng ê ì-kiàn, m̄-thang pàng chhut-chāi chhin-chhiūⁿ hiān-sî ê khoán, hō͘ sìn tō-lí ê lâng ū lâng teh, ū lâng bô teh, ū lâng khòaⁿ teh·ê, sim chiū kan-khó͘, sòa siⁿ-khí gī-lūn. Ia̍h ū lâng kóng, Bo̍k-su ê bōng to ōe teh-tit bōng-chóa, góa thái-thó ōe bōe teh-tit? Taⁿ chhiáⁿ lia̍t-ūi siūⁿ chii̍t-ê lióng-choân ê hoat-tō͘, kàu Hô-hōe, Tāi-hōe chū-chi̍p ê sî kok gī-lūn tiāⁿ-tio̍h, hō͘ sìn tō-lí ê, bián-tit kan-khó͘. Góa chit-tia̍p lio̍h-á siūⁿ, nā-sī chiong só͘ teh ê bōng-chóa chām koh-iūⁿ chiū bô siong-hāi, in-ūi sī beh hō͘ lâng chai lán teh bōng-chóa m̄-sī tiōng khiàn-sńg, sī beh kò͘ bōng, á-sī ēng pa̍t-hoat ia̍h ū, kàu-sî lia̍t-ūi ōe gī-lūn, góa m̄-thang chhiàm koân koh kóng·i.

硩墓紙

（黃擇善寫）

當漳泉的儂，佇清明逐儂硩墓紙，彼个墓紙就是鏨錢^[1]的款，三逝，一逝七个錢，按呢彼个意思是三魂七魄，但是按呢是屬佇俔顙。當咱趁道理的儂來用伊是無合，毋拘風俗若無硩紙，佇山裡有一號否儂，（儂號伊做山鬼）佇山裡咧看，若看見墓無硩紙，就講「即仩是無儂管的」就賣予儂埋，抑是將墓挖去，將墓賣儂埋。按呢咱趁道理的儂，若毋硩墓紙有濟濟艱苦，若卜寫伊，寫𣍐了。

照我愚戇的意見，毋通放出在親像現時的款，予信道理的儂有儂硩，有儂無硩，有儂看硩的，心就艱苦，紲生起議論。亦有儂講，牧師的墓都會硩得墓紙，我汰討會𣍐硩得？當請列位想即个兩全的法度，到和會、大會聚集的時，各議論定著，予信道理的，免得艱苦。我即疊略仔想，若是將所硩的墓紙鏨各樣，就無傷害，因為卜予儂知咱硩墓紙。毋是重俔顙，是卜顧墓，抑是用別號的亦有，到時列位會議論，我毋通僭權故講伊。

尾註