ⅠTōa Ⅴ chiuⁿ. Iâ-lō͘-sat-léng ê chêng-hêng.
Sòa-chiap 4 koàn 45 bīn.
Iâ-lō͘-sat-léng siâⁿ sī tī A-se-a Chiu ê ke̍k Sai ê Phàⁿ-le̍k-su-thài-nî tóe-ni̍h (ū-sî kiò-chòe Sèng-tōe, khah siông kiò-chòe Iû-thài-tōe) chiū-sī hiān-sî ê Thó͘-jíⁿ-kî tōe. Lī Tē-tiong-hái ê Tang·èi cha̍p phò͘, lī Sí-hái kap Iok-tàn-hô ê Sai·sì gō͘-phò͘-pòaⁿ, lī Sī-lô-siâⁿ ê Lâm·sì la̍k phò͘, lī Hi-pek-lûn siâⁿ ê Pak·sì la̍k-phò͘-pòaⁿ.
Chit-ê siâⁿ sī chō tī pîⁿ-iûⁿ bé, tāi-lio̍k ū khah *koâiⁿ hái-bīn 260 tn̄g.
Tang Sai Lâm chí saⁿ-bīn ū chin chhim ê soaⁿ-kok ûi-teh, ū só͘-chāi gì-gō͘-cha̍p tn̄g chhim, ū só͘-chāi kiā-la̍k-chha̍k chhin-chhiūⁿ soaⁿ-khàm, chí ū Pak·sì liân pîⁿ-tōe, chóng-sī Pak·sì ê tōe-sè ia̍h-sī bîn-bîn.
Siâⁿ-lāi ia̍h ū soaⁿ-kok, pun kó͘-chá siâⁿ chòe "ē-bīn" kap "téng-bīn" ê siâⁿ (khòaⁿ téng-bīn tē 2 koàn tē Ⅱ chiuⁿ só͘ kóng). Chiah-ê siâⁿ-gōa ê soaⁿ-kok sèng-keng ū kì in ê miâ. Sai kap Lâm hit chōa miâ kiò Pian-him-lùn, Tang·sì hit chōa miâ kiò Iok-sa-hoat (koh miâ Khip-lûn). Siâⁿ-lāi hit chōa ê miâ bô khak-si̍t chai, phah-sǹg sī kiò Tāi-lô-pí-an (che sī chiàu se-kok ê im).
Khòaⁿ téng-bīn só͘ kóng chiū chai, lâng tùi sì-bīn hn̄g-hn̄g khòaⁿ Iâ-lō͘-sat-léng siâⁿ sī chhin-chhiūⁿ koâiⁿ kàu tú thiⁿ. Nā chiong lîn-iū ê siâⁿ lâi kap i pí, chiū koh-khah hián-bêng Iâ-lō͘-sat-léng ê koâiⁿ. Iâ-lī-ko siâⁿ lī Iâ-lō͘-sat-léng ê Tang·sì chí ū sì phò͘, tōe ū khah ke 362 tn̄g. Lâm-lê lī-khui Sai·sì chhit-phò͘-pòaⁿ, tōe khah kē 227 tn̄g, Pek-te̍k-lī lī-khui Pak·sì saⁿ-phò͘-pòaⁿ, tōe khah kē 41 tn̄g chó-iū.
Iû-thài sú-koaⁿ ū o-ló Iâ-lō͘-sat-léng siâⁿ ê koâiⁿ, kóng: tī siâⁿ-chhiûⁿ-piⁿ ê lâu-téng ōe khòaⁿ-kìⁿ Tē-tiong-hái ê chúi-bīn, koh tùi Sèng-tiān téng ōe khòaⁿ-kìⁿ kàu Hi-pek-lûn siâⁿ. Sèng-keng ia̍h kóng-khí i ê koâiⁿ. "Goán ê Siōng-tè Iâ-hô-hoa, khiā tī I ê siâⁿ, tiàm tī I Sèng-soaⁿ, chì chun-kùi bû pí, iàu-kín tio̍h chun-kùi·I. Tōa jîn-kun ê siâⁿ, tī Sûn-soaⁿ ê Pak·sì, sè-bīn koâiⁿ-koâiⁿ, thong-kok o-ló·I. Si XLVIII:1-2.
Téng-bīn ū kóng; siâⁿ-lāi ū chi̍t-chōa Tāi-lô-pí-an soaⁿ-kok pun-khui "téng-bīn ē-bīn ê siâⁿ." Soaⁿ-kok ê Sai-Lâm-pêng sī "téng-bīn siâⁿ", Tang-Pak-pêng sī "ē-bīn siâⁿ". Taⁿ iû-goân tī chit-ê Tāi-lô-pí-an soaⁿ-kok ê Tang·sì (chiū-sī khah óa Sûn-soaⁿ ê Tang-bīn) ū chi̍t-chōe soaⁿ, miâ kiò Mô͘-lí-a. Tī Sûn-soaⁿ kap Mô͘-lí-a soaⁿ ê tiong-kan ê soaⁿ-kok sī koh-khah chhim, chiū ū chō chi̍t tiâu kiô tùi soaⁿ-kok kè-khì, hō͘ chí nn̄g ê soaⁿ saⁿ-liân.
Iâ-lō͘-sat-léng siâⁿ ū pun-chòe nn̄g téng-hō ê lâng teh khiā, chiū-sī Téng Iâ-lō͘-sat-léng siâⁿ sī chun-kùi ê lâng teh khiā. Ē Iâ-lō͘-sat-léng siâⁿ bîn-ke teh khiā. Tī Sûn-soaⁿ (chiū-sī téng siâⁿ) ū khí ông-kiong kun-chong-ke̍k kap pah-koaⁿ ê chhù-the̍h; tī Mô͘-lí-a soaⁿ (Ia̍h thang sǹg sī téng siâⁿ) ū Sèng-tiān kap chè-si ê chhù-the̍h; tī "ē-siâⁿ" ū tiàm-thâu koe-chhī kap peh-sìⁿ ê chhù-the̍h.
Ū saⁿ tiâusiâⁿ-chhiûⁿ lâi ûi chòe Iâ-lō͘-sat-léng siâⁿ. Thâu-chi̍t tiâu sī Tāi-pi̍t chō·ê, B. C.1055; tē-jī tiâu, Hi-se-ka chō·ê, B. C.710; tē-saⁿ tiâu sī Hi-lu̍t A-ki-phàⁿ Ⅱchō·ê, *A. D.44.
Thâu-chi̍t tiâu sī tùi Mô͘-lí-a soaⁿ ê Sèng-tiān ê Sai-Pak-kak chō khí, ûi se̍h ka-nn̂g ê Sûn-soaⁿ, koh kàu Sèng-tiān ê Tang-Lâm-kak lâi sio-chiap. Tī chit-ê siâⁿ-chhiûⁿ-piⁿ ū 60 keng tōa koâiⁿ-lâu. tē-jī tiâu sī tùi Mô͘-lí-a soaⁿ ê kun-chong-ke̍k ê Pak-bīn chō khí, ûi-khûn lìn-tńg "ē-bīn siâⁿ", koh kàu tē-it tiâu Sai-Pak sì ê Í-hoat-liân-mn̂g lâi sio-chiap. Tī chit tiâu siâⁿ-chhiûⁿ-piⁿ ū 40 keng tōa koâiⁿ lâu.
Tē-saⁿ tiâu iû-goân sī tùi Mô͘-lí-a soaⁿ ê Sèng-tiān ê Tang-lâm-kak chō khí, ûi-se̍h siâⁿ-gōa ê Pak-bīn ê thô͘-tōe kàu Sûn-soaⁿ Sai-Pak ê ē-kha, siâⁿ-chhiûⁿ piⁿ ū 90 keng tōa koâiⁿ-lâu. Tē-it, tē-jī chí nn̄g tiâu sì-chiu-ûi ū chha-put-to chi̍t phò͘ lō͘, tē-it kap tē-saⁿ ha̍p, sì-chiu-ûi ū phò͘-pòaⁿ gōa. Só͘-í ōe chai kū Iâ-lō͘-sat-léng ê siaⁿ chin sòe, ia̍h kūn-lâi ê Iâ-lō͘-sat-léng bô tōa.
Chō siâⁿ ê chio̍h-thâu chin tōa, ū tè tn̂g nn̄g-saⁿ tn̄g, khoah tn̄g-gō͘-la̍k, kāu gō͘-la̍k chhioh. Siâⁿ-chhiûⁿ ê koâiⁿ, ū só͘-chāi saⁿ-sì tn̄g, ū só͘-chāi nn̄g-saⁿ tn̄g; khoah, ū só͘-chāi nn̄g-tn̄g gōa, ū só͘-chāi tn̄g-gō͘-la̍k. Siâⁿ-piⁿ teh pó-hō͘ siâⁿ ê lâu chīn-chāi ióng, ū keng ēng sia̍h-chio̍h khí, ū keng sī khui tōa-chio̍h-tōng; ū keng ê chhiûⁿ-piah múi-bīn saⁿ-tn̄g-gōa khoah, saⁿ-tn̄g-gōa koâiⁿ, ia̍h ū keng ê chhiûⁿ-piah múi-bīn chhit-tn̄g-pòaⁿ khoah, chhit-tn̄g-pòaⁿ koâiⁿ. Koh tī ta̍k keng lâu ê sì-ê kak ū koh tha̍h sì-keng cha̍p-só͘ tn̄g koâiⁿ ê lâu.
Iâ-lō͘-sat-léng ū jī-cha̍p gōa ê siâⁿ-mn̂g, lóng kì tī Sèng-keng. Khòaⁿ Tāi I XXVI:16; Tāi II XXIII:5,20; XXVI:9; XXV:223; XXVII:3; XXXIII:14; Ông II XI:6,19; XV:35; XXIII:8; Iâ XIX:2; XXXI:40; XXXIX:4; Nî III:1,3,13,29,31; XII:37,39.
Iâ-lō͘-sat-léng siâⁿ-lāi ê lâng-gia̍h bô khak-si̍t chai. Tī Só͘-lô-bûn ê sî-chūn chha-put-to ū 2,5000 lâng. Hi-lu̍t ông ê sî, kiám-chhái ū 4,5000 lâng.
Nā kàu choeh-kî ê sî, siâⁿ-lāi ū ke-thiⁿ kúi-nā pē; ia̍h kau-chiàn ê sî, peh-sìⁿ cháu khì hia bih, chiū koh ke-thiⁿ chin chōe. Só͘-í kàu Thài-tó kong-phòa siâⁿ ê sî kiám-chhái ū 150,0000 lâng tī-teh.
Āu koàn beh koh ìn.
* Sûn-soaⁿ ū 253.7 tn̄g koâiⁿ.
Mô͘-lí-a 〃〃 242.9 〃〃
Kaⁿ-ná 〃〃 272.4 〃〃
Kaⁿ-ná soaⁿ sī tī Iâ-lō͘-sat-léng ê Tang·sì, kè Iok-sa-hoat soaⁿ-kok chiah ū.
* A. D. Iâ-so͘ kàng-seng āu.
I段V章。耶路撒冷的情形
（紲接4卷45面）
耶路撒冷城是佇亞西亞洲的極西的怕勒斯泰尼[1]底裡，（有時叫做聖地，較常叫做猶太地）就是現時的土耳其地。離地中海的東勢十鋪，離死海佮約旦河的西勢五鋪半，離示羅城的南勢六鋪，離希伯倫城的北勢六鋪半。
即个城是造佇平洋尾，大略有較*懸海面260丈。
東、西、南即三面有真深的山谷圍咧，有所在四五十丈深，有所在崎碌鑿[2]親像山磡，只有北勢連平地，總是北勢的地勢亦是岷岷[3]。
城內亦有山谷，分古早城做「下面」佮「頂面」的城（看頂面第2卷II章所講）。遮个城外的山谷聖經有記𢙠的名。西佮南彼逝名叫「邊欣嫩[4]」，東勢彼逝名叫「約沙法[5]」（故名「汲淪」）。城內彼逝的名無確實知，拍算是叫「大羅比安[6]」（這是照西國的音）。
看頂面所講就知，儂對四面遠遠看耶路撒冷城是親像懸到拄天。若將鄰佑[7]的城來佮伊比，就故較顯明耶路撒冷的懸。耶利哥城[8]離耶路撒冷的東勢只有四鋪，地有較下362丈。南黎[9]離開西勢七鋪半，地較下227丈；伯特利[10]離開北勢三鋪半，地較下41丈左右。
猶太的史官[11]有呵咾耶路撒冷城的懸，講：佇城牆邊的樓頂會看見地中海的水面，故對聖殿頂會看見到希伯倫城。聖經亦講起伊的懸。「我的上帝耶和華，徛佇伊的城，坫伊聖山，至尊貴無比，要緊著尊貴伊。大人君[12]的城，佇郇山[13]的北勢，勢面懸懸，託仗呵咾伊。」《詩》XLVIII:1-2。
頂面有講：城內有一逝大羅比安山谷分離「頂面、下面的城」。山谷的西南爿是「頂面城」，東北爿是「下面城」。當猶原佇即个大羅比安山谷的東勢（就是較倚郇山的東面）有一座山，名叫摩里亞[14]。佇郇山佮摩里亞山的中間的山谷是故較深，就有造一條橋對山谷過去，予此兩个山相連。
耶路撒冷城有分做兩等號的儂咧徛，就是：頂耶路撒冷城是尊貴的儂咧徛；下耶路撒冷城民家咧徛。佇郇山（就是頂城）有起王宮軍裝局[15]佮百官的厝宅；佇摩里亞山（亦通算是頂城）有聖殿佮祭司的厝宅；佇「下城」有店頭街市佮百姓的厝宅。
有三條城牆來圍做耶路撒冷城。頭一條是大闢造的，B. C.1055；第二條，希西家造的，B. C.710；第三條是希律亞基帕Ⅱ造的，*A. D.44。
頭一條是對摩里亞山的聖殿的西北角造起，圍踅規圞个[16]郇山，故到聖殿的東南角來相接。佇即个城牆邊有60間大懸樓。第二條是對摩里亞山的軍裝局的北面造起，圍囷輾轉[17]「下面城」，故到第一條西北勢的「以法蓮門」來相接。佇即條城牆邊有40間大懸樓。
第三條猶原是對摩里亞山的聖殿的東南角造起，圍踅城外的北面的塗地故到郇山西北的下骹，城牆邊有90間大懸樓。第一、第二此兩條四周圍有差不多一鋪路，第一佮第三合，四周圍有半鋪外。所以會知舊耶路撒冷的城真細，亦近來的耶路撒冷無大。
造城的石頭真大，有桗長兩三丈，闊丈五六，厚五六尺。城牆的懸，有所在三四丈，有所在兩三丈；闊，有所在兩丈外，有所在丈五六。城邊咧保護城的樓盡在勇，有間用石石[18]起，有間是開大石洞，有間的牆壁每面三丈外闊，三丈外懸，亦有間的牆壁每面七丈半闊，七丈半懸。故佇逐間樓的四个角有故疊四間十數丈懸的樓。
耶路撒冷有二十外个城門，攏記佇聖經。看《代（Ⅰ）》ⅩⅩⅥ:16；《代（Ⅱ）》ⅩⅩⅢ:5,20；ⅩⅩⅥ:9；ⅩⅩⅤ:23；ⅩⅩⅦ:3；ⅩⅩⅩⅢ:14；《王Ⅱ》Ⅺ:6,9；ⅩⅤ:35；ⅩⅩⅢ:8；《耶》ⅪⅩ:2；ⅩⅩⅪ:40；ⅩⅩⅩⅨ:4；《尼》Ⅲ:1,3,13,29,31；Ⅻ:37,39。
耶路撒冷城內的儂額無確實知。佇所羅門的時陣差不多有25000儂。希律王的時，敢彩有45000儂。
若到節期的時，城內有加添幾若倍，亦交戰的時，百姓走去遐覕，就故加添真濟。所以到泰島[19]攻破城的時敢彩有1500000儂佇咧。
* 郇山：有253.7丈懸；摩里亞山有242.9丈懸；橄欖山有272.4丈懸；橄欖山是佇耶路撒冷的東勢，過約沙法山谷遮有。
* A. D. ：耶穌降生後。
（後卷故印）
[1] Phàⁿ-le̍k-su-thài-nî：怕勒斯泰尼，著是Palestine，當今中文翻譯做巴勒斯坦。 ↩
[2] kiā-la̍k-chha̍k：崎碌鑿，意思是真崎真險峻。 ↩
[3] bîn-bîn：岷岷，意思著是講地勢小可有斜斜趨趨，無通崎。 ↩
[4] Pian-him-lùn：邊欣嫩，聖經古地名，是一逝山谷。巴克禮聖經記做「Piān-him-lùn」，中文翻做「欣嫩子谷」。 ↩
[5] Iok-sa-hoat：約沙法，聖經古地名，是一逝山谷。有儂講即逝山谷著是汲淪谷，是汲淪溪的源頭，離耶路撒冷城外西北勢半鋪，溪水環過北勢，流過聖城外佮橄欖山中間，流入另外一逝山谷裡。 ↩
[6] Tāi-lô-pí-an：大羅比安。聖經古山谷名，中文翻譯做「泰羅普河谷」。 ↩
[7] lîn-iū：鄰佑、鄰右。著是附近、邊頭。 ↩
[8] Iâ-lī-ko：耶利哥城，聖經內中的古城，佇于约但河西勢，離死海的西北勢大略一鋪路。 ↩
[9] Lâm-lê：南黎，古城名，著是Ramleh，當今中文翻譯做「拉姆拉」，佇巴勒斯坦。 ↩
[10] Pek-te̍k-lī：柏特利，古城名，著是「Bethel」，佇巴勒斯坦，當今中文翻譯做「伯特利」。 ↩
[11] sú-koaⁿ：史官，著是專門咧寫「史記」的官員。 ↩
[12] jîn-kun：人君，著是人民的君王。 ↩
[13] Sûn-soaⁿ：郇山，耶路撒冷舊城南勢的一座山，又故翻譯做「錫安山」。 ↩
[14] Mô͘-lí-a：摩里亞，著是Moriah，山名，佇耶路撒冷郇山附近。中文有翻做「摩利亞」。 ↩
[15] kun-chong-ke̍k：軍裝局，著是軍事裝備局，兵器廠。 ↩
[16] ka-nn̂g ê：規圞个，漳州話有講kan-nî ê，意思是kui-ê，普通話的「整個」。 ↩
[17] ûi-khûnlìn-tńg：圍囷輾轉，意思是圍一環。 ↩
[18] sia̍h-chio̍h：石石，著是當今所講的大理石。 ↩
[19] Thài-tó：泰島。是一个古城，也有翻譯做「泰爾島」，新教的《新約聖經》翻做「推羅」，是現在黎巴嫩的一个城。離耶路撒冷西北大約168公里。 ↩